Xitifiketi Xa Ku Endla Leswinene

LERI i sagwadi leri Nhlangano wa le Congo ni Vatsari va Maphepha-hungu va le Afrika va Nhluvukiso (Association of Congolese and African Journalists for the Development [AJOCAD]) eDemocratic Republic of Congo wu ri nyikeke “vanhu ni minhlangano ya swa ntshamisano leyi hoxeke xandla eka nhluvuko wa le [Congo] tanihi nchumu wo nkhensa ha wona.”

Hi November 17, 2000, Xitifiketi Xa Ku Endla Leswinene xi nyikiwe Timbhoni ta Yehovha hikwalaho “ka ku hoxa ka tona xandla eku hluvukiseni ka vanhu va le Congo [hi] ku va dyondzisa ni hikwalaho ka tidyondzo leti kumekaka etibukwini ta tona.”

Loko ri hlamusela hi sagwadi leri, phepha-hungu ra le Kinshasa leri vuriwaka Le Phare ri te: “Swa tika ku kuma munhu wa le Congo, loyi a nga si tshamaka a kuma timagazini ta Xihondzo xo Rindza na Xalamuka! kumbe tibuku tin’wana leti kandziyisiwaka hi Timbhoni ta Yehovha. Timagazini leti ti [hlamusela] timhaka hinkwato ta vutomi.” Xihloko lexi xi tlhele xi boxa leswaku tibuku leti ti kombisa “ndlela ya ku langutana ni swiphiqo swa namuntlha” ni ku kombisa “leswi swiendlakalo leswi nga kona swi vulaka swona hakunene.” Nkandziyiso wun’wana ni wun’wana wa Xalamuka! “[wu] hlayisa vukala-tlhelo eka tipolitiki, naswona a [wu] tlakusi rixaka rin’wana eka rin’wana.” Ku engetela kwalaho, tibuku leti ti aka “ku tiyiseka hi xitshembiso xa Muvumbi xa misava leyintshwa leyi nga ni ku rhula ni leyi sirhelelekeke, misava leyi nga ta siva fambiselo ra swilo ra sweswi lero homboloka.”

Hilaha swi hlamuseriweke hakona hi AJOCAD, tibuku ta Timbhoni ta Yehovha ti tikombe ti ri ni mpfuno lowukulu eka vaaki vo tala va le Congo. Leswi ti kumekaka hi madzana ya tindzimi, rungula ra tona leri nyikaka ntshembo ri nga ku pfuna na wena.

Hi kombela u hlaya rungula leri nga laha hansi ku vona leswaku u nga tihlanganisa njhani na tona.