Mpfuno Wo Twisisa Bibele

BIBELE i buku yo hlawuleka. Vatsari va yona va vula leswaku va huhuteriwe hi Xikwembu naswona rungula ra yona ri nyika vumbhoni lebyi twalaka bya leswaku va tiyisile. (2 Timotiya 3:​16) Swin’wana leswi Bibele yi swi boxaka hi laha hi humaka kona na leswaku hikwalaho ka yini hi ri laha naswona hi byihi vumundzuku bya hina. Kunene i buku leyi faneriwaka hi leswaku hi yi kambisisa!

Kumbexana u tshama u ringeta ku hlaya Bibele kambe u kume swi ku tikela ku yi twisisa. Kumbexana a wu swi tivi leswaku u nga ti kuma kwihi tinhlamulo ta swivutiso swa wena. Loko swi ri tano a wu wexe. Xiyimo xa wena xi fana ni xa wanuna loyi a hanyeke eka lembe-xidzana ro sungula. A a famba hi kalichi a suka eYerusalema a tlhelela etikweni ra rikwavo aEtiyopiya. Mutirhela-mfumo loyi wa Muetiyopiya a a yi hlayela ehenhla buku ya vuprofeta ya Bibele ya Esaya, leyi se a yi ri ni malembe lama tlulaka 700 yi tsariwile.

Hi xitshuketa, u xewetiwe hi wanuna loyi a a tsutsuma etlhelo ka kalichi ya yena. Wanuna wa kona a ku ri Filipi, mudyondzisiwa wa Yesu kutani u vutise Muetiyopiya a ku: “Xana kahle-kahle wa swi tiva leswi u swi hlayaka?” Hi loko Muetiyopiya a hlamula a ku: “Kunene, xana ndzi nga swi tivisa ku yini, handle ka loko ndzi kongomisiwa hi un’wana?” Kutani a kombela Filipi leswaku a khandziya ekalichini. Filipi u hlamusele ndzimana leyi a yi hlayiwa hi wanuna loyi kutani a ya emahlweni a n’wi byela hi “mahungu lamanene malunghana na Yesu.”​—⁠Mintirho 8:​30-⁠35.

Tanihi leswi Filipi a pfuneke Muetiyopiya ku twisisa Rito ra Xikwembu khale koloko, Timbhoni ta  Yehovha ti pfuna vanhu ku twisisa Bibele namuntlha. Va nga swi tsakela ku ku pfuna na wena. Hi ntolovelo i swinene ku dyondza Bibele hi ntlhandlamano, u sungula hi dyondzo ya masungulo ya Matsalwa. (Vaheveru 6:⁠1) Loko u ri karhi u endla nhluvuko, u ta kota ku dya leswi muapostola Pawulo a swi vitaneke “swakudya leswi tiyeke”​—⁠ku nga mintiyiso leyi enteke. (Vaheveru 5:​14) Hambileswi u dyondzaka Bibele, tibuku tin’wana​—⁠leti nga swipfuneti swa ku dyondza Bibele⁠—​ti nga ku pfuna ku kuma ni ku twisisa tindzimana ta Bibele leti vulavulaka hi tinhloko-mhaka to hambana-hambana.

Hi ntolovelo ku nga hleriwa dyondzo hi nkarhi lowu nga ta pfumelelana na wena, naswona endhawini leyi faneleke. Van’wana va dyondza hi ku tirhisa riqingho. Dyondzo leyi a yi endliwi ku fana ni le kamareni ro dyondzela eka rona; i lunghiselelo leri endliwaka hi ndlela leyi nga ta pfumelelana ni swiyimo swa wena, ku katsa ni ndhavuko wa wena ni mpimo wa dyondzo ya wena. A swi kali swi lava leswaku u yi hakelela dyondzo yoleyo ya Bibele. (Matewu 10:⁠8) A ku tsariwi swikambelo naswona a nga kona la nga ku khomisaka tingana. Swivutiso swa wena swi ta hlamuriwa naswona u ta dyondza ndlela leyi u nga tshinelaka ha yona eka Xikwembu. Kambe hikwalaho ka yini u fanele u dyondza Bibele? Xiya swivangelo swin’wana leswi kombisaka ndlela leyi ku dyondza Bibele swi nga engetelaka ntsako evuton’wini bya wena ha yona.