Dzunisani Yehovha Hikwalaho Ka Swiendlo Swa Yena Leswikulu!

“Moya-xiviri wa mina wu twarisa Yehovha . . . hikuva Lowa matimba u ndzi endlele swiendlo leswikulu.”—LUKA 1:46-49.

1. Hi dzunisa Yehovha hilaha ku faneleke hikwalaho ka swiendlo swihi leswikulu?

YEHOVHA u fanela hi ku dzunisiwa hikwalaho ka swiendlo swa yena leswikulu. Loko muprofeta Muxe a rungula ta ku ponisiwa ka Vaisrayele aEgipta, u te: “Mahlo ya n’wina ma vone swiendlo hinkwaswo leswikulu swa Yehovha.” (Deteronoma 11:1-7) Hilaha ku fanaka, loko ntsumi Gabriyele yi tivisa wanhwana Mariya hi ta ku velekiwa ka Yesu, yena u te: “Moya-xiviri wa mina wu twarisa Yehovha . . . hikuva Lowa matimba u ndzi endlele swiendlo leswikulu.” (Luka 1:46-49) Hina Timbhoni ta Yehovha, ha n’wi dzunisa hikwalaho ka swiendlo leswikulu swo fana ni leswi a swi endleke loko a ntshunxa Vaisrayele evuhlongeni bya le Egipta ni singita leri a ri endleke ra ku tikiwa ka N’wana wa yena la rhandzekaka.

2. (a) “Xikongomelo lexi nga riki na makumu” xa Xikwembu xi vula yini eka vanhu lava yingisaka? (b) Xana Yohane u humeleriwe hi yini exihlengeni xa Patmosi?

² Swiendlo swo tala leswikulu swa Yehovha swi fambisana ni “xikongomelo [xakwe] lexi nga riki na makumu” xo katekisa vanhu lava yingisaka hi ku tirhisa Mesiya ni Mfumo wa yena. (Vaefesa 3:8-13) Xikongomelo xolexo a xi ri karhi xi kula loko muapostola Yohane la dyuhaleke a pfumeleriwa ku hlometela enyangweni wa xivono lowu pfuriweke etilweni. U twe rito leri mbvungulaka bya mhalamhala ri ku: “Tlhandlukela haleno, ndzi ta ku komba swilo leswi fanelaka ku endleka.” (Nhlavutelo 4:1) Loko hulumendhe ya le Rhoma yi n’wi yise exihlengeni xa Patmosi “hikwalaho ka ku vulavula hi Xikwembu ni ku nyikela vumbhoni mayelana na Yesu,” Yohane u kume “nhlavutelo ya Yesu Kreste.” Leswi muapostola a swi voneke a tlhela a swi twa swi paluxe swo tala hi xikongomelo lexi nga riki na makumu xa Xikwembu, xisweswo a nyikela ku voningeriwa ka moya ni xikhutazo lexi nga enkarhini eka Vakreste hinkwavo va ntiyiso.—Nhlavutelo 1:1, 9, 10.

3. I vamani lava yimeriwaka hi vakulu va 24 lava Yohane a va voneke exivonweni?

³ Eka nyangwa yoleyo leyi pfulekeke ya le tilweni, Yohane u vone vakulu va 24, va tshame eswiluvelweni naswona va tlhandlekiwe tiharhi ku fana ni tihosi. Va we ehansi emahlweni ka Xikwembu kutani va ku: “Swa ku fanela, Yehovha, wena Xikwembu xa hina, ku amukela ku vangama ni ku xiximiwa ni matimba, hikuva u tumbuluxe swilo hinkwaswo, naswona hikwalaho ka ku rhandza ka wena swi ve kona, swi tumbuluxiwile.” (Nhlavutelo 4:11) Vakulu volavo va yimela Vakreste hinkwavo lava totiweke lava pfuxiweke eku feni lava nga exikhundleni lexi tlakukeke lexi Xikwembu xi va tshembiseke xona. Va susumeteleka ku dzunisa Yehovha hikwalaho ka swiendlo swa yena leswikulu leswi fambisanaka ni ntumbuluko  wakwe. Na hina hi hlamarisiwa hi vumbhoni bya “matimba ya [Yehovha] lama nga riki na makumu ni Vukwembu bya [yena].” (Varhoma 1:20) Naswona loko hi ya emahlweni hi dyondza hi Yehovha, hi kuma swivangelo leswi engetelekeke swa ku n’wi dzunisa hikwalaho ka swiendlo swa yena leswikulu.

