Mhaka Ya Vutomi

Ndzi Hlayisiwe Hi Yehovha eMasikwini Ya Mina Hinkwawo

HI KU VULA KA FORREST LEE

Maphorisa a ma ha ku hi tekela tigramafoni ni tibuku ta hina ta Bibele. Nyimpi ya Vumbirhi ya Misava yi nyike lava lwisanaka na hina xivangelo xo kucetela mufumi lontshwa wa le Canada leswaku a yirisa ntirho wa Timbhoni ta Yehovha. Leswi swi humelele hi July 4, 1940.

LESWI swi humeleleke a swi hi hetanga matimba, hi ye hi ya teka tibuku to tala laha a ti vekiwe kona kutani hi ya emahlweni ni ku chumayela. Ndzi ta tshama ndzi ri karhi ndzi tsundzuka marito ya Tatana enkarhini wolowo: “A hi nge swi pfuketani hi tshika. Yehovha u hi lerise leswaku hi chumayela.” Hi nkarhi wolowo, a ndzi ri ntlhadyana wa malembe ya khume. Kambe hambi ku ri namuntlha, ku tiyimisela ka Tatana ni ku hisekela ka yena nsimu ka ha ri xitsundzuxo xa ndlela leyi Xikwembu xa hina, Yehovha, a va tiyisaka ha yona vanhu va yena lavo tshembeka.

Enkarhini lowu landzeleke loko maphorisa ma hi yimisa, a ma tekanga tibuku ta hina ntsena, kambe ma tlhele ma khoma Tatana ma n’wi yisa ekhotsweni, a siya Manana a ri swakwe ni vana va mune. Sweswo swi humelele hi September 1940 le Saskatchewan. Hi ku hatlisa endzhaku ka sweswo ndzi hlongoriwile exikolweni hikwalaho ka ku landzela ripfalo ra mina leri leteriweke hi Bibele ni hi ku ka ndzi nga losi mujeko kumbe ku yimbelela risimu ra tiko. Ku ya ka mina emahlweni ni dyondzo ndzi ri ekaya swi ndzi pfumelele ku va ni xiyimiso lexi pfumelelanaka ni swiyimo, naswona ndzi hlanganyele hi xitalo entirhweni wa nsimu.

Hi 1948 ku ve ni xirhambo xa leswaku maphayona, ku nga vatirheli va nkarhi hinkwawo va Timbhoni ta Yehovha, va rhurhela eribuweni ra le vuxeni ra Canada. Kutani ndzi yile ndzi ya phayona eHalifax, Nova Scotia ni le Cape Wolfe, eXihlaleni xa Prince Edward. Lembe leri landzeleke ndzi kume xirhambo xo tirha mavhiki mambirhi, ehofisini ya  rhavi ya Timbhoni ta Yehovha eToronto. Mavhiki wolawo mambirhi ma engeteleke ma va malembe lama tlulaka tsevu ndza ha tirha kona. Hi ku famba ka nkarhi ndzi hlangane na Myrna loyi na yena a a rhandza Yehovha, kutani hi tekanile hi December 1955. Hi ye hi ya tshama eMilton, Ontario naswona ku nga ri khale vandlha lerintshwa ri simekiwile. Kamara ra le hansi ra yindlu ya hina ri hundzuke Holo ya Mfumo.

Ku Navela Ku Ndlandlamuxa Vutirheli Bya Hina

Emalembeni lama landzeleke, hi ve vatswari va vana va tsevu lava a ho lumulela kunene. Hi tivule hi n’wana wa nhwanyana ku nga Miriam. Kutani ku ta Charmaine, Mark, Annette, Grant, ivi rikotse ku va Glen. Minkarhi yo tala loko ndzi vuya hi le ntirhweni a ndzi kuma vana va rhendzele xitiko, Myrna a ri ku va hlayeleni Bibele, a va hlamusela timhaka ta le Bibeleni, a nghenisa etimbilwini ta vona rirhandzu ra xiviri hi Yehovha. Hikwalaho ka nseketelo wa yena wa rirhandzu, vana va hina va kume vutivi lebyinene bya Bibele va ha ri vatsongo.

