Nkhensa U Tlhela U Tsaka

PHEPHA-HUNGU ra le Canada leri vuriwaka Calgary Herald ri te: “Nsusumeto wo nkhensa i xisekelo xa ntokoto wa munhu.” Herald yi tshahe swichudeni leswi nga ni malembe ya kaye hi vukhale leswi nga le xikolweni xa le hansi, leswi mudyondzisi wa swona a swi kombeleke ku tsala hi swilo hinkwaswo leswi swi rhandzaka ku swi khensa. Muntshwa un’wana u vule leswaku u nkhensa vandyangu wa ka vona ‘hikuva va n’wi khathalerile.’ Xinhwanyetana xin’wana na xona xi nkhense vandyangu wa ka vona, xi ku: “Va ndzi hlayisa, va khathalela rihanyo ra mina, va ndzi khathalela, va ndzi rhandza, va ndzi phamela naswona loko a ku nga ri vatswari vanga, ingi ndzi nga ri kona emisaveni leyi.”

Ku nga tlangeli swi nga endla leswaku munhu a tshamela ku nga eneriseki. Hi ku ya hi mufundhisi tlhelo mutivi wa filosofi J. I. Packer, “hi tumbuluxeriwe ku titshega hi Xikwembu ni ku endla vunghana ni un’wana ni un’wana.” Leswi swi hi tsundzuxa hi ndzayo ya vutlhari ya le Bibeleni leyi tsariweke malembe-xidzana lama hundzeke, leyi nge: “Tikombeni mi ri ni ku nkhensa.” (Vakolosa 3:15) Marito ya ku nkhensa ni ku tlangela hi mbilu hinkwayo ma pfuna van’wana leswaku va hambeta va hlakulela vuxaka.

Ku tlula kwalaho, hi ku tlangela van’wana ni ku va teka va ri va nkoka, hi kombisa ku nkhensa eka Yehovha, naswona wa swi xiya leswi. Bibele yi ri: “Mahlo [ya Yehovha] ma famba-famba emisaveni hinkwayo leswaku a kombisa ntamu wakwe eka lava mbilu ya vona yi hetisekeke eka yena.” (2 Tikronika 16:9) Xikwembu xi hi tiyisekisa leswaku xi tsundzuka ni ku tlangela rirhandzu leri vanhu va ri kombisaka hikwalaho ka vito ra xona. (Vaheveru 6:10) Ina, hi ni xivangelo lexi twalaka xo tikombisa hi tlangela hikuva vunene lebyi bya vukwembu, loko byi kombisiwa siku ni siku byi tsakisa Yehovha ni ku hoxa xandla entsakweni wa hina. Swi hilaha Swivuriso 15:13 yi nge: “Mbilu leyi tsakeke yi endla leswaku mombo wu languteka wu tsakile.”