Twarisa Swiendlo Leswi Dzunekaka Swa Yehovha!

4, 5. Nyika swikombiso swa ndlela leyi Davhida a dzuniseke Yehovha ha yona.

⁴ Mupisalema Davhida u dzunise Xikwembu hikwalaho ka swiendlo swa xona leswikulu. Hi xikombiso, Davhida u yimbelele a ku: “N’wina vanhu, yimbelelelani Yehovha miloti, yena la tshamaka eSiyoni; byelani vanhu swiendlo swakwe. Oho Yehovha, ndzi kombe tintswalo; vona ku xaniseka ka mina hikwalaho ka lava va ndzi vengaka, Wena la ndzi tlakusaka ehenhla ka tinyangwa ta rifu, leswaku ndzi ta vula swiendlo swa wena hinkwaswo leswi vongekaka etinyangweni ta nhwanyana wa Siyoni.” (Pisalema 9:11, 13, 14) Endzhaku ko nyika n’wana wa yena Solomoni pulani ya tempele, Davhida u dzunise Xikwembu a ku: “Wena Yehovha, vukulu, matimba, ku saseka, vunene ni xindzhuti i swa wena . . . Mfumo i wa wena, Wena Yehovha, Wena la tlakukeke la nga murhangeri wa hinkwavo. . . . Sweswi, Wena Xikwembu xa hina, ha ku nkhensa ni ku dzunisa vito ra wena ro saseka.”—1 Tikronika 29:10-13.

⁵ Matsalwa ma tshamela ku hi rhamba—ina ma hi khutaza—leswaku hi dzunisa Xikwembu, hilaha Davhida a endleke hakona. Buku ya Tipisalema yi ni marito yo tala lama dzunisaka Xikwembu, naswona kwalomu ka hafu ya tinsimu leti, ti yimbeleriwe hi Davhida. A a tshamela ku dzunisa ni ku nkhensa Yehovha. (Pisalema 69:30) Ku tlula kwalaho, ku sukela eminkarhini ya khale, marito ya Davhida lama hleriweke ma tlhela ma huhuteriwa ni man’wana ma tirhiseriwe ku dzunisa Yehovha.

6. Tipisalema leti huhuteriweke ti hi pfuna hi ndlela yihi?

⁶ Tipisalema i ta nkoka swinene eka vagandzeri va Yehovha! Loko hi lava ku nkhensa Xikwembu hikwalaho ka swiendlo swa xona leswikulu leswi xi hi endleleke swona, mianakanyo ya hina yi nga ha tsundzuka marito yo saseka lama kumekaka eka Tipisalema. Hi xikombiso, loko hi pfuka nimixo hi nga ha susumeteleka ku vula marito lama fanaka ni lawa: “I swinene ku nkhensa Yehovha ni ku yimbelelela vito ra wena miloti, Wena La nge Henhla-henhla; ku vulavula hi musa wa wena wa rirhandzu nimixo ni hi ku tshembeka ka wena nivusiku, . . . Oho Yehovha, u ndzi tsakisile hikwalaho ka ntirho wa wena; ndzi huwelela hi ku tsaka hikwalaho ka mintirho ya mavoko ya wena.” (Pisalema 92:1-4) Loko hi hlula xihinga lexi hi sivelaka ku endla nhluvuko wa moya, hi nga ha kombisa ntsako ni ku nkhensa hi xikhongelo, hilaha mupisalema a endleke hakona loko a yimbelela a ku: “Tanani hi huwelela hi ku tsaka eka Yehovha! A hi huweleleni hi ku hlula eka Ribye ra hina ra ku ponisa. A hi yeni emahlweni ka yena hi ku nkhensa; a hi n’wi yimbeleleleni miloti hi ku hlula.”—Pisalema 95:1, 2.

7. (a) Hi xiya yini hi tinsimu to tala leti yimbeleriwaka hi Vakreste? (b) Hi xihi xivangelo xin’wana xo fika ka ha ri na nkarhi eminhlanganweni ni ku tshama yi kala yi hela?

