Xana U “Tixavela Nkarhi Lowunene”?

MUAPOSTOLA Pawulo u nyike Vakreste va le Efesa ndzayo eka lembe-xidzana ro sungula, a ku: “Tshamani mi ri karhi mi languta leswaku ndlela leyi mi fambaka ha yona a yi fani ni ya lava nga tlharihangiki kambe yi fana ni ya vanhu vo tlhariha, mi tixavela nkarhi lowunene, hikuva masiku ma hombolokile.” (Vaefesa 5:15, 16) Hikwalaho ka yini a swi fanela leswaku a nyikela ndzayo leyi? Nhlamulo ya xivutiso xexo yi lava hi va ni vutivi bya swiyimo leswi Vakreste va langutane na swona etikweni rero ra khale.

Efesa a ri tiveka hi rifuwo lerikulu, mahanyelo yo biha ngopfu, vugevenga byo tala ni mintirho yo hambana-hambana ya vudimona. Ku tlula kwalaho, Vakreste a va fanele va lwa ni tidyondzo ta filosofi leti a ti vulavula hi nkarhi. Magriki lawa a ma nga ri Vakreste le Efesa a ma nga kholwi leswaku nkarhi wa hela. Filosofi ya Magriki yi ma dyondzise leswaku vutomi byo va xirhendzevutana lexi nga riki na makumu. Munhu loyi a tlangeke hi nkarhi wa yena evuton’wini byakwe byo sungula u ta tlhela a wu kuma loko byi vuya nakambe. Ku ehleketa hi ndlela yoleyo a ku ta endla leswaku Vakreste va le Efesa va nga vi na mhaka ni xiyimiso xa Yehovha xo endla swilo, ku katsa ni xiyimiso xakwe xa vuavanyisi bya vukwembu. Hikwalaho, ndzayo ya Pawulo ya ku ‘tixavela nkarhi lowunene’ a yi faneleka.

Pawulo a a nga vulavuli hi nkarhi lowu tolovelekeke. Rito ra Xigriki leri a ri tirhiseke ri kombisa nkarhi lowu vekiweke, nkarhi lowu faneleke wa xikongomelo xo karhi. Pawulo a a nyika Vakreste va lembe-xidzana ro sungula ndzayo ya leswaku va tirhisa nkarhi lowunene hi vutlhari, kumbe nguva ya ntsako, leyi a va ri na yona hi nkarhi wolowo makumu ma nga si fika ni tintswalo ta Xikwembu, naswona va nga si lahlekeriwa hi nkarhi wa ku ponisiwa.— Varhoma 13:11-13; 1 Vatesalonika 5:6-11.

Hi hanya enkarhini lowunene lowu fanaka. Ematshan’weni ya leswaku Vakreste va tlanga hi nkarhi lowunene lowu va nga na wona sweswi lowu nga taka wu nga ha pfuki wu ve kona, va hlongorisa mintsako ya nkarhinyana ya misava leyi, va kombisa leswaku va tlharihile hi ku tirhisa nkarhi lowu kumekaka leswaku va endla “swiendlo swa ku tinyiketela eka Xikwembu,” xisweswo va tiyisa vuxaka bya vona ni Muvumbi, ku nga Yehovha Xikwembu.— 2 Petro 3:11; Pisalema 73:28; Vafilipiya 1:10.