Buku Leyi Vantshwa Vo Tala Va Nga Yi Tsakeliki

“NDZI nga swi tivisa ku yini loko hakunene Bibele yi ri Rito ra Xikwembu? Buku leyi hi vuyona a yi ndzi tsakisi,” ku vule n’hwanyana la vuriwaka Beate.

Le Jarimani laha Beate a tshamaka kona, vantshwa vo tala va titwa hi ndlela leyi a titwaka ha yona; hikwalaho a va ehleketi leswaku ku hlaya Bibele i swa nkoka. Nkambisiso wa sweswinyana wu kombise leswaku kwalomu ka phesente yin’we ya vantshwa va tshamela ku hlaya Bibele, tiphesente timbirhi ti yi hlaya nkarhi na nkarhi, 19 wa tiphesente ti yi hlaya loko to tshuka ti kume nkarhi naswona kwalomu ka 80 wa tiphesente a va yi hlayi nikatsongo. Kumbexana tinhlayo leti ta fana ni ta le matikweni man’wana, kumbe swi tano ni laha u tshamaka kona. Swi lo dlaa, leswaku Bibele i buku leyi vantshwa vo tala va nga yi tsakeliki.

Kutani a swi hlamarisi leswi vanhu lava nga yi tiviki Bibele va andzeke eka xitukulwana lexa ha riki xintshwa! Eku sunguleni ka lembe ra 2000, phepha-hungu ra Lausitzer Rundschau ri humese xiviko lexi kombisaka leswaku i vanhu vangani lava a va tiva Milawu ya Khume va tlhela va yi tirhisa tanihi nkongomiso wa vona evuton’wini. Eka vanhu lava nga ni malembe lama tlulaka 60, lava ringanaka tiphesente ta 67, a va yi tiva milawu ya khume naswona a va hanya ha yona; eka lava nga le hansi ka malembe ya 30 a ku ri tiphesente ta 28 ntsena. Ina, eka vantshwa vo tala Rito ra Xikwembu i nchumu lowu va nga wu tolovelangiki.

Van’wana Va Ni Vonelo Leri Hambaneke

Hi hala tlhelo emisaveni hinkwayo ku ni timiliyoni ta vantshwa lava kumeke Rito ra Xikwembu ri ri nchumu wa nkoka swinene. Hi xikombiso, Alexander u ni malembe ya 19 naswona u hlaya Bibele mpundzu wun’wana ni wun’wana a nga si ya entirhweni. U ri: “Eka mina i ndlela yo antswa yo sungula siku.” Sandra, u swi endle mukhuva ku hlaya xiyenge xo karhi xa Bibele madyambu man’wana ni man’wana. U ri: “Swi hundzuke xiphemu xa siku na siku.” Naswona Julia, loyi a nga ni malembe ya 13, se u sungule ku hlakulela ndlela yo hlaya kwalomu ka ndzima yin’we ya Bibele a nga si ya lata rimbambu. “Ndza swi tsakela hakunene naswona ndzi lava ku ya emahlweni ni mukhuva lowu enkarhini lowu taka.”

Xana i langutelo rihi leri nga rinene naswona ri nga ra vutlhari? Xana Bibele yi faneriwa hi ku hlayiwa? Xana i ya risima ni ku va ya nkoka eka xitukulwana lexi xa ha kulaka? Xana wena u ri yini?