⁷ Hakanyingi hi yimbelela tinsimu to dzunisa Yehovha loko hi ri eminhlanganweni ya vandlha, etinhlengeletanweni ni le mintsombanweni. Ha swi lemuka leswaku to tala ta tinsimu leti ti sekeriwe eka rungula leri huhuteriweke leri humaka ebukwini ya Tipisalema. Ha tsaka swinene leswi hi nga ni tinsimu leti hlengeletiweke leti nga enkarhini ti tlhela ti khutaza, leti dzunisaka Yehovha! Ku yimbelelela Xikwembu swidzuniso i xivangelo  xin’wana lexinene ngopfu xa leswaku hi fika ka ha ri na nkarhi eminhlanganweni ya hina hi tlhela hi tshama ku fikela loko yi hela, xisweswo hi hlanganyela ni vapfumeri-kulorhi eku dzuniseni ka Yehovha hi risimu ni hi xikhongelo.

“Dzunisani Yah!”

8. Xana rito “Aleluya” ri vula yini?

⁸ Ku dzunisa Yehovha swi hlamuseriwe hi ku kongoma eka rito “Aleluya,” ku nga vuhundzuluxeri bya rito ra Xiheveru leri minkarhi hinkwayo ri hundzuluxeriwaka ri va “Dzunisani Yah.” Hi xikombiso, eka Pisalema 135:1-3, hi kuma xirhambo lexi xa rirhandzu lexi nge: “Dzunisani Yah! Dzunisani vito ra Yehovha, n’wi dzuniseni, N’wina malandza ya Yehovha, n’wina lava yimaka endlwini ya Yehovha, eswivaveni swa yindlu ya Xikwembu xa hina. Dzunisani Yah, hikuva Yehovha hi lonene. Yimbelelelani vito rakwe miloti, hikuva i rinene.”

9. I yini lexi hi susumetelaka ku dzunisa Yehovha?

⁹ Loko hi ri karhi hi anakanyisisa hi mintirho leyi hlamarisaka ya Xikwembu yo tumbuluxa swin’we ni swiendlo swa xona hinkwaswo leswi xi hi endleleke swona, ku tlangela loku humaka embilwini ku hi susumetela ku xi dzunisa. Loko hi anakanya hi masingita lawa Yehovha a ma endleleke vanhu va yena enkarhini lowu hundzeke, timbilu ta hina ti hi susumetela ku n’wi dzunisa. Naswona loko hi anakanyisisa hi switshembiso swa swilo leswikulu leswi Yehovha a nga ta swi endla, hi lava tindlela to n’wi dzunisa hi tlhela hi n’wi nkhensa.

10, 11. Xana vukona bya hina hi byoxe byi hi nyika xivangelo xo dzunisa Xikwembu hi ndlela yihi?

¹⁰ Ku va kona ka hina ku hi nyika xivangelo lexi twalaka xo dzunisa Yah. Davhida u yimbelerile: “Ndzi ta ku dzunisa [Yehovha] hikuva ndzi endliwe hi ndlela yo hlamarisa, leyi chavisekaka. Mintirho ya wena ya hlamarisa, hilaha moya-xiviri wa mina wu swi lemukaka kahle hakona.” (Pisalema 139:14) Ina, hi “endliwe hi ndlela yo hlamarisa” naswona hi ni tinyiko ta risima to tanihi ku vona, ku twa ni vuswikoti bya ku anakanya. Hikwalaho, xana a hi fanelanga hi hanya vutomi bya hina hi ndlela leyi kombisaka ku dzunisa Muvumbi wa hina? Pawulo u vule marito lama fanaka loko a tsala a ku: “Hambi mi dya kumbe mi nwa kumbe mi endla yini na yini, endlani hinkwaswo leswaku mi vangamisa Xikwembu.”—1 Vakorinto 10:31.

¹¹ Loko hi rhandza Yehovha hakunene, hinkwaswo leswi hi swi endlaka hi ta swi endlela ku dzunisa yena. Yesu u vule leswaku xileriso xo sungula hi lexi nge: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo ni hi ntamu wa wena hinkwawo.” (Marka 12:30; Deteronoma 6:5) Entiyisweni hi fanele hi rhandza Yehovha hi tlhela hi n’wi dzunisa tanihi Muendli wa hina ni Munyiki wa “nyiko yin’wana ni yin’wana leyinene ni nyiko yin’wana ni yin’wana leyi hetisekeke.” (Yakobo 1:17; Esaya 51:13; Mintirho 17:28) Phela, vuswikoti bya hina byo anakanya, vuswikoti bya hina bya moya ni matimba ya hina ya le mirini—timfanelo ni vuswikoti bya hina hinkwabyo—swi huma eka Yehovha. Leswi a nga Muvumbi wa hina, hi fanele hi n’wi rhandza hi tlhela hi n’wi dzunisa.

