Xana Vukhongeri Byi Ta Tisa Ku Rhula Ka Misava?

KU SUKELA hi ti 28 ta August ku fikela hi ti 31 ta August, 2000, vayimeri lava tlulaka 500 lava humaka ematikweni ya 73 va hlanganile le Dorobeni ra New York. Va hlengeletane emuakweni wa Nhlangano wa Matiko leswaku va va ni “Nhlengeletano Ya Ku Rhula Ka Misava Ka Gidi Ra Malembe Ya Varhangeri Va Vukhongeri Ni Va Swilo Swa Moya.” Varhangeri lava—lava vo tala va vona a va ambale swifunengeto swa nhloko, tinguvu to leha leti nga ni muvala wa xilamula, swifunengeto swa nhloko leswi endliweke hi voya, kumbe minkhancu yo leha ya ntima—a va yimele vukhongeri byo tala. Exikarhi ka vona a ku ri ni Mabaha’i, Mabudha, Mahindu, Maislamu, Majayini, Mashinto, Masikh, Matao, Mazoroaster, Vayuda ni vukhongeri bya Vujagana.

Vapfhumba lava va hlangane emuakweni wa Nhlangano wa Matiko eka masiku mambirhi yo sungula ya nhlengeletano ya masiku ya mune. Hambiswiritano, nhlengeletano leyi a yi nga hleriwanga hi Nhlangano wa Matiko kumbe ku hakeleriwa hi wona kambe sweswo a swi endliwe hi minhlangano yo hambana-hambana. Nilokoswiritano, Nhlangano wa Matiko swin’we ni varhangeri va vukhongeri va vulavule hi nkoka wa ku tirhisana leswaku va herisa vusweti, xihlawuhlawu, swiphiqo swa mbango, nyimpi ni matlhari lama nga yayarhelaka vanhu.

Vapfhumba lava va sayine tsalwa leri a ri tsariwe leswaku “Xiboho Xa Ku Rhula Ka Misava Hinkwayo.” Hambileswi va pfumeleke leswaku madzolonga ni nyimpi “minkarhi yin’wana swi endliwa evitweni ra vukhongeri,” tsalwa leri ri vule leswaku vanhu hinkwavo lava sayineke va ta “khomisana ni Nhlangano wa Matiko . . . leswaku va tisa ku rhula.” Hambiswiritano, a ku nga ri na swiboho swo karhi leswi kombisaka ndlela leyi leswi swi nga endliwaka ha yona.

Hi siku ra vumbirhi, Bawa Jain, matsalana jenerala wa nhlengeletano leyi, u gimete marito ya yena yo pfula hi ku hlamusela leswaku emalembeni ya le mahlweninyana u xiye xifaniso xo karhi eNhlanganweni wa Matiko. Xifaniso xa kona a xi ri xa wanuna la leheke ku tlula muako wa Tihofisi ta Nhlangano wa Matiko. A a ri karhi a gongondza emuakweni lowu onge hiloko a gongondza enyangweni. Ehansi ka xifaniso xolexo a ku ri ni marito lama nge: “Hosana ya ku Rhula.” Nkul. Jain u te: “[Xifaniso xolexo] xi ndzi khumbe swinene loko ndzi xi vona. Ndzi vutise vanhu vo tala malunghana ni nhlamuselo ya [xona]. Ndza tshemba leswaku se ndzi kume nhlamulo namuntlha. Ku hlengeletana ka n’wina hinkwenu laha, varhangeri va moya ni va vukhongeri bya misava, swi ndzi kombisa leswaku [leyi] i hosana ya ku rhula leyi gongondzaka enyangweni ya Nhlangano wa Matiko.”

Bibele yona yi nyikela langutelo leri hambaneke. Yi kombisa leswaku Hosana ya ku Rhula i Yesu Kreste. U ta tisa ku rhula emisaveni hinkwayo, ku nga ri hi ku tirhisa varhangeri va misava va tipolitiki kumbe va vukhongeri, kambe hi ku tirhisa Mfumo wa Xikwembu. Hi wona Mfumo lowu—hulumendhe ya Xikwembu ya le tilweni—lowu wu nga ta kota ku hlanganisa vanhu lava yingisaka naswona wu ta endla leswaku ku rhandza ka Xikwembu ku endliwa emisaveni.—Esaya 9:6; Matewu 6:9, 10.