Swivutiso Swa Vahlayi

Tanihi leswi Yehovha a tiyimiseleke ku rivalela swidyoho exisekelweni xa gandzelo ra nkutsulo, ha yini swi ri swa nkoka leswaku Vakreste va byela vakulu swidyoho swa vona evandlheni?

Hilaha swi nga voniwaka hakona emhakeni ya Davhida na Bati-xeba, Yehovha u rivalele Davhida xidyoho xakwe hikwalaho ka ku hundzuka kakwe ka xiviri, hambileswi a xi ri xikulu, hikuva Davhida u hundzukile hakunene. Loko muprofeta Natani a n’wi endzerile, Davhida u vule swidyoho swakwe erivaleni, a ku: “Ndzi dyohele Yehovha.”––2 Samuwele 12:13.

Phela, Yehovha a nga amukeli ntsena ku tiphofula ka vadyohi ivi a va rivalela, kambe u ni malunghiselelo ya rirhandzu ya ku pfuna la dyoheke leswaku a hlakarhela hi tlhelo ra moya. Davhida u pfuniwe hi muprofeta Natani. Namuntlha, evandlheni ra Vukreste, ku ni vakulukumba lava wupfeke hi tlhelo ra moya kumbe vakulu. Mudyondzisiwa Yakobo wa hlamusela: “Xana u kona loyi a vabyaka [hi tlhelo ra moya] exikarhi ka n’wina? A a vitane vakulukumba va vandlha, kutani a va n’wi khongelele, va n’wi tota mafurha hi vito ra Yehovha. Kutani xikhongelo xa ripfumelo xi ta hanyisa la nga pfukiki swinene, naswona Yehovha u ta n’wi pfuxa. Nakambe, loko a lo endla swidyoho, u ta rivaleriwa swona.”––Yakobo 5:14, 15.

Vakulu lava nga ni vutshila va nga n’wi chavelela swinene mudyohi la tisolaka. Va lwela ku tekelela Yehovha  loko va lulamisa timhaka ni mudyohi. A va karihi, hambiloko va boheka ku nyikela ndzayo ya matimba. Ematshan’weni ya sweswo, va tirhisa musa ku kambela swilaveko swa munhu la dyoheke. Va lehisa mbilu va ri karhi va lwela ku ololoxa miehleketo ya munhu la dyoheke, hi ku tirhisa Rito ra Xikwembu. (Vagalatiya 6:1) Hambiloko munhu yoloye a nga boxi xidyoho xakwe hi ku tirhandzela, a nga ha hundzuka loko a endzeriwa hi vakulu, ku fana na Davhida loko a endzeriwe hi Natani. Nseketelo lowu nyikeriwaka hi vakulu wu pfuna lava dyohaka leswaku va papalata khombo ro endla xidyoho lexi fanaka ni mimbuyelo yo biha ya ku sihalala exidyohweni.––Vaheveru 10:26-31.

A swi olovi nikatsongo ku byela van’wana swiendlo swa wena leswi ku nyumisaka kumbe ku kombela ku rivaleriwa. Swi lava matimba ya moya. Kambe, ehleketa hi loyi a nga xi paluxangiki xidyoho xakwe. Wanuna un’wana loyi a nga xi paluxangiki xidyoho xakwe lexikulu evandlheni, u te: “Ndzi twe ku vava loku a ku nga heli embilwini ya mina. Ndzi gingiriteke ngopfu entirhweni wo chumayela, kambe a ndzi tshama ndzi hele matimba, ndzi titwa ndzi ri mudyohi.” A a vona onge swi ringene ku phofula xidyoho xakwe eka Xikwembu hi xikhongelo, kambe a swi nga ri tano nikatsongo, hikuva u titwe hi ndlela leyi fanaka ni leyi Hosi Davhida a titweke ha yona. (Pisalema 51:8, 11) Kunene swa antswa swinene ku amukela mpfuno lowu Yehovha a wu nyikelaka hi ku tirhisa vakulu!