Xana Lowu Wu Nga Va Ntirho Wa Wena Lowunene?

LOKO u ri Mukreste la khuvuriweke, handle ko kanakana ku rhandza Xikwembu ku ku susumetela ku endla ku rhandza ka xona. Tlhandlakambirhi, vutirheli byi fanele byi va ntirho wa wena hakunene. Phela, Yesu Kreste u lerise valandzeri va yena hinkwavo ku endla vadyondzisiwa. (Matewu 28:19, 20) Ina, u nga ha va u tirha ntirho wo tihanyisa. Kambe tanihi mulandzeri wa Yesu ni leswi u nga Mbhoni ya Yehovha, xa nkoka swinene u mutirheli la nga Mukreste—la rhangisaka ntirho wa ku chumayela hi Mfumo evuton’wini.—Matewu 24:14.

Kumbexana se u le kusuhi ni ku heta malembe ya kondlo-a-ndzi-dyi kumbe u ya kwalomu ka malembe ya va-20. Kumbexana, u tshame u ehleketa swinene hi leswaku u ta teka ndlela yihi evuton’wini. Loko u pima leswi u nga swi hlawulaka, ku tienerisa hi xitalo hi kona ku taka emahlweni.

Kutani twana leswaku Jørgen wa le Denmark u ri yini malunghana ni nhlawulo lowu a wu endleke. Jørgen u yi hlamusela tanihi “ndlela leyinene yo hanya laha u nga nyikelaka nyingiso eka ntirho wa nkoka swinene.” Eva, wansati wa malembe ya 31 wa le Grikiya u ri: “Loko ndzi pimanisa vutomi bya mina ni bya tintangha ta mina, nkarhi na nkarhi ndzi gimeta hi ku vula leswaku byi fuwile, byi ni xikongomelo naswona bya tsakisa swinene.” Xana hi wihi ntirho lowu wu tisaka ku eneriseka ko tano? Xana vutomi byo tano u nga byi fikelela njhani?

Xana Xikwembu Xa Ku Kongomisa?

Ku hlawula ntirho swi nga ha tika. Entiyisweni, van’wana va nga ha navela onge Xikwembu xi nga va komba hi ku kongoma leswi xi lavaka va swi endla.

Loko Muxe a ri eMidiyani, Yehovha u n’wi kongomisile leswaku a tlhelela aEgipta ivi a rhangela Vaisrayele va huma evuhlongeni. (Eksoda 3:1-10) Ntsumi ya Xikwembu yi humelele eka Gidiyoni, loyi a a hlawuriwe ku ponisa Israyele eku xanisiweni. (Vaavanyisi 6:11-14) Davhida a a ri karhi a risa tinyimpfu loko Xikwembu xi byela Samuwele ku n’wi tota tanihi hosi ya Israyele leyi nga ta landzela. (1 Samuwele 16:1-13) Namuntlha a hi kongomisiwi hi tindlela toleto. Ematshan’weni ya sweswo hi fanele hi anakanyisisa hi timhaka ta hina kutani hi endla xiboho leswaku hi ta byi tirhisa njhani vuswikoti bya hina lebyi hi nyikiweke hi Xikwembu.

Yehovha u pfulele vantshwa lava nga Vakreste namuntlha “nyangwa leyikulu leyi yisaka entirhweni.” (1 Vakorinto 16:9) Njhani? Eka khume ra malembe lama hundzeke nhlayo ya vahuweleri va Mfumo yi andze yi suka eka ku tlula 2 125 000 yi ya eka ku tlula 6 000 000 emisaveni hinkwayo. Xana i vamani lava pfunetaka ku humesa timiliyoni ta Tibibele, tibuku, tibroxara, timagazini ni swiphephana leswi lavekaka leswaku hi wundliwa hi tlhelo ra moya ni le ntirhweni wa misava hinkwayo wo chumayela mahungu lamanene? Lunghelo leri ra nkoka ri tsakeriwa hi swirho swa ndyangu wa Bethele swa misava hinkwayo.

Vutomi Lebyi Vuyerisaka

Rito Bethele, swi vula “Yindlu ya Xikwembu,” naswona makaya ya Bethele i tindhawu leti ku tshamaka Vakreste lava tirhaka hi ku tirhandzela va tirha eyindlu-nkulu ni le tihofisini ta marhavi ta Sosayiti ya Watch Tower. (Genesa 28:19, nhlamuselo ya le hansi ya NW) Mindyangu ya namuntlha ya Bethele yi nga ha fanisiwa ni ‘mindyangu leyi hlelekeke kahle leyi akiweke hi vutlhari’ ni leyi sekeriweke erirhandzwini ra Yehovha.—Swivuriso 24:3.