12. U titwisa ku yini hi swiendlo leswikulu swa Yehovha swin’we ni marito ya Pisalema 40:5?

¹² Swiendlo leswikulu swa Yehovha swi hi nyika swivangelo swo tala ngopfu swo n’wi rhandza hi tlhela hi n’wi dzunisa! Davhida u yimbelerile: “U endle swilo swo tala, Oho Yehovha Xikwembu xanga, ni mintirho ya wena yo hlamarisa ni miehleketo ya wena eka hina. A nga kona la nga fanisiwaka na wena. Loko a ndzi lava ku vulavula ha yona, yi tele swinene lerova a ndzi nge yi runguli.” (Pisalema 40:5) Davhida a a nga ta yi rungula hinkwayo mintirho leyi hlamarisaka ya Yehovha, na hina a hi nge swi koti. Kambe minkarhi hinkwayo a hi dzuniseni Xikwembu loko ho tshuka hi anakanya hi swilo swin’wana swa swiendlo swa xona leswikulu.

Swiendlo Leswi Fambisanaka Ni Xikongomelo Lexi Nga Riki Na Makumu Xa Xikwembu

13. Ntshembo wa hina wu fambisana njhani ni swiendlo leswikulu swa Xikwembu?

¹³ Ntshembo wa hina wa vumundzuku wu fambisana swinene ni swiendlo leswikulu ni leswi dzunekaka leswi fambisanaka ni xikongomelo lexi nga riki na makumu xa Xikwembu. Endzhaku ka ku xandzuka ka le Edeni, Yehovha u vule vuprofeta byo sungula lebyi nyikaka ntshembo. Loko Xikwembu xi avanyisa nyoka xi te: “Ndzi ta veka vulala exikarhi ka wena ni wansati ni le xikarhi ka mbewu ya wena ni mbewu ya yena. Yi ta ku pfotlosa nhloko kutani wena u ta yi luma  xirhendze.” (Genesa 3:15) Ntshembo wa Mbewu leyi tshembisiweke ya wansati wu tshame wu ri etimbilwini ta vanhu lava tshembekaka endzhaku ka ku va Yehovha a endle xiendlo lexikulu hi ku ponisa Nowa ni ndyangu wa yena eka Ndhambi ya misava hinkwayo leyi heriseke vanhu vo homboloka. (2 Petro 2:5) Switshembiso swa vuprofeta leswi yaka eka vavanuna va ripfumelo vo tanihi Abrahama na Davhida swi va nyike ku twisisa loku engetelekeke eka leswi Yehovha a nga ta swi hetisisa hi ku tirhisa Mbewu yoleyo.—Genesa 22:15-18; 2 Samuwele 7:12.

14. Hi xihi xikombiso lexikulu xa swiendlo leswikulu swa Yehovha leswi a swi endlelaka vanhu?

¹⁴ Ku kombisiwa lokukulu ka Yehovha tanihi loyi a endlelaka vanhu swiendlo leswikulu ku endleke loko a nyikela hi N’wana wakwe la tswariweke a ri swakwe—Mbewu leyi tshembisiweke, Yesu Kreste—tanihi gandzelo ra nkutsulo. (Yohane 3:16; Mintirho 2:29-36) Gandzelo ri veke xisekelo xa ku vuyelelana ni Xikwembu. (Matewu 20:28; Varhoma 5:11) Yehovha u hlanganise vanhu lava a va ri vo sungula ku va rivalela evandlheni ra Vukreste, leri simekiweke hi Pentekosta ya 33 C.E. Hi ku pfuniwa hi moya lowo kwetsima, va chumayele mahungu lamanene etindhawini ta le kusuhi ni ta le kule, va kombisa ndlela leyi ha yona rifu ni ku pfuxiwa ka Yesu swi pfulelaka vanhu lava yingisaka ndlela yo kuma mikateko leyi nga heriki ehansi ka Mfumo wa Xikwembu wa le tilweni.

