Ndlela Yo Langutana Ni Ku Hela Matimba

● Asafa u vilerile: “Hakunene ndzi yi basisele swa hava mbilu ya mina nileswi ndzi hlambeke mavoko hikwalaho ka ku pfumala nandzu. Kutani ndzi weriwe hi khombo siku hinkwaro, naswona ndzi tshinyiwa mixo wun’wana ni wun’wana.”—Pisalema 73:13, 14.

● Baruku u gungurile: “Khombo eka mina, hikuva Yehovha u engetele gome eka xitlhavi xa mina! Ndzi hele matimba hikwalaho ka nhlomulo wa mina, naswona a ndzi yi kumanga ndhawu yo wisela eka yona.”—Yeremiya 45:3.

● Nawomi u ririle: “Lowa Matimba Hinkwawo u ndzi endlele swo vava ngopfu. A ndzi tele loko ndzi famba, kambe Yehovha u ndzi vuyise ndzi nga khomanga nchumu. Ha yini ma ha ndzi vitana Nawomi, kasi i Yehovha loyi a ndzi tsongahateke ni Lowa Matimba Hinkwawo la ndzi vangeleke khombo?”—Rhuti 1:20, 21.

BIBELE yi tamele swikombiso swo tala swa vagandzeri vo tshembeka va Yehovha lava nkarhi wun’wana va heleke matimba swinene. Ntiyiso hi leswaku tanihi vanhu lava nga hetisekangiki hinkwerhu hi heleriwa hi matimba nkarhi na nkarhi. Van’wana va hina hi hatla hi hela matimba—nkarhi wun’wana hi kala hi titwela vusiwana—ku tlula van’wana hikwalaho ko langutana ni makhombo yo biha.

Hambiswiritano, loko mintlhaveko leyi yi nga lawuriwi yi nga onha vuxaka bya wena ni vanhu van’wana ku katsa na Yehovha Xikwembu. Wansati un’wana wa Mukreste loyi a a tshamela ku titwela vusiwana u ri: “Ndzi ale swirhambo swo tala swa swinkhubyana swa vunghana hikwalaho ka leswi a ndzi titwa ndzi nga ri nchumu eka vanhu va le vandlheni.” Wa nga vona khombo leri mintlhaveko yoleyo yi nga vaka na rona evuton’wini bya munhu! Xana u nga endla yini leswaku u wu hlula?

Tshinela eKusuhi Na Yehovha

Eka Pisalema 73, Asafa u ku tsale hi ku tshembeka ku pfilunganyeka ka yena. Loko a pimanisa xiyimo xa yena ni xa lavo homboloka lava yimeke kahle, u sungule ku va navela. U xiye leswaku vanhu lava nga xiximiki Xikwembu a va tinyungubyisa va tlhela va va ni madzolonga, kambe a va vonaka va balekela nxupulo. Kutani Asafa u sungule ku kanakana malunghana ni nkoka wa loko a landzelela ndlela leyi lulameke evuton’wini.—Pisalema 73:3-9, 13, 14.

Ku fana na Asafa, xana u xiye ndlela leyi vanhu lavo homboloka va humelelaka ha yona va tlhela va bombisa vuhomboloki bya vona? Xana Asafa u yi hlule njhani mintlhaveko ya yena leyi hoxeke? U ya mahlweni a ku: “Ndzi tshamela ku xiya leswaku ndzi ta swi twisisa leswi; a swi karhata ematihlweni ya mina, ku fikela loko ndzi fika evukwetsimelweni lebyikulu bya Xikwembu. A ndzi lava ku twisisa vumundzuku bya vona.” (Pisalema 73:16, 17) Asafa u teke goza lerinene hi ku ya eka Yehovha hi xikhongelo. Loko hi tirhisa marito lawa hi ku famba ka nkarhi ma tirhisiweke hi muapostola Pawulo, Asafa u hlule “munhu wa nyama” hi ku pfuxa “munhu wa moya” endzeni ka yena. Leswi se a a ri ni langutelo ra moya lerintshwa, u kote ku twisisa leswaku Yehovha u venga vubihi ni leswaku hi ku famba ka nkarhi lavo biha va ta xupuriwa.—1 Vakorinto 2:14, 15.

