“Xana Hakunene Xikwembu Xi Avanyisa Vanhu Leswaku Va Hisiwa Etiheleni?”

“Xana mi nghenele dyondzo ya ntivo-vukwembu?”

Xivutiso lexi xi hlamarise Joel na Carl. Majaha lawa mambirhi—lama nga vatirhi va ku tirhandzela eyindlu-nkulu ya Timbhoni ta Yehovha le Brooklyn, eNew York—a ma ri karhi ma languta tibuku exitolo xo xavisa tibuku xa le kusuhi ni kwalaho. Loko Joel a ri karhi a kambisisa khonkhodensi ya Bibele, Carl u n’wi chumbutele bulo leri va veke na rona evutirhelini. Wanuna loyi a tweke swin’wana leswi a va bula ha swona u susumeteleke ku ta eka vona.

Hambiswiritano, wanuna loyi a a ngo lava ntsena ku tiva loko majaha lawa mambirhi ma nghenele dyondzo ya ntivo-vukwembu. Wa hlamusela: “Ndzi Muyuda, naswona vanghana va mina van’wana lava nga Vakreste va ndzi byele leswaku ndzi ta hisiwa etiheleni hikuva Vayuda va landzule Yesu. Mhaka leyi ya ndzi karhata. Nxupulo wo tano lowu humaka eka Xikwembu xa rirhandzu a wu vonaki wu fanerile. Xana hakunene Xikwembu xi avanyisa vanhu leswaku va hisiwa etiheleni?”

Joel na Carl va byele wanuna loyi a tsakelaka hi mbilu hinkwayo leswaku i swichudeni swa Bibele leswi hisekaka. Va n’wi kombise eMatsalweni leswaku vafi a va twi nchumu naswona va lo etlele va rindzele ku pfuxiwa eku feni. Hikwalaho, a va xanisiwi kumbe ku vavisiwa hi ndzilo wa tihele. (Pisalema 146:3, 4; Eklesiasta 9:5, 10; Daniyele 12:13; Yohane 11:11-14, 23-26) Loko va hete bulo ra vona ra 45 wa timinete, wanuna loyi u nyike Joel na Carl adirese yakwe a tlhela a kombela ku kuma rungula leri engetelekeke malunghana ni mhaka leyi.

Loko tihele a ku ri ndhawu ya ku xanisiwa hi ndzilo, xana munhu a a ta navela ku yisiwa eka tona? Kambe, loko kokwana xinghuwe Yobo a navela ku hambana ni ku xaniseka loku a a langutane na kona, u endle xikombelo lexi: “I mani la nga ndzi nyikaka leswi, leswaku ndzi ta hlayiseka etiheleni, naswona ndzi ti fihla kona ku fikela loko vukarhi bya wena byi hundzile?” (Yobo 14:13, Douay Version) Swi le rivaleni leswaku Yobo a a nga teki tihele ti ri ndhawu ya ku xanisiwa eka yona. Ematshan’weni ya sweswo, u lave nsirhelelo kwalaho. Rifu i xiyimo xa ku nga vi kona, naswona tihele leti Bibele yi vulavulaka ha tona i sirha ra vanhu leri tolovelekeke.

Loko u tsakela ku kuma rungula leri engetelekeke malunghana ni leswi swi endlekaka loko hi fa ni ntshembo lowu hi nga na wona endzhaku ka sweswo, u komberiwa hi rirhandzu leswaku u amukela xirhambo lexi landzelaka.