Mikateko Ya Mfumo Yi Nga Va Ya Wena

MUAPOSTOLA Pawulo la nga Mukreste a a ti vulavula kahle tindzimi to karhi ta le nkarhini wa yena. A ri ni dyondzo leyi ringanaka ni dyondzo ya le yunivhesiti namuntlha. A ri ni malunghelo ni timfanelo ta muaka-tiko wa le Rhoma. (Mintirho 21:37-40; 22:3, 28) A a ta va a swi kotile ku va xifumi ni ku va ni ndhuma. Kambe u te: “Swilo leswi veke mpindzulo eka mina, ndzi swi teke ku ri ku lahlekeriwa hikwalaho ka Kreste . . . naswona ndzi swi teka ku ri nhulu ya thyaka, leswaku ndzi kuma Kreste.” (Vafilipiya 3:7, 8) Hikwalaho ka yini Pawulo a vule marito lawa?

Khale ka loyi a tiviwaka a ri Sawulo wa le Tarso ni muxanisi wa “lava a a ta va kuma va ri va Ndlela,” Pawulo u hundzuke mupfumeri endzhaku ko kuma xivono xa Yesu la pfuxiweke ni la kwetsimisiweke. (Mintirho 9:1-19) Eka Pawulo, ntokoto lowu wa le ndleleni yo ya eDamaska, wu swi veke erivaleni eka yena leswaku Yesu a ri Mesiya la tshembisiweke kumbe Kreste, mufumi wa Mfumo lowu tshembisiweke. Kambe wu tlhele wu tisa ku cinca loku hlamarisaka emahanyelweni ya Pawulo, hilaha swi kombisiweke hakona hi marito ya yena lama nga ni matimba lama tshahiweke laha henhla. Hi marito man’wana, leswi mbilu ya yena a yi tshembekile, Pawulo u hundzukile.—Vagalatiya 1:13-16.

EBibeleni riendli leri nge “hundzuka” hakanyingi ri hundzuluxeriwa ri huma eka rito ra Xigriki  leri hi ku kongoma ri vulaka “ku tiva swilo endzhaku,” leri hambanaka na “ku tiva swilo ka ha ri emahlweni.” Xisweswo, ku hundzuka swi katsa ku cinca mianakanyo ya munhu, langutelo kumbe xikongomelo, ku cukumeta mikhuva ya khale tanihi leyi nga pfuniki nchumu. (Mintirho 3:19; Nhlavutelo 2:5) Pawulo a nga lo teka xiendlakalo xa le ndleleni yo ya eDamaska xi ri nchumu wo tsakisa ntsena kumbe ntokoto wa swilo swa moya. A swi n’wi xalamukisa leswaku mahanyelo ya yena ya khale, yo honisa Kreste, a ko va nyuku wa mbyana. Nakambe u swi xiyile leswaku loko a lava ku vuyeriwa hi vutivi lebyi a ha ku byi kuma malunghana na Kreste, u fanele ku endla swo kharhi ku lulamisa mahanyelo ya yena.—Varhoma 2:4; Vaefesa 4:24.

Ku Hundzuka Loku Tiseke Mikateko

Vutivi byo tala, lebyi Pawulo a ri na byona eku sunguleni mayelana ni Xikwembu u byi kume eka mpambukwa wa Vafarisi, lowu a ri xirho xa wona. Tidyondzo ta vona a ti katsa filosofi ya vanhu yo tala ni mindhavuko ya vanhu. Hikwalaho ka xihlawuhlawu xa vukhongeri, ku hiseka ka Pawulo ni matshalatshala ya yena a swi hoxile. Hambileswi a a ehleketa leswaku u tirhela Xikwembu, kahle-kahle a lwisana na xona.—Vafilipiya 3:5, 6.