 Hakunene i swa nkoka ku pfumelela Bibele yi ku pfuna ku languta xikongomelo xa vutomi! Yehovha wa hi tsundzuxa leswaku leswi vanhu lavo homboloka va swi endlaka swi lo tlangandla, erivaleni. Bibele ya hi dyondzisa: “Mi nga tshuki mi hambukisiwa: Xikwembu a hi xa ku vungunyiwa. Hikuva xin’wana ni xin’wana lexi munhu a xi byalaka, u ta tlhela a tshovela xona . . . Kutani hi nga tshiki ku endla leswi nga swinene.” (Vagalatiya 6:7-9) Yehovha u ta veka lavo homboloka “endhawini leyi rhetaka”; u ta va ‘wisela endzovisweni.’ (Pisalema 73:18) Vululami bya Xikwembu byi ta hlula eku heteleleni.

Loko u tshama u ri karhi u tiwundla hi swakudya swa moya etafuleni ra Yehovha u tlhela u va ni vuxaka lebyinene ni vanhu va Xikwembu, swi ta ku pfuna ku tiyisa ripfumelo ra wena ni ku hlula ku hetiwa matimba kumbe mintlhaveko yin’wana leyo biha. (Vaheveru 10:25) Ku fana na Asafa, loko u tshama ekusuhi ni Xikwembu u nga kuma nseketelo wa rirhandzu ra xona. Asafa u ya emahlweni a ku: “Ndzi na wena nkarhi hinkwawo; u khome voko ra mina ra xinene. U ta ndzi kongomisa hi xitsundzuxo xa wena, kutani endzhaku ka sweswo u ta ndzi vangamisa.” (Pisalema 73:23, 24) Mukreste un’wana la khomiweke hi tihanyi loko a ha ri ntsongo u dyondze vutlhari bya marito lawa. U ri: “Ku tshama ndzi ri ni vamakwerhu va le vandlheni swi ndzi dyondzise swo karhi evuton’wini. Ndzi swi vone kahle leswaku vakulu va Vakreste va ni rirhandzu, ni leswaku a hi maphorisa kambe i varisi.” Ina, vakulu va Vakreste lava nga ni tintswalo va ni xiphemu lexikulu eku heriseni ka mintlhaveko leyi dlayaka.—Esaya 32:1, 2; 1 Vatesalonika 2:7, 8.

Amukela Ndzayo Ya Yehovha

Baruku, matsalana wa muprofeta Yeremiya, u ririle hikwalaho ka ku tshikileriwa mintlhaveko hi ntirho wakwe. Kambe Yehovha u kongomise langutelo ra Baruku eka swilo leswi nga ntiyiso. “‘Kambe loko ku ri wena, u tshamela ku lava swilo leswikulu. U nga tshameli ku swi lava. Hikuva ndzi tisa khombo ehenhla ka nyama hinkwayo,’ ku vula Yehovha, ‘naswona ndzi ta ku nyika moya-xiviri wa wena kukota leswi phangiweke etindhawini hinkwato leti u nga ta ya eka tona.’”—Yeremiya 45:2-5.

Hi marito lama kongomeke Yehovha u hlamusele leswaku ntshikilelo wa Baruku a wu vangiwa hi ku hlongorisa swilo leswi vonakaka. Baruku a nga ta wu kuma ntsako entirhweni lowu a wu nyikiweke hi Xikwembu loko hi hala tlhelo a tilavela swilo leswikulu. Na wena u nga ha kuma leswaku goza lerinene ro hlula ku hela matimba i ku papalata swikavanyeti kutani u va ni ku rhula ka mianakanyo loku enerisaka loku kumekaka eka Xikwembu.—Vafilipiya 4:6, 7.

