“Khombo Leri Tumbeleke Ra Rihanyo Ra Vanhu”

NKAMBISISO wa sweswinyana wa swa rimbewu wu paluxe leswaku vanhu vo tala ngopfu lavakulu lava tirhisaka Internet eUnited States va pfule eka web-site ya ta rimbewu. Vunyingi bya vanhu sweswi va tihisa hi rimbewu hikwalaho ka Internet. Dok. Al Cooper, mutivi wa mianakanyo loyi a endleke nkambisiso wolowo u ri: “Hi ndlela yo karhi, leri i khombo leri tumbeleke ra rihanyo ra vanhu leri hlaselaka, hikuva i vanhu vatsongo swinene lava ri tekaka ri ri khombo hakunene.”

I vamani lava nga hlaseriwaka hi ku olova hi timhaka ta rimbewu leti kumekaka eka khompyuta? Dok. Cooper u ri: “Hi lava tirhisaka tikhompyuta, lava a va nga ntshunxekanga eka timhaka ta rimbewu evuton’wini bya vona hinkwabyo” kambe lava “hi xitshuketa va kumaka mphakelo wo tala wa timhaka ta rimbewu” eka Internet.

Hambiswiritano, vo tala va lava talaka ku pfula tindhawu ta rimbewu eka khompyuta va teka mukhuva lowu wu nga ri na khombo. Xana swi tano? Tanihi leswi munhu la godzomberiweke hi swidzidzirisi a tiyiselelaka xidzidzirisi lexi n’wi godzombeleke, vanhu vo tala lava godzomberiweke hi ta rimbewu eka khompyuta va ya va lava “timhaka” to tala ta rimbewu eka Internet leswaku va enerisa ku navela ka vona lokukulu. Phela, va nga ha veka ni ntirho wa vona ekhombyeni swin’we ni vuxaka bya vona ni vanghana va vona va vukati!

Kambe, lava va lavaka ku tsakisa Xikwembu va ni xivangelo lexi engetelekeke xo papalata ku pfula tindhawu leti vulavulaka hi rimbewu eka Internet. Rito ra Xikwembu ra tsundzuxa: “Hikokwalaho, dlayani swirho swa miri wa n’wina leswi nga emisaveni malunghana ni vumbhisa, thyaka, ku navela ka vuxaka bya rimbewu, ku navela loku vavisaka, ni ku tshwa, ku nga ku gandzela swifaniso swa hava. Hikwalaho ka swilo sweswo vukarhi bya Xikwembu bya ta.” (Vakolosa 3:5, 6) Leswaku munhu a ‘dlaya swirho swa miri wa yena’ malunghana ni ku navela ka rimbewu loku nga tengangiki, u fanele a hlakulela rirhandzu lerikulu ha Yehovha Xikwembu. (Pisalema 97:10) Loko munhu a tikuma a yengiwe hi khombo ra rihanyo ra vanhu lava endlaka rimbewu eka khompyuta, u fanele a tiyisa rirhandzu ra yena ha Yehovha hi ku dyondza Rito ra Xikwembu, Bibele. Ku va ni vunakulobye lebyi tengeke ni Timbhoni ta Yehovha eHolweni ya Mfumo ya le ndhawini ya ka vona swi nga n’wi pfuna swinene munhu leswaku a tiyisa ku tiyimisela ka yena ku tsakisa Xikwembu.