Ku Hlula Eka Huvo Ya Milawu Ya Muganga

TIMBHONI TA YEHOVHA eJarimani ti hlurile eka Huvo ya Milawu ya Muganga le Karlsruhe. Xisweswo, ti teke goza ra nkoka leri fambisanaka ni ku amukeriwa ka tona ka le nawini.

Ku tlula malembe ya 100, Timbhoni ta Yehovha a ti nga tshamanga hi mavoko le Jarimani. Ti pone nxaniso wo chavisa emavokweni ya valawuri vambirhi va tihanyi eka lembe-xidzana ra vu-20—Vasoxalisi va Tiko ni Makhomunisi. Ku sukela hi 1990, Timbhoni ti lave ku kuma mpfumelelo wa le nawini leswaku ti xiyiwa tanihi nhlengeletano leyi nga enawini. Endzhaku ka ku avanyisa kambirhi lokunene ni ku tlheriseriwa endzhaku, Timbhoni ti endle xikombelo eka Huvo ya Milawu Ya Muganga, leyi tiviseke xiboho xa yona hi December 19, 2000.

Xiboho Xa Ku Yima Ni Timbhoni Ta Yehovha

Vaavanyisi va huvo hinkwavo va nkombo va yime ni Timbhoni. Vaavanyisi va cince vuavanyisi bya Vulawuri bya Huvo ya Muganga bya 1997 kutani va lerisa leswaku huvo yi tlhela yi kambisisa xikombelo xa Timbhoni.

Huvo ya Milawu ya Muganga yi tirhise xiendlakalo lexi leswaku yi hlamusela xisekelo xa vuxaka lebyi nga kona exikarhi ka Mfumo ni mintlawa ya vukhongeri. Kahle-kahle, xikhundla xa vukhongeri “a xi tiyisiwi hi leswi byi swi pfumelaka, kambe hi ndlela leyi byi endlaka swilo ha yona.”

Huvo yi tlhele yi xiya leswaku loko Timbhoni ti va ni “vukala-tlhelo bya Vukreste,” a ti “lwisani ni nawu wa xidemokrati” naswona a ti “naveli ku siva xidemokrati hi hulumendhe yin’wana.” Hambiswiritano, loko Timbhoni ti nga hlanganyeli eka minhlawulo ya tipolitiki a ti fanelanga ti nga amukeriwi hi nawu.—Yohane 18:36; Varhoma 13:1.

Huvo yi ye emahlweni yi vula leswaku mupfumeri—ku nga ha va Mbhoni kumbe wa vukhongeri byin’wana—a nga kuma leswaku minkarhi yin’wana swikoxo swa Mfumo ni swilaveko swa ripfumelo ra yena swa lwisana. Loko munhu a lawuriwa hi ripfalo rakwe hi ku “yingisa tidyondzo ta vukhongeri byakwe ku tlula nawu,” Mfumo wu nga ha xiya mhaka leyi yi ri leyi lulameke naswona yi fambisana ni ntshunxeko wa vukhongeri.—Mintirho 5:29.

Vuavanyisi bya huvo byi ve nhloko-mhaka-nkulu ya mahungu. A ku ri hava phepha-hungu eJarimani, leri a ri nga ri na xona xiviko lexi. Switichi hinkwaswo leswikulu swa thelevhixini ni swa xiya-ni-moya swi haxe swiviko leswi kumbe swi endla mimbulavurisano. Ni siku ni rin’we, vito leri nge Yehovha, a ri si tshama ri twarisiwa hi ndlela yoleyo eJarimani.

[Mfungho wa Vini va Xifaniso eka tluka 8]

AP Photo/Daniel Maurer