Xana ku nga vuriwa yini hi xiyimo lexi fanaka ni xa ndyangu lexi nga eBethele? Xirho xa ndyangu wa Bethele wa le Estonia lexi nga ni malembe ya 25 hi vukhale xi ri: “Ndzi tsakela ku va exikarhi ka vanghana va Yehovha nkarhi hinkwawo. Lowu  ka ha ri nchumu wa nkoka swinene eka mina eBethele.”—Pisalema 15:1, 2.

Emisaveni hinkwayo, vanhu va kwalomu ka 19 500 sweswi va tiphina hi lunghelo ra ku tirha eBethele. (Pisalema 110:3) Le United States tiphesente ta 46 ta lava nga eBethele va le xikarhi ka malembe ya 19 na 29. Ku fana na Esaya va te: “Hi mina loyi! Ndzi rhume.” (Esaya 6:8) Esaya—loyi se a tinyiketele eka Yehovha—a a amukela lunghelo leri engetelekeke ra ntirho. Handle ko kanakana leswi a swi vula ku titsona leswi a a ta vuyeriwa hi swona. Lava nga le vutirhelini bya Bethele va siya makaya ya vona ni tindhawu leti va ti toloveleke ku katsa na vamanana, vatatana, vabuti, vasesi ni vanghana. Ku titsona ko tano ku endliwa hi ku swi rhandza “hikwalaho ka mahungu lamanene.”—Marka 10:29, 30.

Mayana mikateko ya moya leyi nga le Bethele! Xirho lexitsongo xa ndyangu wa Bethele wa le Rhaxiya xi ri: “Hi ku tinyiketela ka hina, hi nga dyondza swo tala leswi nga ta hi pfuna ku hanya emisaveni leyintshwa. Emhakeni ya mina ndzi nga vula leswaku mikateko ya Yehovha i yikulu swinene ku tlula leswi ndzi titsoneke swona.”—Malakiya 3:10.

Vutomi Bya Le Bethele

Xana vutomi bya le Bethele byi njhani? Swirho swa ndyangu wa Bethele swa pfumela leswaku i byinene naswona bya enerisa hambi ku ri ku tsakisa. Jens, la nga ni malembe ya 43 hi vukhale u tsakela vutirheli bya le Bethele. Hikwalaho ka yini? U ri: “Hikuva hi titwa hi ri xiphemu lexikulu xa matshalatshala lama endliwaka yo hetisisa ntirho wa nkoka. Ndzi kota ku vona xikongomelo ni nkoka wa ntirho wa Yehovha.”

Ku sukela hi Musumbhunuku ku fika hi Mugqivela, eBethele siku ri sungula hi ndzimana ya siku. Leri i bulo ra Bibele, leri rhangelaka hi nkulu la nga ni ntokoto. Nimadyambu hi Musumbhunuku ku hetiwa awara ku dyondziwa Bibele tanihi ndyangu hi mpfuno wa Xihondzo xo Rindza, minkarhi yin’wana xi landzeriwa hi nkulumo leyi sekeriweke exihlokweni xa Matsalwa lexi ngopfu-ngopfu xi fanelaka ndyangu wa Bethele.

Xana ku endleka yini loko munhu a ha ku fika eBethele? Leswaku ku tolovetiwa swirho leswintshwa eka vutomi bya Bethele, vamakwerhu lava wupfeke va ndyangu lowu va nyikela tinkulumo leti vulavulaka hi swiphemu swo hambana-hambana swa ntirho wa Bethele. Xirho lexintshwa xa ndyangu wa Bethele xi nghena xikolo xa xiyimo xa le henhla vhiki ni vhiki, ku ringana mavhiki yo hlayanyana eka lembe ro sungula, lexi lunghiseleriweke ku kurisa ku twisisa ka xona Matsalwa. Lava ha ku fikaka va tlhela va tsakela lunghiselelo ro hlawuleka ro hlaya Bibele. Swirho leswintshwa swa ndyangu swi hlaya Bibele hinkwayo hi lembe ra swona ro sungula ra ntirho wa Bethele.

