Hikwalaho Ka Yini U Dyondza Bibele?
Hikwalaho Ka Yini U Dyondza Bibele?
BILL a a ri jaha leri kotaka ku tlanga mintlango, a dyondzekile naswona a yime kahle hi timali. Kambe a a nga enerisekanga. Vutomi byakwe a byi nga ri na xikongomelo kutani sweswo a a swi n’wi dya swinene. Hi ku lava ku kuma xikongomelo evuton’wini, u kambisise vukhongeri byo hambana-hambana, kambe ko fana na kwala. Hi 1991 u hlangane ni Mbhoni ya Yehovha leyi n’wi siyeleke buku leyi vulavulaka hi leswi Bibele yi swi vulaka malunghana ni xikongomelo xa vutomi. Ku endliwe malunghiselelo ya dyondzo ya Bibele leswaku Bill a ta hlamuleka xivutiso lexi ku katsa ni swin’wana.
Bill wa tsundzuka: “Eka dyondzo ya hina yo sungula, ndzi swi vonile leswaku leswi hi leswi a ndzi lava swona hikuva a hi tshamela ku ya eBibeleni. Tinhlamulo leti a ti huma eBibeleni a ti tsakisa swinene. Endzhaku ka dyondzo yoleyo, ndzi chayele movha ya mina ndzi ya etintshaveni, hi loko ndzi fika ndzi xika emovheni kutani ndzi xiririka mihloti ya ntsako. A ndzi tsakile leswi ndzi nga hetelela ndzi kume tinhlamulo ta swivutiso swa mina.”
Ina, a hi hinkwavo lava rilaka hikwalaho ko tsaka loko va kuma ntiyiso wa Bibele. Kambe ku kuma tinhlamulo ta swivutiso swa nkoka evuton’wini i nchumu lowu tisaka ntsako eka vo tala. Va titwa ku kota wanuna wa le xifanisweni xa Yesu loyi a kumeke xuma lexi fihliweke ensin’wini. Yesu u te: “Hikwalaho ka ntsako lowu a nga na wona, a famba a ya xavisa swilo leswi a nga na swona kutani a xava nsimu yoleyo.”—Xilotlelo Xa Vutomi Lebyi Nga Ni Xikongomelo
Bill u dye marhambu ya nhloko hi xivutiso lexi xa nkoka, Xana xikongomelo xa vutomi i yini? Vativi va filosofi, vafundhisi ni vativi va sayense va tlhuvutse xivutiso lexi hi magidi ya malembe. Ku tsariwe tivholumo ta ntsandza-vahlayi hi vanhu lava ringetaka ku xi hlamula. Matshalatshala ya vona ma hundzuke ya hava naswona vo tala va gimete hi leswaku xivutiso lexi xi hava nhlamulo. Kambe nhlamulo yi kona. Hambi leswi yi enteke kambe a yi rharhangananga. Yi hlamuseriwe eBibeleni. Xilotlelo xo kuma vutomi byo tsakisa lebyi nga ni xikongomelo hi lexi: Hi fanele hi va ni vuxaka lebyinene na Yehovha, Muvumbi wa hina ni Tatana wa le tilweni. Xana hi nga swi kotisa ku yini sweswo?
Ku ni tindlela timbirhi to tshinela ekusuhi ni Xikwembu, leti vonakaka ti hambana. Lava va tshinelaka ekusuhi na xona va xi xixima va tlhela va xi rhandza. A hi languteni matsalwa mambirhi lama seketelaka xivulwa lexi. Khale ka khaleni Hosi Solomoni wa vutlhari u endle nkambisiso wa vukheta hi vanhu hiloko a tsala leswi a swi kumeke ebukwini ya Bibele ya Eklesiasta. Loko a katsakanya leswi a swi xiyeke u tsarile: “Loko hinkwaswo swi twiwile, makumu ya mhaka hi lawa: Chava Xikwembu xa ntiyiso u hlayisa swileriso swa xona. Hikuva leyi hi yona mfanelo hinkwayo ya munhu.” (Eklesiasta 12:13) Endzhakunyana ka malembe-xidzana loko Yesu a vutisiwa leswaku hi wihi nawu lowukulu eNawini lowu nyikiweke Muxe, u te: “U fanele u rhandza Yehovha Xikwembu xa wena hi mbilu ya wena hinkwayo ni hi moya-xiviri wa wena hinkwawo ni hi mianakanyo ya wena hinkwayo.” (Matewu 22:37) Xana a swi ku hlamarisi leswaku hi fanele hi chava Xikwembu hi tlhela hi xi rhandza? A hi kambisiseni nkoka wa xichavo ni rirhandzu ni leswaku swi tirhisana njhani leswaku swi kota ku humesa vuxaka lebyi enerisaka ni Xikwembu.
Leswi Ku Chava Xikwembu Swi Vulaka Swona
Xichavo i xa nkoka loko hi gandzela Xikwembu hi ndlela leyi amukelekaka. Bibele yi ri: “Ku chava Yehovha i masungulo ya vutlhari.” (Pisalema 111:10) Muapostola Pawulo u tsarile: “A hi yeni emahlweni hi kuma musa lowu nga faneriwiki, lowu ha wona hi nga ha endlelaka Xikwembu ntirho wo kwetsima hilaha ku amukelekaka hi nchavo lowu nga ni vukwembu ni ku xixima.” (Vaheveru 12:28) Hilaha ku fanaka, ntsumi leyi voniweke exivonweni empfhukeni hi muapostola Yohane yi sungule ku huwelela ka yona mahungu lamanene hi marito lawa: “Chavani Xikwembu mi xi vangamisa.”—Nhlavutelo 14:6, 7.