15. Yehovha u swi endle njhani swilo hi ndlela leyi hlamarisaka enkarhini wa hina?

¹⁵ Enkarhini wa hina, Yehovha u hlengelete masalela ya Vakreste lava totiweke hi ndlela leyi hlamarisaka. Timheho ta ndzoviso ti khomiwile leswaku ku ta funghiwa masalela ya lava 144 000, lava nga ta fuma na Kreste etilweni. (Nhlavutelo 7:1-4; 20:6) Xikwembu xi endle leswaku Vakreste lava totiweke va kutsuriwa evuhlongeni bya moya bya “Babilona Lonkulu,” ku nga mfumo wa misava wa vukhongeri bya mavunwa. (Nhlavutelo 17:1-5) Ku ntshunxiwa koloko ka vona hi 1919 swin’we ni ku sirheleriwa hi Xikwembu ku sukela hi nkarhi wolowo, swi endle leswaku masalela lama totiweke ma kota ku endla yini? Ku vangama eku nyikeleni ka vumbhoni byo hetelela, loko Yehovha a nga si ma herisa mafambiselo lawa yo biha ya swilo eka “nhlomulo lowukulu” lowu tshinelaka hi ku hatlisa.—Matewu 24:21; Daniyele 12:3; Nhlavutelo 7:14.

16. I yini leswi humelelaka hikwalaho ka ku chumayeriwa ka Mfumo emisaveni hinkwayo loku endlekaka namuntlha?

¹⁶ Timbhoni ta Yehovha leti totiweke, hi ku hiseka ti rhangerile entirhweni wo chumayela hi Mfumo emisaveni hinkwayo. Hikwalaho ka sweswo, nhlayo leyi kulaka ya “tinyimpfu tin’wana” yi hundzuka vagandzeri va Yehovha. (Yohane 10:16) Ha tsaka hikuva nkarhi wa ha ri kona wa leswaku lava titsongahataka lava nga emisaveni va hlanganyela na hina eku dzuniseni ka Yehovha. Lava va amukelaka xirhambo lexi nge “tana” va ta ponisiwa eka nhlomulo lowukulu, va ri ni ntshembo wo dzunisa Yehovha hilaha ku nga heriki.—Nhlavutelo 22:17.

Magidi Ma Khitikanela eVugandzerini Bya Ntiyiso

17. (a) Yehovha u endla swiendlo leswikulu malunghana ni ntirho wa hina wo chumayela? (b) Zakariya 8:23 yi hetiseka hi ndlela yihi?

¹⁷ Yehovha sweswi u endla swiendlo leswikulu ni leswi dzunekaka leswi fambisanaka ni ntirho wa hina wa ku chumayela. (Marka 13:10) Emalembeni ya sweswinyana u ‘pfule tinyangwa letikulu leti yisaka entirhweni.’ (1 Vakorinto 16:9) Leswi swi endle leswaku swi koteka ku twarisa mahungu lamanene etindhawini letikulu laha valala va ntiyiso a va ri swihinga. Vanhu vo tala lava tshameke va va emunyameni wa moya sweswi va amukela xirhambo xa leswaku va ta gandzela Yehovha. Va hetisisa marito lawa ya vuprofeta: “Yehovha wa mavuthu u te, ‘Emasikwini wolawo vavanuna va khume lava humaka eka tindzimi hinkwato ta matiko va ta khoma, ina, entiyisweni va ta khoma nguvu ya wanuna la nga  Muyuda, va ku: “Hi ta famba na n’wina, hikuva hi swi twile leswaku Xikwembu xi na n’wina.”’” (Zakariya 8:23) “Vavanuna va khume” lava ku vulavuriwa ha vona laha i Vayuda va moya, Vakreste lava totiweke lava nga masalela ya manguva lawa. Leswi nhlayo ya khume yi nga yimelaka ku hetiseka ka laha misaveni, “vavanuna va khume” va yimela “ntshungu lowukulu” lowu hlanganisiweke na “Israyele wa Xikwembu,” kutani va va “ntlhambi wun’we.” (Nhlavutelo 7:9, 10; Vagalatiya 6:16) Swa tsakisa swinene ku vona vanhu vo tala sweswi va endla ntirho wo kwetsima va ri swin’we tanihi vagandzeri va Yehovha Xikwembu!

18, 19. Hi byihi vumbhoni lebyi nga kona bya leswaku Yehovha u katekisa ntirho wo chumayela?

¹⁸ Ha tsaka leswi ku nga ni vanhu va makume ya magidi—ina, madzana ya magidi—lava amukeleke vugandzeri bya ntiyiso ematikweni lawa a ma lawuriwa ngopfu hi vukhongeri, a swi vonaka onge a ku nge pfuki ku ve ni vanhu lava nga ta amukela mahungu lamanene. Languta Buku Ya Lembe Ya Timbhoni Ta Yehovha ya sweswinyana, u vona matiko lawa sweswi ma nga ni vahuweleri va Mfumo vo sukela eka 100 000 ku ya kwalomu ka 1 000 000. Lebyi i vumbhoni lebyikulu bya leswaku Yehovha u katekisa ntirho wo chumayela hi Mfumo.—Swivuriso 10:22.