Ku hisekela ka tatana vutirheli ku siye dyondzo ya matimba emianakanyweni ni le mbilwini ya mina. (Swivuriso 22:6) Xisweswo hi 1968, loko mindyangu ya Timbhoni ta Yehovha yi komberiwe ku rhurhela eAmerika Xikarhi ni le Dzongeni ku ya pfuneta hi ntirho wo chumayela, ndyangu wa hina wu navele ku amukela xirhambo lexi. Hi nkarhi wolowo vana va hina a va ri ni malembe ya 5 ku ya ka 13 naswona a nga ri kona loyi a a tiva Xipaniya exikarhi ka hina. Hi ku landzela nkongomiso lowu hi nyikiweke wona, ndzi teke riendzo ndzi ya ematikweni yo hambana-hambana ku ya kambisisa xiyimo xa mahanyelo. Loko se ndzi vuyile, tanihi ndyangu hi ehlekete hi mhaka leyi hi xikhongelo, kutani hi hlawula ku rhurhela eNicaragua.

Ku Tirha eNicaragua

Hi October 1970 se a hi ri ekaya ra hina lerintshwa, naswona ndzi nga si heta ni mavhiki manharhu se a ndzi averiwe nkulumo yo koma enhlanganweni wa vandlha. Ndzi tilumalumile hi Xipaniya xa mina lexi nga nyawuliki kutani ndzi hetelela hi ku rhamba vandlha hinkwaro ekaya ra hina, ndzi ri rhambela cerveza hi Mugqivela hi 9:30 a.m. A ndzi fanele ndzi te servicio, rito leri vulaka ntirho wa nsimu, kambe a ndzi rhamba vanhu hinkwavo ku ta nwa byala. Ku dyondza ririmi a ku ri tlakula va xurhe hakunene!

Eku sunguleni, a ndzi swi tsala evokweni leswi ndzi nga ta swi vula ensin’wini kutani ndzi swi prakitisa loko ndzi ri endleleni. A ndzi fika ndzi ku: “Buku leyi yi ta ni dyondzo ya mahala ya le kaya ya Bibele.” Munhu un’wana la tekeke buku, endzhaku ka nkarhi u vule leswaku u boheke ku ta eminhlanganweni ku ta twa leswi a ndzi ringeta ku n’wi byela swona. Wanuna loyi u ve Mbhoni ya Yehovha. Wa nga vona ndlela leyi swi nga erivaleni ha yona leswaku Xikwembu hi xona xi kurisaka mbewu ya ntiyiso etimbilwini ta lava va titsongahataka, hilaha muapostola Pawulo a swi xiyeke hakona!—1 Vakorinto 3:7.

 Endzhaku ka malembe mambirhi hi ri entsindza wa Managua, hi komberiwe ku rhurhela edzongeni wa Nicaragua. Kwalaho hi fike hi tirha ni vandlha ra Rivas ni mintlawa leyi nga yoxe ya vanhu lava tsakelaka, leyi nga ekusuhi. Pedro Peña, Mbhoni leyi kuleke leyi tshameke yi tshembekile, a a famba na mina loko hi endzela mintlawa leyi. Wun’wana a wu ri exihlaleni lexi nga ni vholkheno eTiveni ra Nicaragua, laha a ku ri ni ndyangu wun’we ntsena wa Timbhoni ta Yehovha.

Hambileswi ndyangu lowu wu nga ni swilo switsongo leswi vonakalaka, wu endle matshalatshala lamakulu ku kombisa ku tlangela ku endza ka hina. Madyambu lawa hi fikeke ha wona hi kume mpandzwa wu hi rindzile. Hi tshame vhiki naswona vo tala va vanhu va ndhawu leyi lava rhandzaka Bibele, va hi he swakudya. A hi tsakile ku vona vanhu va 101 va ta yingisela nkulumo ya le rivaleni hi Sonto.

Eka mina ndzi vone matimba ya Yehovha ku ri wona ma tirheke, loko hi fanele hi endzela ntlawa wa vanhu lava tsakelaka etintshaveni ta le kusuhi ni ndzilakana wa Costa Rica. Hi siku leri a hi fanele hi famba ha rona, Pedro u hundze a ndzi teka, kambe a ndzi vabya ndzi khomiwe hi dari. Hi loko ndzi ku: “A ndzi nge swi koti ku famba Pedro.” U veke voko ra yena emombyeni wa mina kutani a ku: “U khomiwe hi mukhuhlwana wo biha, kambe u fanele u famba! Vamakwerhu va rindzile.” Hiloko a endla xikhongelo lexi humaka embilwini, lexi a ndzo sungula ku xi twa.

