“Yehovha U Ve Ni Tintswalo Eka Mina!”

HI MADYAMBU man’wana yo tsakisa hi March 1985, vavanuna ni vavasati eNdzawulweni ya Vutsari eyindlu-nkulu ya Timbhoni ta Yehovha le New York, U.S.A., va twe swilo leswi nga rivalekiki. Karl F. Klein se a hete malembe ya 60 evutirhelini bya nkarhi hinkwawo. Hi ku hiseka Makwerhu Klein u vule leswi: “Yehovha u ve ni tintswalo eka mina!” U xiye leswaku Pisalema 37:4 a ku ri ndzimana ya Bibele leyi a yi rhandza. Endzhakunyana u tsakise vanhu hinkwavo hi ku tlanga vhayolini ya yena ya bezi.

Emalembeni ya 15 lama landzeleke Makwerhu Klein u ye emahlweni a tirha endzawulweni ya vutsari ni ku tirha ni Huvo leyi Fumaka ya Timbhoni ta Yehovha. Kutani hi January 3, 2001, Karl Klein u hete pfhumba ra yena ra laha misaveni a tshembekile, a ri ni malembe ya 95.

Karl u tswaleriwe le Jarimani. Ndyangu wa ka vona wu rhurhele eUnited States kutani Karl u kulele exidorobanini xa Chicago, eIllinois. Karl ni ndzisana ya yena Ted, va rhandze Bibele swinene va ha ri vatsongo. Karl u khuvuriwe hi 1918 naswona swilo swo tsakisa leswi a swi tweke entsombanweni wa Swichudeni swa Bibele hi 1922 swi pfuxe ku rhandza ka yena nsimu vutomi bya yena hinkwabyo. A a nga lavi leswaku vhiki ri hela a nga yanga entirhweni wa nsimu, naswona u endle tano hambi ku ri emavhikini yo hetelela ya vutomi bya yena.

Karl u ve xirho xa yindlu-nkulu hi 1925, ro sungula u tirhe emuchinini wo kandziyisa. A a rhandza vuyimbeleri hi mbilu ya yena hinkwayo naswona malembe yo tala u tlange vhayolini ya bezi eka ntlawa wa okhestra lowu a wu haxiwa eka xiya-ni-moya xa Vakreste. Endzhaku ka sweswo u tirhe eNdzawulweni ya Ntirho, ngopfu-ngopfu a tsakela ku va ni mulanguteri wa yona T. J. Sullivan. Hi nkarhi wolowo Ted u tekile kutani yena ni nsati wakwe Doris, va nghenela ntirho wa vurhumiwa ePuerto Rico.

Karl Klein u tirhe eNdzawulweni ya Vutsari ku ringana malembe ya 50, laha a pfuneke swinene hikuva a a swi rhandza ku endla ndzavisiso, naswona a a ri ni vutivi byo enta bya Bibele. Hi 1963, Karl u tekane na Margareta murhumiwa wa le Jarimani loyi a tirha eBolivia. Hikwalaho ka nseketelo wa yena wa rirhandzu, ngopfu-ngopfu leswi a a karhatiwa hi mavabyi, u swi kotile ku endla swo tala hambileswi a a hundze khale eka malembe lawa vo tala va sungulaka ku tshika ntirho eka wona. Ku rhandza ka Karl ntiyiso ka ntumbuluko, swin’we ni ku rhandza vuyimbeleri swi endle leswaku tinkulumo ta yena emavandlheni ni le mintsombanweni ti kumbukiwa. Emahlweninyana ka ku fa ka yena, u khome ndzimana ya siku endyangwini lowukulu wa Bethele wa le New York, leyi tlangeriweke yi tlhela yi pfuna hinkwavo.

Vahlayi vo tala va nkarhi na nkarhi va Xihondzo xo Rindza va ta tsundzuka vutomi bya vutshembeki bya Makwerhu Klein, ku nga mhaka leyi tsakisaka ya mintokoto ya yena leyi humesiweke enkandziyisweni (wa Xinghezi) wa October 1, 1984. U nga tsakela ku yi hlaya kumbe ku tlhela u yi hlaya, u tsundzuka leswaku mutsari wa yona u hete malembe man’wana ya khume na ntlhanu a ri Mukreste la tshembekaka ni la tinyiketeleke.

Tanihi un’wana wa vatotiwa va Hosi, Makwerhu Klein a a swi navela hi mbilu hinkwayo ku fuma swin’we na Kreste etilweni. Hi ni xivangelo lexi twalaka xo pfumela leswaku Yehovha se u ku hetisisile ku navela koloko.—Luka 22:28-30.

[Xifaniso eka tluka 31]

Karl in 1943 a ri na T. J. Sullivan na Ted na Doris

[Xifaniso eka tluka 31]

Karl na Margareta, hi October 2000