Nhlangano Wa Lembe Ni Lembe Wa October 6, 2001

NHLANGO WA LEMBE NI LEMBE wa swirho swa Watch Tower Bible and Tract Society of Pennsylvania wu ta khomiwa hi October 6, 2001, eholweni ya Nhlengeletano ya Timbhoni ta Yehovha, le 2932 Kennedy Boulevard, Jersey City, New Jersey. Nhlangano wo sungula wa swirho ntsena wu ta sungula hi 9:15 a.m., kutani wu landzeriwa hi nhlangano wa mani na mani hi 10:00 a.m.

Swirho swa nhlangano swi fanele ku tivisa Hofisi ya Matsalana sweswi hi ku cinca kwihi na kwihi ka tiadirese ta swona ta poso loku endlekeke n’wexemu leswaku mapapila ya ntolovelo ya xitiviso ni maphepha ya nhlawulo swi fika eka swona hi July.

Maphepha ya nhlawulo lama nga ta rhumeriwa eka swirho, swin’we ni xitiviso xa nhlangano wa lembe ni lembe, ma fanele ma va ma fikile eHofisini ya Matsalana wa Sosayiti ku nga si hundza August 1. Xirho xin’wana ni xin’wana xi fanele xi tata phepha ra xona ra nhlawulo xi tlhela xi ri rhumela hi xihatla, xi vula loko xi ta va kona enhlanganweni kumbe e-e. Rungula leri nyikeriwaka eka phepha rin’wana ni rin’wana ra nhlawulo ri fanele ri vula hi ku kongoma emhakeni leyi, tanihi leswi hi nga ta tirhisa rona ku vona lava nga va kona hi xiviri.

Ku languteriwa leswaku nongonoko hinkwawo, ku katsa ni nhlangano wa mabindzu ni swiviko, wu hela hi 1:00 p.m. kumbe endzhakunyana ka kwalaho. A ku nge vi na nongonoko wa nindzhenga. Hikwalaho ka leswi ndhawu yi nga yitsongo, ku ta ngheniwa hi mathikithi ntsena. Ku hava malunghiselelo lama nga ta endliwa, yo yisa nhlangano wa lembe ni lembe eswivandleni swin’wana hi tinqingho.