A Hi Nga Ri Swerhu Loko Ripfumelo Ra Hina Ri Ringiwa

Vicky a a ri xinhwanyatana lexi hanyeke kahle—a a hanye kahle naswona a ri mpama. Entiyisweni loko a tswariwa hi ximun’wana xa 1993, a hi nga tikoti hi ntsako. A hi tshama exidorobanini xa le dzongeni wa Sweden, naswona a swi hi fambela kahle.

HAMBISWIRITANO, loko Vicky a ri ni lembe ni hafu swilo swi hundzukile. Se a a ri na nkarhinyana a nga tiphini, hiloko hi n’wi yisa exibedlhele. A hi nge wu rivali nkarhi lowu dokodela a hi byeleke leswaku n’wana wa hina a khomiwe hi khensa ya tisele ta ngati, ku nga khensa leyi hlaselaka vana yi ya nghena ni le ka tisele ta ngati to basa.

A swi tika ku pfumela leswaku n’wana wa hina a nga va a hlaseriwe hi vuvabyi lebyi byo chavisa. A a ha ku sungula ku tlhariha kutani se sirha a ri ahlamile. Leswaku a ringeta ku hi chavelela, dokodela u vule leswaku u fanele a tshunguriwa hi ndlela leyinene leyi humelelaka, leyi katsaka vutshunguri byo tirhisa tikhemikhali swin’we ni mpompelo wo karhi wa ngati. Leswi swi hi kavanyetile nakambe.

Ripfumelo Ra Hina Ri Ringiwa

Hakunene n’wana wa hina a hi n’wi rhandza naswona a hi n’wi lavela vutshunguri byo antswa swinene. Hambiswiritano, loko swi ri swa mpompelo wa ngati swona a hi nga ta swi amukela nikatsongo. Hi ri tshemba swinene Rito ra Xikwembu, Bibele, leri ngo swi tlangandla, erivaleni leswaku Vakreste va fanele ‘ku papalata ngati.’ (Mintirho 15:28, 29) Nakambe a hi swi tiva leswaku ku pomperiwa ngati i ku peta vutomi ekhombyeni. Magidi ya vanhu va tluleriwe hi mavabyi naswona va funye buwu hikwalaho ka mpompelo wa ngati. Vutshunguri lebyi a hi ta byi amukela ntsena a ku ri bya xiyimo xa le henhla lebyi a byi nga katsi mpompelo wa ngati. Hikwalaho ke, nyimpi ya hina ya ku lwela ripfumelo yi sungurile.

 A hi ta swi byela mani? Hi tihlanganise ni Ndzawulo ya Rungula ra Swibedlhele ehofisini ya rhavi ra Timbhoni ta Yehovha eSweden hi kombela mpfuno. * Hi ku hatlisa, ti-fax ti rhumeriwile eswibedlhele swo hambana-hambana eYuropa hinkwaro ku laviwa xibedlhele ni dokodela la nga endlaka vutshunguri byo tirhisa tikhemikhali handle ko pompela ngati. Ku gingiriteka ni rirhandzu leri kombisiweke hi vamakwerhu va Vakreste eka matshalatshala ya vona yo hi pfuna a swi khutaza swinene. A hi nga ri swerhu eku lweleni ka hina ripfumelo.

Ku nga si hela tiawara ti nga ri tingani, xibedlhele ni dokodela a swi kumekile le Homburg/Saar, eJarimani. Ku endliwe malunghiselelo ya leswaku hi hahela kwale siku leri landzelaka, leswaku Vicky a ta kamberiwa. Loko hi fika, vamakwerhu va Vakreste lava humaka evandlheni ra kwalaho ra Timbhoni ta Yehovha eHomburg, ku katsa ni van’wana va maxaka ya hina, se a va hi rindzerile. Kutani muyimeri wa Komiti yo Vulavurisana ni Swibedlhele u hi amukele hi mandla mambirhi. U fambe na hina exibedlhele a tlhela a hi seketela hilaha a nga kotaka hakona. Hi titwe hi chavelelekile ku vona leswaku hambi loko hi ri etikweni rimbe, hi na vamakwerhu va moya lava hi seketelaka.

Loko hi hlangane na Dok. Graf exibedlhele, hi chavelelekile nakambe. A a twisisa swinene naswona u hi tiyisekisile leswaku u ta endla hinkwaswo leswi nga le matimbeni ya yena leswaku a tshungula Vicky handle ko pomperiwa ngati. Hambiloko mpimo wa hemoglobini wo ehla wu fika eka 5 g/dl, a ta ya emahlweni ni ku n’wi tshungula handle ko tirhisa ngati. U tlhele a vula leswaku ku kamberiwa ka yena hi xihatla ni ku teka goza ra xihatla leswaku Vicky a tisiwa eka yena swi ta endla leswaku vutshunguri byi famba kahle. U vule leswaku u ta va a sungula hi Vicky ku endla vutshunguri byo tirhisa tikhemikhali handle ko tirhisa ngati. Hi n’wi khense swinene Dok. Graf hi tlhela hi xixima xivindzi xa yena ni ku tiyimisela ka yena ku hi pfuna.

