Xiviko Xa Vahuweleri Va Mfumo

Indiya—“Vun’we Bya Tinxaka To Hambana”

“VUN’WE Bya Tinxaka To Hambana” i marito yo thopa lama dumeke ya ku hlamusela vun’we bya vanhu va tinxaka ta le Indiya. A hi matlangwana ku tisa vun’we etikweni leri lerikulu ra vanhu va mindhavuko, tindzimi, vukhongeri, tinxaka, maambalelo ni swakudya swo hambana-hambana. Kambe, vun’we byo tano byi kona ehofisini ya vukongomisi ya Timbhoni ta Yehovha le Indiya, hambileswi vatirhi va ku tirhandzela lava va tirhaka ni ku tshama kwalaho va humaka eswifundzeni swo tala ni le tindhawini tin’wana leti lawuriwaka hi hulumendhe va tlhela va vulavula tindzimi to hlaya.

• Hi ku tivisa Rajrani—ntombhi leyi humaka ePunjab, empfungwe wa n’walungu-vupela-dyambu bya Indiya. Loko Rajrani a ha ri exikolweni, un’wana wa vana lava a a ri na vona etlilasini yin’we u sungule ku dyondza Bibele ni Timbhoni ta Yehovha. Nhwanyana loyi u ringete ku kokela Rajrani eBibeleni. Tanihi leswi nhwanyana loyi a a nga xi tivi kahle Xinghezi naswona Xihondzo xo Rindza a xi nga kumeki hi Xipunjabi hi nkarhi wolowo, u tlhele a kombela Rajrani leswaku a n’wi hundzuluxelela swihloko leswi nga endzeni ka magazini lowu. Leswi Rajrani a swi hlayeke eka Xihondzo xo Rindza swi sungule ku n’wi khumba swinene lerova hambiloko vatswari vakwe va n’wi kaneta, u endle nhluvuko ku kondza a nyikela vutomi byakwe eka Yehovha Xikwembu. Namuntlha u tirha eBethele ya le Indiya, u endla wona ntirho lowu n’wi pfuleke mahlo a vona ntiyiso. U hundzuluxela minkandziyiso ya Vukreste hi Xipunjabi!

• Nakambe ehleketa hi Bijoe, loyi a humaka exiyengeni xin’wana xa Indiya—xifundza xa le dzonga-vupela-dyambu xa Kerala. Bijoe u hlongoriwile exikolweni lexi tlakukeke hikwalaho ko hlayisa vukala-tlhelo hi nkarhi wa ku tlangela vutiko. Endzhaku ka nandzu lowu kaleke wu fika ehubyeni naswona vugandzeri byo tenga byi heteleleke byi hlula, Bijoe u tlhelele exikolweni. * U tlhele a ya ekholichi. Hambiswiritano, gandlati ra ku tikhoma loko biha ekholichi yoleyo ri karhate ripfalo rakwe, kutani u tshike xikolo endzhaku ka tin’hweti ti nga ri tingani to sungula. Sweswi, endzhaku ka malembe ya khume a ri eBethele, u titwa a vuyeriwile swinene hi ku va xirho xa ndyangu wa Bethele lowu nga ni vanhu vo hambana-hambana kambe va ri ni vun’we, ku tlula ndlela leyi a a ta vuyeriwa ha yona hi ku hlongorisa dyondzo leyi tlakukeke.

• Norma na Lily havambirhi va ni malembe lama tlulaka 70 hi vukhale naswona se va ni malembe va ri tinoni. Ha un’we wa vona u hete ku tlula 40 wa malembe entirhweni wa nkarhi hinkwawo. Lily se u ni malembe ya kwalomu ka 20 a ri karhi a tirha erhavini a ri muhundzuluxeri wa Xitamil. Norma u te eBethele malembe ya 13 lama nga hundza endzhaku ko feriwa hi nuna wa yena. Handle ko va swikombiso leswinene swa ku gingiriteka va tlhela va va vatirhi vo tshembheka, va endla leswaku ndyangu hinkwawo wa Bethele wu va na vun’we, hikwalaho ka moya lowu va nga na wona. Va rhandza ku va ni vaendzi, naswona va tsakela ku va ni vantshwa va ndyangu lowu, va va chumbutela mintsako ya malembe yo tala va ri Vakreste. Naswona vantshwa va endla leswi fanaka hi ku va rhambela etindlwini ta vona leswaku va ta va ni vunakulobye ni ku va pfuna hi swo karhi loko swi laveka. Mayana swikombiso leswinene swonghasi!

Hi ku va va hlule ku hambana loku vangaka madzolonga ni ku nga twanani etindhawini to tala, vatirhi lava va ku tirhandzela tanihi swirho swa ndyangu wa Bethele lowu nga ni vun’we eIndiya, va tirha swin’we hi ntsako leswaku va pfuna van’wana.—Pisalema 133:1.

[Nhlamuselo ya le hansi]

[Mfungho wa Vini va Xifaniso eka tluka 8]

Background: Mountain High Maps® Copyright © 1997 Digital Wisdom, Inc.