Vuhandzuri Lebyi Ku Nga Tirhisiki Ngati “Goza Lerikulu Ra Vutshunguri”

EHANSI ka nhloko-mhaka leyi nge “Vuhandzuri ‘Lebyi Ku Nga Tirhisiki Ngati,’” magazini wa Maclean’s wu vike leswaku madokodela ya le Canada hinkwaro a ma ri karhi ma “ndlandlamuxa maendlelo lamantshwa, lawa eka malembe ya ntlhanu lama hundzeke, ma hundzuleke leswi vuriwaka vuhandzuri lebyi ku nga tirhisiki ngati byi va goza lerikulu ra vutshunguri.” Brian Muirhead, mutivi wa ku titivata wa le Winnipeg’s Health Sciences Centre, hi un’wana wa vona. I yini lexi n’wi susumeteleke ku lava tindlela tin’wana ta vutshunguri leti ku nga tirhisiki ngati?

Hi 1986, Dok. Muirhead u sungule ntlhontlho wa ku handzula wanuna la nga ni malembe ya 70 hi vukhale loyi a a ri ni xilondza lexi pfempfaka ngati, loyi hikwalaho ka ripfumelo ra yena leri sekeriweke eBibeleni naswona a nga Mbhoni ya Yehovha, a kombeleke ku tshunguriwa handle ko pomperiwa ngati. (Mintirho 15:28, 29) Magazini wa Maclean’s wu vike leswaku, Dok. Muirhead “u tirhise endlelo leri nga taliki ku tirhisiwa ra ku pompela saline solution eka muvabyi leswaku nsusumeto wa yena wa ngati wu tshama wu ri ehenhla. Endlelo rolero ri tirhile, naswona ri tiyise ripfumelo leri kulaka ra Muirhead ra leswaku ‘a hi pompela ngati eka vanhu ku tlula mpimo. Ndzi anakanye leswaku a wu ri nkarhi wa ku lava swikhomela-ndhawu.’”

Torha ra vuhandzuri lebyi ku nga tirhisiki ngati ri “kuceteriwe hi ku karhateka malunghana ni mphakelo wa ngati leyi nga ta nyikeriwa enkarhini lowu taka—ni hi ku chava ka vavabyi vo tala ko khomiwa hi xitsongwatsongwana xa vuvabyi lexi vangiweke hi mpompelo wa ngati.” Hi ku pfuniwa hi ndzavisiso wa madokodela lama lavaka tindlela letintshwa, a ku vuyeriwi Timbhoni ta Yehovha ntsena kambe ku vuyeriwe ni van’wana vo tala. Magazini wa Maclean’s wu ri: “Handle ko herisa xilaveko xa mpompelo wa ngati minkarhi yo tala, vuhandzuri lebyi pfumalaka ngati byi hunguta khombo—ku nga khathariseki leswaku i ritsongo ku fikela kwihi—ra ku tluleriwa hi mavabyi lama humaka eka ngati leyi nga basangiki.” Kambe ni ngati leyi “baseke” yi nga vanga khombo ra ku tshikileriwa ka xinkarhana ka fambiselo ra muvabyi ra nsawutiso.

I yini lexi susumetaka ripfumelo leri tiyeke ra Timbhoni ta Yehovha malunghana ni xikhomela-ndhawu lexi nga riki na ngati? U nga ha tsakela ku hlaya broxara leyi nge Xana Ngati Yi Nga Byi Ponisa Njhani Vutomi Bya Wena? Timbhoni ta Yehovha ti ta tsakela ku ku nyika yona.