Swiphiqo Swa Timali

Sweswi xivutiso a ku ri leswaku, Hi ta byi hakerisa ku yini vutshunguri bya Vicky? Hi sale hi ahlamile loko va hi byela leswaku vutshunguri bya malembe mambirhi byi ta hi lava kwalomu ka 150 000 wa ti-deutsche mark (R520 000). Mali ya hina a yi ri yitsongo swinene naswona a swo boha leswaku Vicky a sungula ku tshunguriwa hi wona nkarhi wolowo. Leswi a hi suke eSweden hi ya lava vutshunguri eJarimani a hi nga ri na mpfumelelo wa ndzindza-khombo wa mani na mani wa swa rihanyo. A hi ri kwalaho ni xinhwanyatana xa hina ni vatshunguri lava nga ni ntokoto lava tiyimiseleke ku hi pfuna kambe a hi nga ri na mali leyi ringaneke.

Hiloko xibedlhele xi hi pfuna hi ku hi byela leswaku vutshunguri byi nga sungula hi nkarhi wolowo loko ho hakela 20 000 marks (R70 000) kutani hi tiyisekisa hi ku tsala ehansi leswaku hi ta tlhela hi hakela leyi saleke. A hi ri ni swimalana swo karhi naswona hi mpfuno wa vanghana ni maxaka, hi swi kotile ku hakela 20 000 marks (R70 000)—kambe ku vuriwa yini hi leyi yi seleke?

Nakambe hi tsundzuxiwile leswaku a hi nga ri swerhu eku lweleni ka hina ripfumelo. Makwerhu un’wana wa moya, loyi hi nga n’wi tiviki a a tiyimiserile ku rhwala vutihlamuleri byo hakelela mali leyi a yi sele. Hambiswiritano, a swa ha bohanga leswaku hi tirhisa nyiko ya yena tanihi leswi hi koteke ku endla matshalatshala man’wana.

Vatshila Va Swa Vutshunguri Va Sungula Ntirho

Vutshunguri byo tirhisa tikhemikhali byi sungurile. Ku hundze masiku ni mavhiki. Minkarhi yin’wana a swi hi tikela hina ni n’wana wa hina. Hi hala tlhelo nkarhi na nkarhi a hi tsaka swinene ni ku nkhensa loko hi vona ku antswa ko karhi. Vutshunguri lebyi byo tirhisa tikhemikhali byi teke tin’hweti ta nhungu. Hemoglobini ya Vicky yi kale yi ehla yi fika eka 6 g/dl, naswona Dok. Graf u hlayise xitshembiso xa yena.

Se ku hundze malembe lama tlulaka tsevu naswona vukamberi bya yena byo hetelela bya mongo wa longo a byi kombisanga nkhensa ya tisele ta ngati. Sweswi i nhwanyana la tsakeke la nga  riki na mphyati wa vuvabyi. Ina, leswaku Vicky u hanye bya cheleni onge i singita. Ha swi xiya leswaku vana vo tala lava nga ni vuvabyi lebyi va fa ku nga khathariseki leswaku va endliwe vutshunguri bya tikhemikhali va tlhela va pomperiwa ngati.

Ku lwela ka hina ripfumelo ku humelerile, kambe hi mpfuno wa maxaka, vamakwerhu vaxinuna ni vaxisati va Vukreste ni vatshunguri lava nga ni ntokoto. Ndzawulo ya Rungula ra Swibedlhele yi hi pfune vusiku ni nhlikanhi. Dok. Graf ni vanghana va yena va tirhise vuswikoti bya vona ku pfuna Vicky leswaku a hlakarhela. Hi nkhensa swinene hinkwaswo leswi va hi endleleke swona.

Ripfumelo Ra Hina Ri Tiyisiwile

Kambe, ngopfu-ngopfu hi nkhensa Xikwembu xa hina Yehovha, hi nkhathalelo wa xona wa rirhandzu ni matimba lawa hi ma kumeke eRitweni ra xona, Bibele. Loko hi languta endzhaku, ha swi vona leswaku ntokoto lowu wu tshikilelaka wu hi dyondzise swo tala evuton’wini wu tlhela wu hi tiyisa ripfumelo.

Sweswi ku navela ka mbilu ya hina i ku hlayisa vuxaka lebyikulu na Yehovha Xikwembu ni ku dyondzisa n’wana wa hina nkoka wo hanya vutomi lebyi fambisanaka ni swilaveko swa yena. Ina, hi lava ku n’wi nyika ndzhaka leyinene ya swa moya ya vutomi lebyi nga heriki eParadeyisini leyi taka laha emisaveni.—Xi lo nyikeriwa.

[Nhlamuselo ya le hansi]