Xana vuyelo bya ndzetelo lowu hinkwawo hi byihi? Joshua, xirho xa ndyangu wa Bethele wa le Hong Kong, la nga ni malembe ya 33 hi vukhale, u ri: “Bethele yi dzikise ku tlangela ka mina Yehovha. Ndzi kota ku tihlanganisa ni vamakwerhu lava nga ni ntokoto lava heteke malembe ya vona yo tala va tirhela Yehovha. Ngopfu-ngopfu ndzi tsakela lunghiselelo ra swa moya, ro fana ni ndzimana ya siku ni Dyondzo ya ndyangu ya Xihondzo xo Rindza. Ku tlhandlekela kwalaho, ndzi rhandza ndlela leyi ku hlelekeke ha yona ni vutomi byo olova lebyi hanyiwaka kona. Leswi swi ndzi ntshunxa eku karhatekeni loku nga fanelangiki. Ndzi tlhele ndzi dyondza ku langutana ni swiyimo hi ndlela ya Vukreste naswona leswi nkarhi hinkwawo swi tikombe swi pfuna.”

Swirho swa ndyangu wa Bethele swi heta nkarhi wa swona wo tala ni matimba swi endla leswi swi teleke ku ta pfuneta ha swona. Leswi swi vula ku tirhisa matimba ni mianakanyo ya swona eswiavelweni leswi swi nyikiweke swona eBethele. Ku ni swilo swo tala swo hambana-hambana leswi faneleke swi endliwa. Van’wana va tirhisa michini yo kandziyisa kumbe va tirha laha ku hlanganisiwaka tibuku kona, ivi ti rhumeriwa emavandlheni yo tala. Van’wana va tirha ekhixini, endlwini yo dyela ka yona kumbe laha ku hlantswiwaka kona swiambalo. Swiavelo swin’wana i ku basisa, ntirho wa le purasini, ntirho wo aka ni swin’wana. Van’wana va tirha ku khathalela switirho eka tindzawulo leti. Van’wana va khathalela rihanyo kumbe va endla ntirho wa le hofisini. Mintirho hinkwayo ya le Bethele yi ni mintlhontlho leyi tsakisaka naswona ya vuyerisa swinene. Ntirho lowu endliwaka eBethele wa enerisa hakunene hikuva wu kondletela timhaka ta Mfumo  naswona wu endliwa hikwalaho ko rhandza Xikwembu.

Swirho swa ndyangu wa Bethele swi averiwa emavandlheni, laha swi fikaka swi tivonela vuyelo bya ntirho wa swona. Swi tsakela ku hlanganyela minhlangano ya vandlha ni ku hlanganyela entirhweni wo chumayela. Hikwalaho ka sweswo, swirho swa ndyangu wa Bethele swi ni vuxaka lebyikulu ni vamakwavo va xinuna ni va xisati emavandlheni ya le kusuhi.—Marka 10:29, 30.

Rita, xirho xa ndyangu wa Bethele wa le Britain xi ri: “Vandlha ra ndzi tsakisa! Swi tiyisa ripfumelo ra mina swinene, loko ndzi ri eminhlanganweni ni le vutirhelini, ngopfu-ngopfu loko ndzi vona vamakwerhu, vana ni lava kuleke va ri kona! Ku nga khathariseki leswaku ku njhani, va tshama va ri kona. Sweswo swi ndzi pfuna leswaku ndzi hiseka swinene entirhweni wa mina wa le Bethele.”

EBethele a ko tirhiwa, ku yiwa eminhlanganweni, ku yiwa evutirhelini bya nsimu ku tlhela ku dyondziwa ntsena. Ndyangu wu tsakela ni minkarhi ya ku tihungasa. Nkarhi na nkarhi, ku ni malunghiselelo lama vuyerisaka hi tlhelo ra moya ya “Siku ra Ndyangu ra ku Titsakisa,” hi siku rero ku tiphiniwa hi vuswikoti bya vo tala ni ku dyondza swilo leswi khutazaka malunghana ni vutomi bya van’wana lava tirhaka eBethele. Lexi tsakisaka nakambe, i ku endzelana lokunene ka xinghana loku akaka. Ku nga ha va ni tindhawu to hungasa ka tona ku katsa ni tilayiburari to hlayela eka tona ni ku endla nkambisiso. Xin’wana xa nkoka i mabulo lama tsakisaka ematafuleni hi nkarhi wa swakudya.

Tom, xirho xa ndyangu wa Bethele le Estonia u ri: “Ekusuhi ni le Bethele ku ni lwandle naswona ekusuhi na rona ku ni khwati ro saseka, laha mina ni nsati wa mina hi tsakelaka ku famba-famba eka rona. Minkarhi yin’wana ndzi tlanga galufu, khororo ni thenisi ni vanghana va le vandlheni ni va le Bethele. Loko maxelo ma ri manene, hi ya hi ya tlanga hi swikanyakanya.”

