Mi Yima Mi Hetiseka Naswona Mi Va Ni Ku Khorwiseka Loku Tiyeke

Ku Pfuna Vantshwa Hi Ndzetelo Lowu Fikeke Hi Nkarhi

EPAFRASI a a ri Mukreste wa lembe-xidzana ro sungula la endzeleke eRhoma. Hambiswiritano, miehleketo yakwe a yi nga suki eKolosa, doroba leri a ri ri eAsia Minor. U chumayele mahungu lamanene kwale naswona a swi kanakanisi leswaku u pfune Vakolosa van’wana leswaku va va vadyondzisiwa va Yesu Kreste. (Vakolosa 1:7) Epafrasi a a nga dyi byi rhelela loko a ehleketa hi vapfumeri-kulobye va le Kolosa, hikuva muapostola Pawulo u va tsalele papila a ri eRhoma a ku: “Epafrasi . . . wa mi rungula, nkarhi hinkwawo u tikarhatela n’wina eswikhongelweni swakwe, leswaku eku heteleleni mi yima mi hetiseka naswona mi va ni ku khorwiseka loku tiyeke hi ku rhandza ka Xikwembu hinkwako.”—Vakolosa 4:12.

Hilaha ku fanaka, vatatana na vamanana va Vakreste va namuntlha va khongelela hi mbilu hinkwayo leswaku vana va vona va sirheleleka hi tlhelo ra moya. Vatswari lava va lwela ku byala rirhandzu ra Xikwembu etimbilwini ta vana va vona leswaku va ta yima va tiyile eripfumelweni.

Vantshwa vo tala va Vakreste va kombele mpfuno wa ku tlhuvutsana ni mintlhontlho leyi va langutanaka na yona exikolweni ni le tindhawini tin’wana. Nhwanyana un’wana wa malembe ya 15 hi vukhale u te: “Swiphiqo swa hina swi ya swi nyanya. Vutomi byi khomisa rhumbyana. Hi lava mpfuno!” Xana swikombelo swa vantshwa volavo ni swikhongelo swa vatswari lava chavaka Xikwembu swi anguriwile? Ina! “Hlonga ro tshembeka ni ro tlhariha” ri lunghiselele ndzetelo lowu sekeriweke eBibeleni. (Matewu 24:45) Laha ku ni tin’wana ta tibuku leti pfuneke madzana ya magidi ya vantshwa leswaku va ‘yima va hetiseka naswona va va ni ku khorwiseka loku tiyeke.’ A hi kambisiseni ti nga ri tingani ta tibuku leti.

“Vonani . . . 15 000 Wa Timbhoni Letintshwa!”

Hi August 1941, vayingiseri va 115 000 a va hlengeletane le St. Louis, eMissouri, U.S.A., eka ntsombano lowukulu swinene wa Timbhoni ta Yehovha lowu tshameke wu khomiwa hi nkarhi wolowo. Hi siku ro hetelela—“Siku ra Vana”—vana va kwalomu ka 15 000 a va tshame ekusuhi ni platifomo va yingisele hi vurhon’wana loko Joseph F. Rutherford a vulavula hi nkulumo leyi nge “Vana Va Hosi.” Loko se a ri kusuhi ni ku gimeta nkulumo yakwe, Rutherford loyi a a ri ni malembe ya 71 hi vukhale u vule leswi, hi rito ro fana ni ra tatana:

“Hinkwenu . . . vana lava pfumeleke . . . ku yingisa Xikwembu ni Hosi ya xona, ndzi kombela mi yima!” Vana va te tlakuu, hi nkarhi wun’we. “Vonani,” ku huwelela Makwerhu Rutherford, “timbhoni letintshwa to tlula 15 000 eMfun’weni!” Ku ve ni ku phokotela ka mavoko. Xivulavuri xi engeterile: “N’wina hinkwenu lava nga ta endla leswi mi nga swi kotaka leswaku mi byela van’wana hi mfumo wa Xikwembu, ndzi kombela mi ku, Ina.” Vana va angule hi “Ina!” wa le henhla. Hiloko a kombisa buku leyintshwa leyi nge, Children, leyi amukeriweke hi ku phokotela ka mavoko loku tekeke nkarhi wo leha.

Endzhaku ka nkulumo ya yena leyi nga ni matimba, vana va fole layini yo leha va kongoma eplatifomo, laha Makwerhu Rutherford a va nyikeke kopi ya nyiko ya buku leyintshwa. Vayingiseri va kale va rila hi ntsako hikwalaho ka xiendlakalo lexi. Mbhoni yin’wana leyi swi voneke hi ya yona yi te: “Ko va mbilu ya ribye ntsena, leyi a yi nga ta khumbiwa hi xiendlakalo lexi xa vantshwa lava [kombisaka] ntshembo lowu hetisekeke ni ripfumelo eka Xikwembu xa vona, Yehovha.”

