Wa Tsundzuka Xana?

Xana u swi tsakerile ku hlaya swihloko swa sweswinyana swa minkandziyiso ya Xihondzo xo Rindza? A hi vone loko u nga swi hlamula swivutiso leswi landzelaka:

• Ha yini swivutiso leswi vutisiweke eka Yobo ndzima 38 swi fanele swi kambisisiwa ni namuntlha?

Hambi ku ri vativi va sayense va manguva lawa a va yi twisisi hi ku hetiseka mintirho yo tala leyi hlamarisaka leyi Xikwembu xi yiseke nyingiso eka yona. Mintirho ya kona yi katsa ndlela leyi ha yona nkoka-misava wu endlaka misava yi tshama empfhukeni, leswi ku vonakala ku nga swona hakunene, xivangelo xa ku va ku ri ni mathonsi ya gamboko yo hambana-hambana, ndlela leyi mathonsi ya mpfula ma vumbekaka ha yona ni ndlela leyi ntamu wu katsekaka ha yona eka ku dzindza ka tilo.—4/15, matluka 4-11.

• I swikombiso swihi swa le Bibeleni leswi nga hi pfunaka ku langutana ni mintlhaveko leyi hoxeke?

Asafa, Baruku na Nawomi va tshame va hela matimba kumbe va va ni mintlhaveko yo karhi leyi hoxeke, naswona rhekhodo leyi nga eMatsalweni ya ndlela leyi va langutaneke ha yona hilaha ku humelelaka ni swiyimo swo tano yi nga hi pfuna.—4/15, matluka 22-4.

• Hi tihi tindlela tin’wana leti tirhaka to pfuna tinoni leti nga Vakreste?

Vanghana va nga nyikela mpfuno hi tintswalo ni hi ndlela leyi nga voniwaka hi mani na mani. Swirho swa ndyangu kumbe van’wana va nga swi kota ku pfuneta hi timali kumbe hi swilo leswi vonakaka, loko ku ri ni xilaveko xa xiviri. Vakreste-kulobye va nga tlhela va pfuneta hi ku va pfuna hi ndlela ya rirhandzu ni ya xinghana, va va seketela hi tlhelo ra moya ni ku va chavelela.—5/1, matluka 5-7.

• Ha yini swi ri swa nkoka ku teka “eHosini ntsena,” hilaha 1 Vakorinto 7:39 yi tsundzuxaka hakona?

Ku tekana ni vanhu lava nga riki vapfumeri hakanyingi ku ve ni khombo. Ku tlula kwalaho, ku landzela xitsundzuxo lexi xa le tilweni swi kombisa ku tshembeka eka Yehovha Xikwembu. Loko hi pfumelelana ni Rito ra Xikwembu, timbilu ta hina a ti hi voni nandzu. (1 Yohane 3:21, 22)—5/15, matluka 20-1.

• Leswi Yehovha ku nga yena loyi a nga hi rivalelaka swidyoho swa hina, ha yini Vakreste va phofula swidyoho leswikulu eka vakulukumba va vandlha?

Ina, Mukreste u fanele a lava leswaku ku va Yehovha a n’wi rivalelaka swidyoho leswikulu. (2 Samuwele 12:13) Kambe tanihi leswi muprofeta Natani a pfuneke Davhida, vakulukumba lava wupfeke evandlheni va nga pfuna vadyohi lava hundzukaka. Ku ya eka vakulu swi fambisana ni nkongomiso lowu nyikeriwaka eka Yakobo 5:14, 15.—6/1, tluka 31.

• Hi byihi vumbhoni lebyi nga kona bya leswaku hi fanele hi khathalela vana lava nga riki na vatswari ni tinoni leti pfumalaka?

Rhekhodo ya matimu yi kombisa leswaku ku nyikela nkhathalelo wo tano a swi fungha vugandzeri bya ntiyiso exikarhi ka Vaheveru va khale ni Vakreste vo sungula. (Eksoda 22:22, 23; Vagalatiya 2:9, 10; Yakobo 1:27) Muapostola Pawulo eMatsalweni u katse swiletelo leswi nga erivaleni swa Vakreste leswaku va khathalela tinoni leti pfumalaka. (1 Timotiya 5:3-16)—6/15, matluka 9-11.

• Hi xihi xilotlelo xa vutomi lebyi tsakisaka ni lebyi nga ni xikongomelo?

Hi fanele hi hlakulela ni ku hlayisa vuxaka lebyi faneleke na Yehovha, Tata wa hina wa le tilweni. Ku dyondza Bibele i mpfuno wa nkoka wo endla sweswo.—7/1, matluka 4-5.

• Xana munhu un’wana ni un’wana u ni moya lowu nga fiki lowu ponaka rifu?

Hambileswi vanhu van’wana va pfumelaka leswaku moya—hayi moya-xiviri—a wu fi, Bibele a yi ri seketeli langutelo leri. Yi kombisa leswaku loko munhu a fa, u tlhelela entshurini naswona a nga ha hanyi. Kambe Xikwembu xi ni vuswikoti byo n’wi vuyisela evuton’wini, hikwalaho ntshembo wihi ni wihi wa vutomi bya nkarhi lowu taka, wa ku pfuxiwa ka vafi, wu le ka Xikwembu. (Eklesiasta 12:7)—7/15, matluka 3-6.

• Xana Daniyele a a ri kwihi loko Vaheveru vanharhu va ringiwa erivaleni ra Dura?

Bibele a yi boxi. Swi nga ha endleka Daniyele a a nga boheki ku va kwalaho hikwalaho ka xikhundlha xa yena, kumbe a a nga ri kona a a ya endla ntirho wa mfumo. Kambe hi nga tiyiseka leswaku a a nga landzulanga vutshembeki bya yena eka Yehovha.—8/1, tluka 31.