Endzhaku ka sweswo ndzi te: “Famba u ya tiendlela fresco (juzi). Ndzi ta va ndzi hetile endzhaku ka timinete ta kwalomu ka khume.” A ku ri ni mindyangu mimbirhi ya Timbhoni leyi tshamaka laha a hi endzele kona kutani yi hi khathalele hi ndlela leyinene. Siku leri landzelaka hi ye eku chumayeleni na vona hambileswi a ndzi nga si hlakarhela. Mayana ndlela leyi a swi khutaza ha yona ku vona vanhu lava tlulaka dzana va ri kona enhlanganweni hi Sonto!

Hi Rhurha Nakambe

Hi 1975 ku tswariwe n’wana wa hina wa vukombo, Vaughn. Lembe leri landzeleke hi boheke ku tlhelela eCanada hikwalaho ka swiphiqo swa timali. A swi nga olovi ku suka eNicaragua, hikuva a hi wu vonile nseketelo wa matimba wa Yehovha loko hi ri kwalaho. Hi nkarhi lowu hi sukeke ha wona, a ku ri ni vanhu vo tlula 500 ensin’wini ya vandlha ra hina lava a va ta eminhlanganweni.

Eku sunguleni, loko mina na Miriam, n’wana wa hina wa xisati, hi hlawuriwe ku va maphayona yo hlawuleka eNicaragua, Miriam u ndzi vutisile: “Tatana, loko swo tshuka swi boha leswaku u tlhelela eCanada, xana u ta ndzi pfumelela ndzi sala laha?” A ndzi nga ri na makungu yo suka endhawini leyi, hiloko ndzi ku: “Kunene!” Kutani loko hi famba, Miriam u sele leswaku a ya emahlweni ni vutirheli bya yena bya nkarhi hinkwawo. Endzhakunyana u tekane na Andrew Reed. Hi 1984 va ve eka ntlawa wa vu-77, xikolo xa varhumiwa xa Gilead xa Timbhoni ta Yehovha, lexi hi nkarhi wolowo a xi ri eBrooklyn, New York. Miriam sweswi u tirha ni nuna wakwe eDominican Republic, u hetisisa ku navela ka yena loku byariweke eka yena hi varhumiwa lava a va ri xikombiso lexinene eNicaragua.

Marito ya Tatana lama nge, “a hi nge swi pfuketani hi tshika,” a ma ri karhi ma tuvika embilwini ya mina. Kutani hi 1981 loko se hi veke mali leyi ringaneke yo tlhelela eAmerika Xikarhi, hi tlhele hi rhurha, sweswi hi ye eCosta Rica. Loko hi ri karhi hi pfuna kwalaho hi rhambiwile leswaku hi ya pfuneta ku aka rhavi lerintshwa. Hambiswiritano, hi 1985 n’wana wa hina wa jaha Grant a a lava vutshunguri kutani hi tlhelele eCanada. Glen u sale eCosta Rica a hoxa xandla entirhweni wo aka rhavi, kasi Annette na Charmaine a va ri maphayona yo hlawuleka. Hina lava hi tshameke hi suka eCosta Rica, a hi lahlekeriwanga hi ntshembo wa leswaku siku rin’wana hi ta tlhela hi vuya.

Ku Langutana Ni Maxangu

Hi September 17, 1993, a ri xe kahle naswona a ku ri ni dyambu. Mina ni n’wana wa hina lonkulu,  Mark, a hi tirha elwangwini. A hi tirha endhawini yin’we hi ri karhi hi vulavula hi timhaka ta moya leswi a ku ri mukhuva wa hina. Hiloko ndzi rhetemuka kutani ndzi vumbuluka ndzi ya ku mhee ehansi. Loko ndzi ya xalamuka, leswi ndzi swi voneke a ku ri mavoni lama vangamaka ni vanhu lava ambaleke swo basa. A ku ri kamara ra le xibedlhele ro tshungula vanhu lava vavisekeke swinene.

Hikwalaho ka leswi Bibele yi swi vulaka, marito ya mina yo sungula a ku ri lawa: “A ndzi lavi ngati, a ndzi lavi ngati!” (Mintirho 15:28, 29) A swi tiyisa nhlana ku twa Charmaine a ku: “U nga karhateki Tatana. Hinkwerhu hi kona.” Ndzi swi tive endzhaku ka nkarhi leswaku madokodela ma ri vonile tsalwa ra mina ra vutshunguri naswona a ku vanga na xiphiqo malunghana ni ngati. A ndzi tshoveke nhamu naswona a ndzi lamarile hi ku helela, ndzi tsandzeka ni ku hefemula hi ndzexe.