Nawomi loyi a a ri noni a nga pfumelelanga leswaku ntshikilelo wu n’wi endla leswaku a nga rhurhi etikweni ra Mowabu endzhaku ka ku fa ka nuna wa yena ni vana va yena va xinuna vambirhi. Hambiswiritano swi vonaka onge ku hele nkarhi a ri karhi a karhateka hi yena n’wini ni tinhlomi takwe. Loko a tlherisela tinhlomi takwe endzhaku Nawomi u te: “Ndzi twa ku  vava ngopfu hikwalaho ka n’wina, leswi voko ra Yehovha ri humeke ku lwa na mina.” Na loko a fika eBetlehema u te: “Mi nga ndzi vitani Nawomi [“Ku Tsakisa Ka Mina”]. Ndzi vitaneni Marha [“Ku Bava”], hikuva Lowa Matimba Hinkwawo u ndzi endlele swo vava ngopfu.”—Rhuti 1:13, 20.

Hambiswiritano Nawomi a nga kalanga a nga ti endla guwela loko a feriwile—a ti hambanisa na Yehovha ni vanhu vakwe. Loko a ri etikweni ra Mowabu u twe leswaku “Yehovha u hundzuluxele nyingiso wakwe eka vanhu vakwe hi ku va nyika xinkwa.” (Rhuti 1:6) U swi twisisile leswaku ndhawu leyinene eka yena hi leyi yi nga ni vanhu va Yehovha. Endzhaku ka sweswo Nawomi ni n’wingi wakwe Rhuti va tlhelele eYuda naswona u letele Rhuti hi vutlhari leswaku u fanele a ti khomisa ku yini emahlweni ka Bowasi xaka ra vona, mukutsuri wa yena.

Hilaha ku fanaka ni namuntlha, lavo tshembeka lava feriweke hi vanghana va vukati va langutana ni ntshikilelo wo feriwa hi ndlela leyi humelelaka, hi ku tshama va khomekile evandlheni ra Vukreste. Ku fana na Nawomi va tshama va khomekile hi swilo swa moya, va hlaya Rito ra Xikwembu siku ni siku.

Mpfuno Wo Tirhisa Vutlhari Bya Xikwembu

Rungula leri ra Bibele ri hi pfuna ku twisisa leswaku hi nga langutana njhani ni mintlhaveko leyo biha. Asafa u lave mpfuno exikwetsimisisweni xa Yehovha naswona u rindzele Yehovha. Baruku u yingise ndzayo naswona u papalate swilo leswi vonakalaka leswaku swi nga n’wi kavanyeti. Nawomi u tshame a khomekile exikarhi ka vanhu va Yehovha, a lunghiselela nsati lontsongo Rhuti malunghelo ya yena yo gandzela Xikwembu xa ntiyiso.—1 Vakorinto 4:7; Vagalatiya 5:26; 6:4.

U nga hlula swilo leswi hetaka matimba ni mintlhaveko leyo biha hi ku anakanya hi swilo leswi Yehovha a nyikeke vanhu va yena matimba ya ku swi hlula, ku nga ha va munhu un’we kumbe hi ku angarhela. Leswaku na wena u fikelela kwalaho, anakanyisisa hi rirhandzu leri tlurisaka ra Yehovha hi ku ku lunghiselela nkutsulo. Tlangela rirhandzu ra xiviri ra vumakwerhu bya Vukreste. Anakanya hi vutomi bya wena emisaveni leyintshwa ya Xikwembu leyi taka. Naswona onge u nga angula ku fana na Asafa: “Loko ku ri mina, ku tshinela eka Xikwembu i swinene eka mina. Ndzi veke vutumbelo bya mina eka Yehovha, Hosi leyi Lawulaka, ku vula mintirho ya wena hinkwayo.”—Pisalema 73:28.