Ku chava Xikwembu, loku nga ka nkoka evuton’wini lebyi nga ni xikongomelo a ku fani ni nchavo wa ku rhurhumela. Hi nga ha rhurhumela loko hi xungetiwa hi khamba leri nga ni tihanyi ni leri nga ni khombo. Kambe ku chava Xikwembu—i ku xixima Muvumbi. Swi tlhela swi katsa xichavo lexinene xo hlundzukisa Xikwembu hikuva i Muavanyisi Lonkulu ni Lowa Matimba Hinkwawo loyi a nga ni matimba ni vulawuri byo xupula lava nga yingisiki.
Xichavo Ni Rirhandzu Swa Fambisana
Hambiswiritano Yehovha a nga lavi leswaku vanhu va n’wi tirhela hileswi va n’wi chavaka. Yehovha u tiveka tanihi Xikwembu xa rirhandzu. Muapostola Yohane u susumeteleke ku tsala a ku: “Xikwembu i rirhandzu.” (1 Yohane 4:8) Yehovha Xikwembu u tirhisane ni vanhu hi rirhandzu naswona u lava leswaku vanhu na vona va n’wi rhandza. Kambe, xana rirhandzu rero ri fambisana njhani ni ku chava Xikwembu? Swilo leswi haswimbirhi swa fambisana. Mupisalema u tsarile: “Lava va vaka ni xinakulobye na Yehovha hi lava va n’wi chavaka.”—Pisalema 25:14.
Ehleketa ndlela leyi n’wana a n’wi xiximaka ha yona tata wa yena la hanyeke kahle ni loyi a nga ni vutlhari. Hi nkarhi lowu fanaka, n’wana yoloye u ta tsakela rirhandzu ra tata wa yena. N’wana yoloye u ta tshemba tata wa yena naswona a langutela ku kuma nkongomiso lowu humaka eka yena, a ri ni ntshembo wa leswaku nkongomiso lowu wu ta n’wi vuyerisa. Hilaha ku fanaka loko hi rhandza ni ku xixima Yehovha hi ta yingisa nkongomiso wa yena naswona leswi swi ta hi vuyerisa. Xiya leswi Yehovha a swi vuleke malunghana ni Vaisrayele: “Loko ntsena vo endla leswaku mbilu ya vona yi ndzi chava naswona yi hlayisa swileriso swa mina hinkwaswo nkarhi hinkwawo, ku endlela leswaku swi ta va fambela kahle, vona ni vana va vona, hilaha ku nga riki na makumu!”—Deteronoma 5:29.
Ina, ku chava Xikwembu a ku ku endli hlonga kambe u va la ntshunxekeke, a ku ku hlunamisi kambe ku ku tisela ntsako. Esaya u profetile malunghana na Yesu a ku: “U ta tiphina hi ku chava Yehovha.” (Esaya 11:3) Naswona mupisalema u tsarile: “Wa tsaka munhu la chavaka Yehovha, la tsakisiwaka swinene hi swileriso swakwe.”—Pisalema 112:1.
Handle ko kanakana, hi nga ka hi nga xi xiximi Xikwembu kumbe ku xi rhandza loko hi nga xi tivi. Hi yona mhaka swi nga swa nkoka ku dyondza Bibele. Dyondzo ya muxaka lowu yi hi pfuna ku twisisa vumunhu bya Xikwembu kutani hi tlangela vutlhari byo landzela nkongomiso wa xona. Loko hi ya hi tshinela kusuhi ni Xikwembu, hi lava ku endla ku rhandza ka xona naswona hi susumeteleka ku hlayisa swileriso swa xona hi ku tiva leswaku swi ta hi pfuna.—1 Yohane 5:3.
Swa tsakisa ku tiva leswaku u le ndleleni leyinene ya vutomi. Swi tano hi Bill loyi ku vulavuriweke ha yena eku sunguleni. Wa ha ku vula leswi: “Emalembeni ya kaye lama hundzeke ku sukela eka dyondzo ya mina ya Bibele yo sungula, vuxaka bya mina na Yehovha byi kurile. Leswi eku sunguleni ndzi xiririkeke mihloti hikwalaho ka ntsako, ntsako wolowo wu kurile lerova ndzi hanya ha wona. Ndzi tshama ndzi ri ni langutelo lerinene hi vutomi. Ndzi tshama ndzi khomekile hi mintirho leyi nga ndzi vuyerisaka, ku nga ri ku lavisisa mintsako leyi nga pfuniki nchumu. Yehovha u hundzuke munhu wa xiviri eka mina naswona ndza swi tiva leswaku u ndzi navelela leswinene.”
Eka xihloko lexi landzelaka, hi ta ya emahlweni hi hlamusela ndlela leyi ku kuma vutivi bya Yehovha swi tisaka ntsako swi tlhela swi vuyerisa ha yona eka lava byi tirhisaka evuton’wini bya vona.
[Nkomiso eka tluka 5]
Ku tshinelela Xikwembu swi vula leswaku hi fanele hi xi rhandza Hi tlhela hi xi xixima
[Xifaniso eka tluka 6]
Yesu a tsakela ku chava Yehovha