Leswi se a ndzi tsandzeka ni ku tshukatshuka, a ndzi lava ku tiyisiwa hi Yehovha ku tlula rini na rini. Ndzi endliwe vuhandzuri eka kholokholo ndzi hoxiwa phayiphi yo hefemula ha yona, leswi laha ku fambaka moya wo ya emalakeni yo vulavula a ku pfalekile. A ndzi nga swi koti ku vulavula. Vanhu a va boheka ku languta nomu wa mina leswaku va ta twisisa leswi a ndzi ringeta ku swi vula.

Timali leti a ti laveka ti tlakuke hi xihatla. Leswi nsati ni vo tala va vana va mina a va ri evutirhelini bya nkarhi hinkwawo, a ndzi tivutisa loko va ta boheka ku tshika vutirheli lebyi leswaku va langutana ni vutihlamuleri lebyi khumbaka timali. Hambiswiritano, Mark u swi kotile ku kuma ntirho lowu hi tinhweti tinharhu ntsena, wu pfuneke ku hakela to tala ta timali leti a ti laveka. Hikwalaho, hinkwavo va kote ku ya emahlweni ni vutirheli bya nkarhi hinkwawo handle ka mina ni nsati wa mina.

Madzana ya makhadi ni mapapila lama humaka eka matiko ya tsevu a ma namekiwe ekhumbini ra kamara ra mina ra le xibedlhele. Yehovha a a ndzi tiyisa hakunene. Vandlha na rona ri pfunetile hi ku lunghiselela ndyangu wa mina swakudya ku ringana tin’hweti ta ntlhanu ni hafu loko ndza ha ri ekamareni ra lava vutomi bya vona byi nga phulaniphulani le xibedlhele. Siku ni siku nkulu wa Mukreste a a tshama ndzhenga hinkwawo na mina a ndzi hlayela Bibele ni tibuku ta Bibele ni ku ndzi rungulela mintokoto leyi khutazaka. Swirho swimbirhi swa le ndyangwini a swi lunghiselela nhlangano wun’wana ni wun’wana wa vandlha na mina kutani a ndzi kalanga ndzi nga lahlekeriwa hi swakudya swa nkoka swa moya.

Loko ndza ha ri exibedlhele ku endliwe malunghiselelo ya leswaku ndzi ya enongonokweni wa siku ra nhlengeletano yo hlawuleka. Vatirhi va le xibedlhele va hlele leswaku ku va ni muongori loyi a swi dyondzeleke ni loyi a dyondzeleke swa ku hefemurisa munhu leswaku va famba na mina siku hinkwaro. A ku ri ntsako ku tlhela ndzi hlangana ni vamakwerhu va Vakreste! A ndzi va rivali vamakwerhu  va madzana lava ndzi va voneke va fole layini va rindzele ku ta ndzi xeweta.

Ku Hlayisa Xiyimo Xa Moya

Kwalomu ka lembe endzhaku ka khombo ra mina, ndzi kote ku tlhelela ekaya hambileswi a ndza ha lava nkhathalelo wa siku hinkwaro. Movha lowu lunghiseleriweke mina hi ku kongoma wu ndzi pfuna ku ya eminhlanganweni, leyi ndzi nga taliki ku xwa eka yona. Hambiswiritano, loko hi vula ntiyiso, swi lava ku tiyimisela leswaku munhu a ya eminhlanganweni. Ku sukela loko ndzi vuye ekaya ndzi swi kotile ku ya emintsombanweni ya muganga hinkwayo.

Eku heteleleni, hi February 1997, ndzi tlhele ndzi kota ku vulavulanyana. Van’wana va vaongori va mina va tsakela ku yingisela loko ndzi va rungulela ntshembo wa mina lowu sekeriweke eBibeleni. Muongori un’wana u ndzi hlayele buku hinkwayo leyi nge Timbhoni ta Yehovha—I Vahuweleri va Mfumo Wa Xikwembu ni tibuku tin’wana ta Watch Tower. Ndzi tsalelana ni vanhu hi ku thayipa hi nhonga eka khompyuta. Hambileswi ku tsala hi ndlela leyi swi karharisaka swinene swa vuyerisa ku hambeta ndzi hlanganyela entirhweni wa nsimu.