Endzhaku ko kuma vutivi lebyi kongomeke malunghana na Kreste ni ntirho wa yena exikongomelweni xa Xikwembu, Pawulo u swi lemukile leswaku a fanele a hlawula: Xana a fanele a hambeta a ri Mufarisi kutani a hambeta a tsakela ku va ni xikhundla ni xindzhuti kumbe a fanele a cinca mahanyelo ya yena kutani a sungula ku endla xin’wana ni xin’wana lexi a xi laveka leswaku a amukeriwa hi Xikwembu? Lexi tsakisaka Pawulo u endle xiboho lexinene, hikuva u te: “A ndzi khomiwi hi tingana hi mahungu lamanene; entiyisweni, i matimba ya Xikwembu ya ku ponisa un’wana ni un’wana la nga ni ripfumelo, ku sungula hi Muyuda, ku ya ni le ka Mugriki.” (Varhoma 1:16) Pawulo u ve muchumayeri la hisekaka wa mahungu lamanene malunghana na Kreste ni Mfumo.

Endzhaku ka malembe yo hlaya, Pawulo u byele Vakreste-kulobye a ku: “A ndzi titeki se ndzi swi khomile; kambe ku ni xilo xin’we malunghana na swona: Ku rivala swilo swa le ndzhaku ni ku nava ndzi ya emahlweni eka swilo swa le mahlweni, ndzi lwela ku fikelela pakani ya hakelo ya ku vitaneriwa ehenhla hi Xikwembu hi ku tirhisa Kreste Yesu.” (Vafilipiya 3:13, 14) Pawulo u vuyeriwile hi mahungu lamanene hikuva u tshike leswi a swi n’wi hambukisa eka Xikwembu hi ku swi rhandza kutani a lava tipakani leti fambisanaka ni xikongomelo xa Xikwembu hi mbilu hinkwayo.

Xana A Wu Ta Endla Yini?

Kumbexana wa ha ku twa mahungu lamanene ya Mfumo. Xana ntshembo wo hanya hi laha ku nga heriki eparadeyisini leyi hetisekeke wa ku tsakisa? Swi fanerile ku titwa hi ndlela yoleyo, hikuva hinkwerhu hi ni ku navela loku hi tswariweke na kona ko hanya ni ku tsakela vutomi byo rhula ni nsirhelelo. Bibele yi ri Xikwembu xi veke “nkarhi lowu nga riki na makumu” etimbilwini ta hina. (Eklesiasta 3:11) Kutani i swa ntumbuluko ku va ni ntshembo wa nkarhi lowu vanhu va nga ta hanya hi laha ku nga heriki hi ku rhula ni ntsako. Kutani sweswo hi leswi mahungu lamanene ya Mfumo ma swi nyikaka.

Hambiswiritano, leswaku ntshembo wolowo wu va wa xiviri u fanele u kambisisa kutani u kuma kahle leswaku mahungu lamanene ma vulavula hi yini. Muapostola Pawulo u tsundzuxile: “[U] tiyiseka hi ku rhandza ka Xikwembu loku nga kunene ni loku amukelekaka ni loku hetisekeke.” (Varhoma 12:2) Kutani ku fana na Pawulo, endzhaku ko kuma vutivi ni ku twisisa u fanele u hlawula.

Hi hala tlhelo, swi nga ha endleka leswaku se a wu ri ni ntshembo wo karhi malunghana ni vumundzuku bya wena. Tsundzuka leswaku Sawulo a ri ni mavonelo ya yena malunghana ni ku rhandza ka Xikwembu a nga si va muapostola Pawulo. Kambe ematshan’weni yo langutela nhlamuselo ya singita leyi humaka eka Xikwembu, hikwalaho ka yini u nga kambisisi mhaka hi ku kongoma? Tivutise: ‘Xana ndza swi tiva leswaku ku rhandza ka Xikwembu hi kwihi malunghana ni vanhu ni misava? Xana ndzi ni vumbhoni byihi lebyi sekelaka ripfumelo ra mina? Xana vumbhoni bya mina byi nga tikombisa byi ri byinene loko byi kambisisiwa hi langutelo ra Rito ra Xikwembu, ku nga Bibele?’ A ku na lexi u faneleke u xi chava loko u kambisisa tidyondzo ta wena ta vukhongeri hi ndlela leyi. Entiyisweni, u fanele u lava ku swi endla hikuva Bibele ya hi khutaza:  “Tiyisekani hi swilo hinkwaswo; khomelelani swi tiya eka leswinene.” (1 Vatesalonika 5:21) Xana lexi nga xa nkoka ngopfu a hi ku amukeriwa hi Xikwembu?—Yohane 17:3; 1 Timotiya 2:3, 4.