Eka nhlangano wolowo lowu nga rivalekiki, vantshwa va 1 300 va khuvuriwile va kombisa ku tinyiketela ka vona eka Yehovha. Vo tala va vona na sweswi va ha yime va tiyile eripfumelweni. Va pfuna mavandlha ya ndhawu ya ka vona, i vatirhi va ku tirhandzela eBethele kumbe i varhumiwa ematikweni mambe. Hakunene, “Siku ra Vana” na buku leyi nge Children, swi hundzuke xiendlakalo lexi nga rivalekiki etimbilwini ta vana vo tala!

“Ti Fike Hi Nkarhi Lowu Faneleke”

Hi va-1970, Timbhoni ta Yehovha ti tlhandlekele hi ku kandziyisa tibuku tinharhu leti fikeleleke timbilu ta madzana ya magidi ya vantshwa. Tibuku ta kona a ku ri leyi nge, Listening to the Great Teacher, Your Youth—Getting the Best out of it na leyi nge Buku Yanga Ya Timhaka Ta Bibele. Hi 1982, swihloko swa nxaxamelo wa “Vantshwa Va Vutisa . . . ” swi sungule ku humelela eka magazini wa Xalamuka! Swihloko leswi swi khumbe timbilu ta vantshwa swin’we ni lava kuleke leswaku va angula hi ndlela leyi hisekaka. Muntshwa  un’wana wa malembe ya 14 hi vukhale u te: “Vusiku byin’wana ni byin’wana ndzi khensa Xikwembu hikwalaho ka ku kandziyisiwa ka swihloko leswi.” Un’wana wa malembe ya 13 hi vukhale u te: “Ndza swi rhandza swihloko leswi, swi fike hi nkarhi lowu faneleke.” Vatswari ni vakulu va Vakreste lava hlawuriweke, va yima hi rero na vona, leswaku swihloko leswi swi fike hi nkarhi naswona swa vuyerisa.

Hi 1989 se a ku ri ni swihloko swa kwalomu ka 200 swa “Vantshwa Va Vutisa . . . ” eka Xalamuka! Eka Ntsombano wa Muganga lowu nge “Ku Chava Xikwembu” wa lembe rero, buku leyi nge Swivutiso Leswi Vantshwa Va Swi Vutisaka—Tinhlamulo Leti Tirhaka yi humesiwile. Xana yi va pfunile vantshwa leswaku va yima va tiyile eripfumelweni? Vantshwa vanharhu va tsarile: “Buku leyi yi ve xitirho xa kahle eka hina leswaku hi kota ku twisisa swiphiqo swa hina ni ku kota ku tlhuvutsana na swona. Hi khensa nkhathalelo wa n’wina mayelana ni vuhlayiseki bya hina.” Vunyingi bya vahlayi lava nga vantshwa emisaveni hinkwayo na vona va yima hi rero.

“Yi Hi Miyete Nyoka”

Hi 1999, Timbhoni ta Yehovha ti humese ndzetelo wun’wana lowu na wona wu nga enkarhini eka vantshwa—vhidiyo leyi nge Young People Ask—How Can I Make Real Friends? Ntsako a wu ri wukulu hikwalaho ka yona. Muntshwa wa malembe ya 14 u te: “Vhidiyo leyi yi khumbe mbilu ya mina.” Manana la nga yexe u boxe leswi: “Yi ta va swakudya swa hina swa moya swa siku na siku.” Wansati un’wana u te: “Swa tsakisa ku tiva leswaku Munghana wa hina lonkulu, Yehovha, wa hi rhandza hakunene naswona wa khathala hi vantshwa lava nga enhlengeletanweni yakwe ya misava hinkwayo.”

Xana vhidiyo leyi yi pfune yini? Vantshwa va ri: “Yi ndzi pfune leswaku ndzi tivonela eka vanghana, ndzi tolovelana ni swirho swa vandlha ni ku tlhela ndzi aka vunghana na Yehovha.” “Yi ndzi pfune leswaku ndzi kota ku tiyimela eka tintangha.” “Yi ndzi pfune leswaku ndzi yima ndzi tiyile eku tirheleni ka mina Yehovha hilaha ndzi nga kotaka hakona.” Mpatswa lowu tekaneke wu tsarile: “Hi ba mandla hi vuyelela leswi hi phameriwaka ‘swakudya’ leswi. Swi hi miyete nyoka.”

Hi ku kombisa ku tshembeka eka vurhumiwa lebyi ri rhumiweke byona hi Xikwembu, “hlonga ro tshembeka ni ro tlhariha” leri totiweke ri phamele swakudya swa moya hi nkarhi lowu faneleke eka lava nga ta swi amukela. A hi ku tsakisa ka swona ku vona ndlela leyi ndzetelo wo tano wa Matsalwa wu pfunaka vantshwa ha yona namuntlha leswaku va ‘yima va hetiseka naswona va va ni ku khorwiseka loku tiyeke hi ku rhandza ka Xikwembu hinkwako’!