Eku Sunguleni A Hi Ri Timhisi—Sweswi Hi Tinyimpfu!

Loko mina na Sakina ha ha ri swinhwanyetana, a hi ri vaakelani. Sakina a a ri lonkulu naswona a ri ni mirinyana, kasi mina a ndzi ri ntsongo ndzi tlhela ndzi lala. A hi tshamela ku holova, kambe siku rin’wana hi lwe swi nyawula. Ku sukela siku rero, a hi nga ha vulavurisani kumbe ku xewetana. Eku heteleleni, hi rhurhile hinkwerhu ivi hi hambana.

Hi 1994, ndzi sungule ku dyondza Bibele ni Timbhoni ta Yehovha, naswona hakantsongo-ntsongo vumunhu bya mina byi hundzukile. Endzhaku ka mune wa malembe loko hi ri enhlengeletanweni yo hlawuleka ya siku rin’we le Bujumbura, eBurundi, ndzi hlamarisiwe hi loko ndzi hlangana na Sakina. A ndzi tsakile hikuva a a ri kona kambe a hi xewetananga hi ndlela yo tsakisa. Endzhakunyana ka rona siku rero, a ndzi nga swi tshembi leswi a ndzi swi vona hi mahlo ya mina loko ndzi n’wi vona exikarhi ka lava a va ya eku khuvuriweni! Na yena a a cince ngopfu. A a nga ha ri munhu wa tinyimpi loyi a hi tshamela ku holova na yena. A swi tsakisa swinene ku n’wi vona a nyikela vumbhoni bya le rivaleni hi ku tinyiketela eka Xikwembu hi nkhuvulo wa mati!

Loko a huma ematini, ndzi hatlise ndzi ya n’wi vukarha ni ku n’wi hlevela endleveni, ndzi ku: “Xana wa ha tsundzuka ndlela leyi a hi lwa ha yona?” U te: “Ina, ndza swi tsundzuka kambe sweswo swi hundzile. Sweswi ndzi munhu lontshwa.”

Havumbirhi bya hina a hi tsakile leswi hi kumeke ntiyiso wa Bibele lowu hi hlanganisaka ni ku hundzula vumunhu bya hina byo hanya tanihi timhisi kutani hi hanya tanihi tinyimpfu ta Murisi Lonkulu, Yehovha Xikwembu. Hakunene, ntiyiso wa Bibele wa byi hundzula vutomi.