¹⁹ Hina vanhu va Yehovha, hi dzunisa hi tlhela hi nkhensa Tata wa hina wa le tilweni hi ku hi nyika xikongomelo xa xiviri evuton’wini, ntirho lowu vuyerisaka entirhweni wa yena ni ku hi nyika ntshembo lowu vangamaka wa vumundzuku. Hi hanya hi ri karhi hi ku langutele hi mahlo-ngati ku hetiseka ka switshembiso swa Xikwembu hinkwaswo naswona hi tiyimisele ku ‘tihlayisa erirhandzwini ra Xikwembu hi ri ni xikongomelo xa vutomi lebyi nga heriki.’ (Yudha 20, 21) Ha tsaka swinene ku vona leswaku ntshungu lowukulu lowu dzunisaka Xikwembu sweswi wu fika kwalomu ka 6 000 000! Hi ku katekisiwa hi Yehovha loku vonakaka, masalela ya vatotiwa swin’we ni vanakulobye va vona va tinyimpfu tin’wana va hlengeletana emavandlheni ya kwalomu ka 91 000 ematikweni ya 235. Hinkwerhu ka hina hi wundliwa kahle hi tlhelo ra moya hikwalaho ka matshalatshala lamakulu ya “hlonga ro tshembeka ni ro tlhariha.” (Matewu 24:45) Nhlengeletano ya swa le tilweni leyi yaka emahlweni leyi nga ni vulanguteri bya rirhandzu yi langutela ntirho wa Mfumo etihofisini ta marhavi ta Timbhoni ta Yehovha ta 110. Hi nkhensa Yehovha leswi a susumeteleke timbilu ta vanhu va yena leswaku ti ‘n’wi xixima hi swilo swa vona swa nkoka.’ (Swivuriso 3:9, 10) Hikwalaho, ntirho wa hina wo chumayela emisaveni hinkwayo wu ya emahlweni, ku karhi ku akiwa miako yo kandziyisela eka yona, makaya ya Bethele ni ya varhumiwa, Tiholo ta Mfumo ni Tiholo ta Tinhlengeletano loko ti laveka.

20. Ku anakanyisisa hi swiendlo leswikulu swa Yehovha, leswi dzunekaka, ku fanele ku hi khumba njhani?

²⁰ A hi nge swi koti ku swi boxa hinkwaswo swiendlo leswikulu ni leswi dzunekaka swa Tata wa hina wa le tilweni. Kambe, xana un’wana ni un’wana la nga ni mbilu leyinene a nga tshika ku hlanganyela ni ntshungu wa vagandzeri va Yehovha? A nge swi endli sweswo! Hikwalaho, varhandzi hinkwavo va Xikwembu a va huwelele va ku: “Dzunisani Yah! Dzunisani Yehovha la nge matilweni, n’wi dzuniseni eku tlakukeni. N’wi dzuniseni, n’wina tintsumi takwe hinkwato . . . , n’wina majaha na n’wina vanhwana, n’wina vakulukumba na n’wina vafana. A va dzunise vito ra Yehovha, hikuva vito rakwe ri ri roxe ri le henhla laha ku nga fikeleriwiki. Xindzhuti xakwe xi le henhla ka misava ni tilo.” (Pisalema 148:1, 2, 12, 13) Ina, a hi dzuniseni Yehovha hikwalaho ka swiendlo swa yena leswikulu sweswi ni hilaha ku nga heriki!

A Wu Ta Hlamurisa Ku Yini?

• Hi swihi swiendlo swin’wana swa Yehovha leswi dzunekaka?

• Ha yini u titwa u susumeteleka ku dzunisa Yehovha?

• Ntshembo wa hina wu hlangana njhani ni swiendlo leswikulu swa Xikwembu?

• Yehovha u endla swiendlo leswi dzunekaka malunghana ni ntirho wo chumayela hi Mfumo hi ndlela yihi?

[Swivutiso Swa Dyondzo]

[Xifaniso eka tluka 10]

Xana u hlanganyela hi mbilu hinkwayo eku yimbeleleni ka swidzuniso swa Yehovha?

[Swifaniso eka tluka 13]

Ha tsaka leswi nkarhi wa ha riki kona wa leswaku vanhu lava titsongahataka va hlanganyela na hina eku dzuniseni ka Yehovha