Dyondzo Ya Bibele—Xana Yi Nga Ku Pfuna?

“A YI fanelanga yi hlayiwa loko muprista a nga ri kona.” Xitsundzuxo lexi xi kumeka emasungulweni ya Tibibele tin’wana ta Makhatoliki. Kay Murdy wa Xikolo xa Bibele ya Khatoliki le Los Angeles, u te: “Hina Makhatoliki a hi nga tali ku khoma Bibele, kambe sweswi swilo se swa cinca.” U vula leswaku loko Makhatoliki ma kala ma xiya ndlela leyi Matsalwa yo Kwetsima ma nga byi khumbaka ha yona vutomi bya wona, “ma va ni ndlala ni torha ra Bibele.”

Malunghana ni ku cinca loku, magazini lowu nge U.S. Catholic wu tshaha muungameri wa dyondzo ya vukhongeri loyi a vuleke leswaku Makhatoliki lama ngheneleke mintlawa ya ku dyondza Bibele, a ma titwa “ma tsoniwe swo karhi hikwalaho ka ku va ma ri Makhatoliki, ni leswaku ku ni rifuwo ro tala eBibeleni. Ma lava ku kuma rin’wana ra rifuwo leri ma vonaka onge ma tsoniwe rona.”

Ku nga khathariseki leswaku swona hi swihi, hi rihi “rifuwo” leri xichudeni xa Bibele xi nga ri kumaka? Anakanya hi leswi: Xana u nga swi tsakela ku tiva leswaku u nga langutana njhani ni mivilelo ya siku ni siku ya vutomi? U nga ku hlayisa njhani ku rhula endyangwini? Ha yini ku ri ni ku delela ni tihanyi letikulu swonghasi? I yini lexi vangelaka leswaku vantshwa va namuntlha va va ni madzolonga? Tinhlamulo leti tshembekaka ta swivutiso leswi ni swin’wana leswi pfilunganyaka ti kumeka eRitweni ra Xikwembu, ku nga Bibele, naswona ti nga va “rifuwo” hakunene, ku nga ri ra Makhatoliki kumbe Maprotestente ntsena kambe ni ra Mabudha, Mahindu, Mamoslem, Mashinto, hambi ku ri lava nge Xikwembu a xi kona swin’we ni lava nge Xikwembu a xi tiviwi. Hilaha mupisalema a swi vekaka hakona, ‘rito ra Xikwembu a ri ri rivoningo enengeni wa yena, ni ku vonakala endleleni ya yena.’ Na wena ri nga ku endlela leswi fanaka.—Pisalema 119:105.