“Timbanga Leti Endliwaka Hi Munghana”

MUAPOSTOLA Pawulo u vone xilaveko xo nyikela ndzayo yo karhi eka Vakreste va le Galatiya va lembe-xidzana ro sungula. Kumbexana leswaku a sivela ku hlundzuka, u vutisile: “Kutani, xana ndzi hundzuke nala wa n’wina hikwalaho ka leswi ndzi mi byelaka ntiyiso?”—Vagalatiya 4:16.

Pawulo a nga hundzukanga nala wa vona hikwalaho ko ‘va byela ntiyiso.’ Entiyisweni, a a endla hi ku pfumelelana ni nsinya wa nawu wa Bibele lowu nge: “Timbanga leti endliwaka hi munghana ta tshembeka.” (Swivuriso 27:6, King James Version) A a swi tiva leswaku vutikukumuxi bya lava dyohaka byi nga khumbiwa. Kambe, a swi xiya leswaku ku nga tshinyi mudyohi swi nga ha vula leswaku a nge kombisiwi rirhandzu ra Yehovha Xikwembu. (Vaheveru 12:5-7) Hikwalaho, tanihi munghana la tshembekaka loyi entiyisweni a a ri rhandza swinene vandlha leri, Pawulo a nga tshikanga ku ri nyika ndzayo.

Namuntlha, Timbhoni ta Yehovha ti hetisisa xiavelo xa tona xo “endla vanhu va matiko hinkwawo va va vadyondzisiwa, [ti] va dyondzisa ku hlayisa swilo hinkwaswo leswi [Yesu Kreste a ti] leriseke swona.” Hi ku endla sweswo, Vakreste lava va tshembekaka a va bakanyi ntiyiso wa Bibele lowu paluxaka wu tlhela wu sola tidyondzo leti hoxeke ni mahanyelo lawa ma nga riki ya Vukreste. (Matewu 15:9; 23:9; 28:19, 20; 1 Vakorinto 6:9, 10) Ematshan’weni ya ku va valala lava nga ta landzuriwa, ti ti kombisa ti ri vanghana va xiviri.

Mupisalema u tsarile a huhuteriwe hi ku twisisa ka vukwembu, a ku: “Loko lowo lulama a ndzi ba, ku ta va musa wa rirhandzu; loko a ndzi tshinya, ku ta va mafurha ehenhla ka nhloko, lawa nhloko yi nga ta ka yi nga ma ali.”—Pisalema 141:5.