Varhangeri va vukhongeri va nga ha hi tshembisa vumundzuku lebyi nga heriki. Kambe handle ka loko ntshembo wolowo wu sekeriwe etidyondzweni ta Bibele, a wu nge hi pfuni leswaku hi kuma mikateko ya Mfumo wa Xikwembu. Eka Dyondzo ya yena ya le Ntshaveni leyi tivekaka, Yesu u lemuxe hi matimba a ku: “A hi hinkwavo lava nge eka mina, ‘Hosi, Hosi,’ lava nga ta nghena emfun’weni wa matilo, kambe ku ta nghena la endlaka ku rhandza ka Tata wa mina la nge matilweni.”—Matewu 7:21.

Lemuka ndlela leyi Yesu a kandziyisaka ha yona ku endla ku rhandza ka Tata wakwe tanihi xisekelo xo kuma mikateko ya Mfumo wa Xikwembu. Hi marito man’wana leswi swi nga langutekaka swi ri swa vukhongeri a hi minkarhi hinkwayo swi amukelekaka eka Xikwembu. Entiyisweni Yesu u ye emahlweni a ku: “Vo tala va ta ku eka mina hi siku rero, ‘Hosi, Hosi, xana a hi profetanga hi vito ra wena, hi hlongola madimona hi vito ra wena ni ku endla mintirho yo tala ya matimba hi vito ra wena ke?’ Kutani hi nkarhi wolowo ndzi ta va byela ndzi ku: A ndzi kalanga ndzi mi tiva! Sukani eka mina, n’wina vaendli va leswo kala nawu.” (Matewu 7:22, 23) Entiyisweni, nchumu wa nkoka hi leswaku hi tiyiseka leswaku hi swi twisisa kahle leswi mahungu lamanene ya Mfumo ma vulaka swona hakunene kutani hi endla hi ku pfumelelana na wona.—Matewu 7:24, 25.

Mpfuno Wu Kona

Ku tlula malembe ya 100, Timbhoni ta Yehovha a ti ri karhi ti chumayela mahungu lamanene ya Mfumo wa Xikwembu. Hi ku tirhisa tibuku ni hi ku vulavula hi nomu, va pfuna vanhu emisaveni hinkwayo ku kuma vutivi lebyi kongomeke malunghana ni Mfumo, leswaku wu ta tisa mikateko yihi ni leswaku munhu u fanele a endla yini leswaku a kuma mikateko yoleyo.

Hi ku khutaza leswaku u yingisa rungula leri chumayeriwaka hi Timbhoni ta Yehovha. Hi ku amukela ni ku pfumelelana ni mahungu lamanene, u nga kuma mikateko leyikulu ku nga ri sweswi ntsena kambe ni le nkarhini lowu taka loko Mfumo wa Xikwembu wu fuma misava hinkwayo.—1 Timotiya 4:8.

Teka goza sweswi hikuva mikateko ya Mfumo wa Xikwembu yi kwala nyongeni!

[Swifaniso eka tluka 7]

Hi ku tirhisa tibuku ni nomu, Timbhoni ta Yehovha ti chumayela mahungu lamanene ya Mfumo wa Xikwembu