Xana U Nga Endla Yini Leswaku U Fanelekela Ku Ya Kona?

Kunene, Bethele i ndhawu leyi Vakreste lava wupfeke va endlelaka Yehovha ntirho wo kwetsima  naswona va tirhelaka vapfumeri-kulobye emisaveni hinkwayo. Lava va vaka swirho swa ndyangu wa Bethele va fanele va fikelela timfanelo to karhi. Xana u nga endla yini leswaku u fanelekela ntirho wa le Bethele?

Ku fana na Timotiya, la tirheke na muapostola Pawulo, lava amukeriwaka leswaku va ya tirha eBethele va fanele va va ni xiyimo lexinene evandlheni. (1 Timotiya 1:1) Timotiya “a ku vulavuriwa kahle ha yena hi vamakwavo va le Listra ni le Ikoniya.” (Mintirho 16:2) Hambileswi a ri ntsongo, Timotiya a a ma tiva Matsalwa naswona a a tiyile entiyisweni. (2 Timotiya 3:14, 15) Hilaha ku fanaka, lava va nghenelaka ntirho wa Bethele va languteriwe leswaku va va ni vutivi bya Bibele.

Swirho swa ndyangu wa Bethele swi fanele swi va ni moya wo tinyiketela. Timotiya u kombise moya wo tinyiketela ni wo rhandza ku rhangisa swilaveko swa Mfumo eka swa yena lerova Pawulo a vula leswi ha yena: “A ndzi na un’wana la nga  ni mboyamelo wo fana ni wa yena loyi a nga ta swi khathalela hakunene swilo leswi khumbaka n’wina. Hikuva lavan’wana hinkwavo va lava leswi vuyerisaka vona ntsena, ku nga ri swa Kreste Yesu. Kambe ma xi tiva xitiyisekiso lexi a xi nyikeleke hi yexe, leswaku ku fana ni n’wana na tatana u tirhe na mina ku yisa mahungu lamanene emahlweni.”—Vafilipiya 2:20-22.

Ntirho wa le Bethele wu lava vavanuna ni vavasati va moya. Malunghiselelo lama endleriweke swirho swa Bethele ma endla leswaku swi kula hi tlhelo ra moya hi ku dyondza Bibele, hi ku va kona nkarhi na nkarhi eminhlanganweni ya Vukreste ni le vutirhelini bya nsimu ni ku va ni vanghana va Vakreste lava wupfeke. Hikwalaho lava va nga le Bethele va pfuniwa ku landzela ndzayo ya Pawulo leyi nge: “Hambetani mi famba evun’weni na [Kreste Yesu], mi dzima timitsu ni ku akiwa eka yena ni ku tiyisiwa eripfumelweni, hilaha mi dyondzisiweke hakona, mi khapakhapa ripfumelo hi ku nkhensa.”—Vakolosa 2:6, 7.

Hikwalaho ka muxaka wa ntirho wa le Bethele, lava va amukeriwaka eka lunghelo leri ra ntirho va fanele va va va tiyile emirini naswona va ri ni rihanyo lerinene. Loko u fikelela timfanelo leti hi ti vuleke, u ri ni malembe ya 19 kumbe ku tlula naswona se u ri ni lembe u khuvuriwile, hi ku khutaza leswaku u ehleketa hi ntirho wa Bethele.

Hinkwerhu Hi Ni Xiphemu

Kunene, tanihi Vakreste hinkwerhu hi navela ku rhangisa swilaveko swa Mfumo evuton’wini ni ku tirhela Yehovha hi mbilu hinkwayo. (Matewu 6:33; Vakolosa 3:23) Hi nga tlhela hi khutaza lava tirhaka eBethele ku hambeta va endla ntirho wo kwetsima kwalaho. Naswona ngopfu-ngopfu vamakwerhu lava ha riki vantshwa lava fanelekelaka ntirho wa Bethele va fanele va khutaziwa leswaku va fikelela lunghelo leri ra nkoka.

