Swivutiso Swa Vahlayi

Xana Daniyele a a ri kwihi loko Vaheveru lava vanharhu va ringiwa emahlweni ka xifaniso lexikulu lexi Nebukadnetsara a xi yimise erivaleni ra Dura?

Bibele a yi vuli, kutani namuntlha ku hava munhu loyi a nga tshubulaka leswaku Daniyele a ri kwihi hi nkarhi wolowo wa ku ringiwa.

Van’wana va ringanyete leswaku xikhundla xa Daniyele xa ku tirhela mfumo kumbe lunghelo rakwe leri a ri nyikiweke hi Nebukadnetsara a ri tlakukile ku tlula ra Xadraka, Mixaka na Abedinigo hikwalaho Daniyele a a nga boheki ku ya erivaleni ra Dura. Daniyele 2:49 ya swi kombisa leswaku ku ringana nkarhi wo karhi a ri ni xikhundla lexi tlakukeke eka xa vanghana wakwe lavanharhu. Kambe a hi nge vuli leswaku leswi hi swona swi endleke leswaku a nga ti a ta hlengeletana ni van’wana emahlweni ka xifaniso.

Loko ku ringetiwa ku hlamusela ku nga vi kona ka Daniyele, van’wana va vula leswaku swi nga ha endleka a a nga ri kona, a ye eku endleni ka xiavelo xakwe kumbe a a vabya kutani u tsandzekile ku va kona. Hambiswiritano, Bibele a yi swi vuli sweswo. Ku nga khathariseki leswaku swona hi swihi, xiendlo xa Daniyele xi fanele xi nga xopaxopiwanga, hikuva loko a swi ri tano, handle ko kanakana vatirhela-mfumo va le Babilona a va ta va va n’wi hehlile. (Daniyele 3:8) Emahlweni ka xona ni le ndzhaku ka xiendlakalo lexi, Daniyele u tikombise a ri muhlayisi wa vutshembeki, la tshembekaka eka Xikwembu hambi ku nga ba lexi dumaka. (Daniyele 1:8; 5:17; 6:4, 10, 11) Hambi loko Bibele yi nga vuli leswaku hikwalaho ka yini Daniyele a nga ri kona erivaleni ra Dura, hi nga tiyiseka leswaku vutshembeki byakwe eka Yehovha Xikwembu a byi tsekatsekisiwanga.—Ezekiyele 14:14; Vaheveru 11:33.