Swiendlakalo Leswi Nga Rivalekiki

TIMBHONI ta Yehovha ta hlangana lembe rin’wana ni rin’wana ematikweni ya tona yo hambana-hambana etinhlengeletanweni ta Vukreste ni le mintsombanweni. Ti endla leswi leswaku ti tsakela dyondzo leyi akaka hi tlhelo ra moya ni vunghana. Kambe tidyondzo tin’wana ta tinhlengeletano ta tona ti nga ha siya swilo leswi nga rivalekiki eka vaendzi.

Hi xikombiso, hi July 1999, magidi ya Timbhoni ta le Mozambhiki ma hlengeletanile ku ringana masiku manharhu lama fuwisaka eNtsombanweni wa Muganga lowu a wu ri ni nhloko-mhaka leyi nge: “Rito Ra Xikwembu Ra Vuprofeta.” Vo tala va lava a va ri kona a vo sungula ku va entsombanweni. A va tsakisiwanga hi leswi va swi tweke eplatifomo ntsena kambe ni hi leswi va swi voneke.

Nhlamuselo yin’wana leyi vuriweke eHolweni ya Nhlengeletano ya le Maputo hi leyi nge: “A ndzi si tshama ndzi vona ndhawu yo saseka ku fana ni leyi evuton’wini bya mina! Swihambukelo swa kona a swi ri ni swisibi ni swivoni, naswona a swi nun’hwela kahle. Ndhawu leyi a yi rhurile ku ri hava ni pongo ra ku lwa ka vana. Naswona vanhu a va nga tlimbananga! Ndzi vone vantshwa lava tsakeke va ri karhi va burisana hi ndlela leyi khutazaka. Ndzi tlhele ndzi tsakisiwa hi ndlela leyi un’wana ni un’wana a a ambale kahle ha yona. Enkarhini lowu taka, ndzi ta ta ni vana vanga ndzi tlhela ndzi khorwisa ni nuna wanga leswaku hi fanele hi ya entsombanweni lowu.”

Ina, vutshembeki ni ku basa ka Timbhoni ta Yehovha ka voniwa. Ha yini Timbhoni ti hambanile ni van’wana? Hikuva ti ringeta hi matimba ku tirhisa leswi ti swi dyondzaka eBibeleni. Hikwalaho ka yini u nga yi emintsombanweni ya tona ya nan’waka ya le tikweni ra ka n’wina kumbe eminhlanganweni ya tona ya vhiki ni vhiki eHolweni ya Mfumo ya le kusuhi leswaku u ya tivonela hi wexe?

[Xifaniso eka tluka 32]

ZAMBIA

[Xifaniso eka tluka 32]

KENYA

[Xifaniso eka tluka 32]

MOZAMBHIKI