Ntirho wa le Bethele i ndlela yo hanya leyi enerisaka hi tlhelo ra moya—leyi nga vaka ntirho wa wena lowunene hakunene. Nick la sunguleke ku tirha eBethele a ri ni malembe ya 20 u teke ndlela yoleyo. Endzhaku ka malembe ya khume a ri entirhweni wa Bethele u ri: “Hakanyingi ndzi khongela eka Yehovha ndzi n’wi khensa hi tintswalo ta yena leti nga ndzi faneriki. Xana i yini leswi engetelekeke leswi ndzi nga swi kombelaka? Laha hi rhendzeriwe hi Vakreste lava tshembekaka lava endlaka leswi va nga swi kotaka ku tirhela Yehovha.”

[Bokisi/Xifaniso eka tluka 22]

XANA VAKULU NI VATSWARI VA NGA ENDLA YINI?

Ngopfu-ngopfu vakulu ni valanguteri lava famba-fambaka va fanele va khutaza majaha ku endla xikombelo xa le Bethele. Nkambisiso wa sweswinyana lowu endliweke eka swirho leswa ha riki swintshwa swa le Bethele wu kombise leswaku 34 wa tiphesente ta swona ti khutaziwe hi valanguteri va Vakreste leswaku swi endla ntirho wa Bethele wu va pakani ya swona. Ina, va nga ha kumbukiwa hi mavandlha ya ka vona. Kambe i swinene ku tsundzuka leswaku loko Timotiya a ri karhi a khutaza moya lowunene eka vantshwa van’wana le Listra ni le Ikoniya, vakulu a va n’wi sivelanga leswaku a ya tirha na Pawulo. A va gimetanga hi leswaku loko Timotiya a ta famba na Pawulo swi ta vangela leswaku vandlha ri lahlekeriwa swinene.—1 Timotiya 4:14.

Ngopfu-ngopfu vatswari va Vakreste va fanele va va ni nkucetelo lowunene eka vana va vona emhakeni leyi. Eka nkambisiso lowu tshahiweke laha henhla, 40 wa tiphesente ta lava va vutisiweke va vule leswaku i vatswari va vona va nga xihlovo-nkulu xa xikhutazo xo nghenela ntirho wa Bethele. Makwerhu un’wana wa xisati loyi se a tirheke eBethele malembe yo hlaya u ri: “Vutomi bya vatswari va mina entirhweni wa Yehovha a ku ri xikhutazo lexikulu eka mina leswaku ndzi nghenela ntirho wa Bethele. Hi ku vona xikombiso xa vona evutirhelini bya nkarhi hinkwawo, ndzi swi tivile leswaku ku ta va ntirho lowunene ni lowu enerisaka swinene wo wu hlawula evuton’wini.”

[Bokisi eka tluka 24]

VA WU TLANGELA NTIRHO WA LE BETHELE

“Ndzi tlangela ntirho wa mina eBethele. Swa ndzi enerisa ku tiva leswaku ndzi tirhele Yehovha siku hinkwaro ni leswaku ndzi ta endla leswi fanaka mundzuku, mundlwana ni hi masiku. Leswi swi ndzi nyika ripfalo lerinene naswona swi tata mianakanyo ya mina hi swilo leswinene.”

“Bethele i ndhawu leyi u nga nyikelaka hi nkarhi wa wena hinkwawo ni matimba ya wena u tirhela Yehovha handle ko kavanyetiwa. Leswi swi tisa ku enerisaka ka le ndzeni. Kambe u nga tlhela u vona nhlengeletano ya Yehovha hi ndlela leyi hambaneke. U titwa u ri kusuhi ni xivindzi xa nhlengeletano naswona leswi swi endla swi tsakisa swinene.”

“Ku ta eBethele i nchumu wa nkoka swinene lowu nga si tshamaka wu endleka eka mina. Ku tshama ku ri eku dyondziweni ka swo karhi. Naswona laha dyondzo a hi yo tihluvukisa kambe yi endleriwa Yehovha. Laha ntirho wa mina wu nga ka wu nga hundzuki wa hava.”

“Ku tirhisa vuswikoti bya mina eBethele swi ndzi endla ndzi titwa ndzi enerisekile naswona ndzi ri ni ku rhula, hikuva swi tirhiseriwa Yehovha ni vamakwerhu.”

“A ndzi nga ku kumi ku eneriseka ka xiviri ni ntsako entirhweni wa mina wa khale. Malembe yo tala ndzi lorhe hi ku tirha ni vamakwerhu ni ku va tirhela. Hi yona mhaka ndzi teke eBethele. Swi ndzi enerisa swinene ku tiva leswaku matshalatshala ya mina hinkwawo ma ta dzunisa Yehovha ni ku vuyerisa van’wana hi tlhelo ra moya.”