Xiviko Xa Vahuweleri Va Mfumo

Xikwembu Xi Sule Mihloti Ya Yena

VANHU lava lulamisaka mahanyelo ya vona leswaku ma pfumelelana ni milawu ni misinya ya milawu ya Yehovha, va vuyeriwa swinene. Hambileswi ku teka goza leri faneleke ro hundzuka swi nga oloviki nkarhi hinkwawo, mpfuno ni xikhutazo swi tshama swi ri kona. (Pisalema 84:11) Ntokoto lowu landzelaka lowu humaka le Dzonga-vuxa bya Asiya, wu swi kombisa kahle leswi.

Mbhoni yin’wana leyi humaka eFurwa leyi a yi ri eku wiseni yi vulavule ni n’wini wa xitolo loyi va nge i Kim * malunghana ni xikongomelo xa Yehovha hi misava. U tlhele a siyela Kim buku leyi nge, U nga Hanya Hi Masiku aParadeyisini eMisaveni. Loko a ri karhi a pfula-pfula buku leyi, Kim u hlangane ni marito lama nge “xi ta sula mihloti hinkwayo ematihlweni ya vona.” (Nhlavutelo 21:4) Loko Kim a hlamusela u ri: “Tsalwa leri ri ndzi khumbile swinene. Loko vanhu va ndzi vona ndzi n’wayitela ni ku vulavula ni van’wana siku hinkwaro exitolo, i mani loyi a a ta swi tiva leswaku loko ndzi kala ndzi ku fikiyani, ekaya nimadyambu, a ndzi rila ndzi kala ndzi ya etlela hi mbitsi?” Loko a paluxa nhlomulo wa yena, u ri: “Se a ndzi ri ni malembe ya 18 ndzi tshama ni wanuna naswona a ndzi nga tsakanga hikuva a a nga lavi ku ndzi teka. A ndzi lava ku lahla mahanyelo ya muxaka lowu, kambe leswi se a ndzi tshame na yena nkarhi wo leha, a ndzi nga ri na xivindzi xo ma lahla.”

Endzhakunyana ka nkarhi Kim u amukele dyondzo ya Bibele eka un’wana wa Timbhoni ta Yehovha loyi vito ra yena ku nga Linh. Kim u ri: “A ndzi tiyimiserile ku tirhisa leswi a ndzi swi dyondza eBibeleni. Hi xikombiso, ndzi tshike ku gandzela vakokwana hambileswi leswi swi vangeke leswaku ndzi kanetiwa hi vandyangu. Tlhandlakambirhi, ndzi ringete ku tsarisa vukati bya hina ximfumo, kambe munghana wa mina u arile ku endla tano. Hi karhi lowu wo tika, Mbhoni ya le Furwa yi hambete yi ndzi rhumelela tibuku ta Bibele, kasi na Linh a a ndzi khutaza swinene. Ku lehisa mbilu ni nseketelo wa rirhandzu wa vamakwerhu lava va xisati swi ndzi pfune ku tiyisela ku fikela loko ndzi vona leswaku munghana wa mina a ri munhu wa muxaka muni. Ndzi kume leswaku a ri ni ‘vavasati’ va ntlhanu ni vana va 25! Leswi swi ndzi nyike xivindzi xo n’wi tshika.

“Ku sukela yindlu ya ximbindzimbindzi ndzi ya eka yindlu leyi nga nyawuliki a swi nga olovi. Ku tlula kwalaho, khale ka nuna wa mina u ndzi sindzise leswaku ndzi tlhela ndzi vuya ndzi ta tshama na yena, u kale a ndzi xungeta hi leswaku u ta ndzi onha xikandza lexi hi asidi loko ndzi ala. Hi mpfuno wa Yehovha, ndzi swi kotile ku endla leswi lulameke.” Kim u hambete a endla nhluvuko naswona u hetelele a khuvuriwile hi April 1998. Ku engetela kwalaho, vamakwavo va yena vambirhi va xisati ni n’wana wa yena wa mufana wa kondlo-a-ndzi-dyi va sungule ku dyondza Bibele ni Timbhoni ta Yehovha.

Kim u ri: “A ndzi tshamela ku ehleketa leswaku vutomi a byi nge he pfuki byi pfune nchumu. Hambiswiritano, namuntlha ndzi tsakile naswona a ndza ha rili nivusiku. Yehovha se u yi surile mihloti ematihlweni ya mina.”

[Nhlamuselo ya le hansi]