Ndzi karhatiwa swinene hi xitlhavi xa le nsiheni. Kambe ndzi twa onge swa antswa loko ndzi avelana ni van’wana ntiyiso wa Bibele kumbe ndzi hlayeriwa wona. Minkarhi yin’wana ndzi endla ntirho wa le xitarateni ni nsati wa mina la ndzi pfunaka swinene, loyi a ndzi pfunaka loko ndzi lava mpfuno. Minkarhi yo hlayanyana ndzi kote ku tirha tanihi phayona ra nkarhinyana. Ku va ndzi ri nkulu la nga Mukreste swi ndzi tisela ntsako, ngopfu-ngopfu loko vamakwerhu va ta eka mina eminhlanganweni kumbe va ndzi endzela ekaya kutani ndzi kota ku va pfuna ni ku va khutaza.

Ndzi fanele ndzi pfumela leswaku swa olova leswaku ndzi va ni ntshikilelo. Kutani loko ndzi titwa ndzi hlaseriwa hi ntshikilelo, hi xihatla ndzi khongelela leswaku ndzi va ni ntsako. Vusiku ni nhlikanhi ndzi khongelela leswaku Yehovha a hambeta a ndzi pfuna. Ku kuma papila kumbe ku endzeriwa minkarhi hinkwayo swi ndzi endla ndzi tsaka. Ku hlaya timagazini ta Xihondzo xo Rindza kumbe Xalamuka! na swona swi tata mianakanyo ya mina hi swilo leswi akaka. Vaongori vo hambana-hambana minkarhi yin’wana va ndzi hlayela timagazini leti. Ku sukela loko ndzi kume mhangu leyi, ndzi yingisele ku hlayiwa ka Bibele hinkwayo eka tikhasete minkarhi ya nkombo. Leti hi tin’wana ta tindlela to hambana-hambana leti Yehovha a ndzi tiyiseke ha tona.—Pisalema 41:3.

Ku cinca ka swiyimo swi ndzi nyike nkarhi wo tala wo anakanyisisa hi ndlela leyi Mudyondzisi wa hina Lonkulu, Yehovha a hi dyondzisaka ha yona leswaku hi kuma vutomi. U hi nyika vutivi lebyi kongomeke malunghana ni ku rhandza ka yena ni xikongomelo xa yena, vutirheli lebyi nga ni xikongomelo, ndzayo eka xihundla xa ntsako endyangwini ni ku kota ku twisisa leswaku u nga endla yini loko u langutane ni maxangu. Yehovha u ndzi katekise hi wansati la tshembekaka a tlhela a va lonene. Ni vana va mina na vona va ndzi seketerile hi ku tshembeka naswona swa ndzi tsakisa leswaku hinkwavo va hlanganyerile evutirhelini bya nkarhi hinkwawo. Entiyisweni hi March 11, 2000, jaha ra hina Mark ni nsati wakwe, Allyson va thwasile entlaweni wa vu-108 wa Xikolo xa Gilead naswona va averiwe eNicaragua. Mina ni nsati wa mina hi swi kotile ku va kona loko va thwasa. Ku vula ntiyiso maxangu ma cince vutomi bya mina, hayi mbilu ya mina.—Pisalema 127:3, 4.

Ndzi khensa Yehovha hi vutlhari lebyi a ndzi nyikeke byona leswaku ndzi kota ku hundzisela eka ndyangu wa mina ndzhaka ya swa moya leyi ndzi yi kumeke. Ndzi tiyisiwile ni ku khutaziwa hi ku vona vana va mina va tirhela Muvumbi wa vona hi ndlela leyi fanaka ni ya tata wa mina la nga te, “A hi nge swi pfuketani hi tshika. Yehovha u hi lerise ku chumayela.” Hakunene Yehovha u ndzi tiyisile ni ndyangu wa mina masiku hinkwawo.

Xifaniso eka tluka 24]

Ndzi ri na Tatana, vabuti wa mina na sesi wa mina, hi ri ekusuhi ni yindlu leyi nga ni mavhilwa leyi a hi yi tirhisa loko ha ha phayona. Mina ndzi le xineneni

[Xifaniso eka tluka 26]

Ndzi ri ni nsati wa mina, Myrna

[Xifaniso eka tluka 26]

Xifaniso xa sweswinyana xa ndyangu wa hina

[Xifaniso eka tluka  27]

Ndza ha chumayela hi ku tsala mapapila