Xana U Nga Va Ni Ntsako Wa Xiviri?

GEORGE a a pfuxela un’wana ni un’wana a ri karhi a n’wayitela. Eka yena vutomi a ku ri nyiko ya risima leyi faneriwaka hi ku tsakeriwa. A tiviwa a ri munhu la tshamaka a tsakile—hambi loko se a sungule ku karhatiwa hi switlhavi swa vudyuhari. George a a tiveka a ri munhu la tshama a tsakile, kukondza a fa. Xana na wena u tsakile ku fana na George? Xana u languta siku rin’wana ni rin’wana lerintshwa tanihi nyiko leyi faneleke yi tsakeriwa? Kumbe ku langutela siku leri landzelaka swi ku endla u nga tsaki kumbe u fikela hi ku chava? Xana ku ni lexi ku endlaka u nga tsaki?

Ntsako wu hlamuseriwa tanihi xiyimo xa vuhlayiseki lebyi tshamaka hi masiku. Wu hlanganisa ku titwa u enerisekile, u tsakile swinene naswona u ri ni ku navela ka ntumbuluko ka leswaku u tshama u ri eka xiyimo xexo. Xana ntsako wa muxaka wo tano wu kona?

Namuntlha, misava yi kandziyisa mavonelo ya leswaku vanhu a va ta tsaka loko ntsena a va fuwile. Timiliyoni a ti byi phahi hikwalaho ko lwela ku va lava fuweke. Hi ku endla tano, vo tala va lan’wa ni vuxaka bya vona ni van’wana ni swilo swin’wana swa nkoka evuton’wini. Ku fana ni vusokoti lebyi nga etshukeni ra byona, va tshama va ri eku tsutsumeni naswona a va na wona nkarhi wo ehleketa hi leswi va swi endlaka kumbe ku va ni nkarhi wa vona vini. Hikwalaho, hi ku ya hi xiviko xa Los Angeles Times “nhlayo ya vanhu lava kumiwaka va ri ni ntshikilelo loko va kamberiwa yi ya yi kula, naswona nhlayo ya lava va khomiwaka hi [ntshikilelo] va ha ri vatsongo ya andza. . . . Swidzidzirisi swo tshungula ntshikilelo hi swona swi xaviwaka ngopfu eka tikhampani to endla swidzidzirisi.” Timiliyoni ti dya swidzidzirisi leswi nga riki enawini kumbe ti ringeta ku huhata swiphiqo swa tona hi xihoko. Van’wana loko va titwa va tshikilelekile, va heta nkarhi wo tala  va ri eku xaveni. The Guardian, ku nga phepha-hungu ra le Britain ri vula leswaku eka nkambisiso wun’wana, “vavasati hi vona va kumekaka va tipete eku tisuseni ka ntshikilelo hi ku xava swilo. Va talela ngopfu eku xaveni loko va tshikilelekile ku tlula vavanuna.”

Hambiswiritano, ntsako wa xiviri a wu kumeki exitolo, ebodlheleni, ephilisini, enayitini kumbe eka akhawunti ya le bankini. Ntsako a wu xavisiwi; wu kumiwa mahala. Xana nyiko ya muxaka lowu ya risima hi nga yi kuma kwihi? Hi ta vulavula hi sweswo exihlokweni lexi landzelaka.