Yimani Mi Hetiseka Naswona Mi Va Ni Ku Khorwiseka Loku Tiyeke

Mintsombano—Yi Endla Leswaku Vumakwerhu Bya Hina Byi Vonaka Kahle

JOSEPH F. RUTHERFORD, la nga ni malembe ya 50, a ri ni rihanyo ro lomba endzhaku ka kwalomu ka lembe a hoxiwe ekhotsweni hi xivangelo lexi nga twaliki, eku ntshunxiweni ka yena u tirhe hi ntsako a rhwalela vanhu tibege ehoteleni. Hi nkhinkhi a a rhwala tiputumendhe ni ku pfuna Vakreste-kulobye leswaku va ya emakamareni ya vona ya le hotela. Van’wana vambirhi ku nga khale ka vabohiwa-kulobye—tlhelo Swichudeni-kulobye swa Bibele—a va ri karhi va ava makamara va nyika ntshungu lowukulu lowu rindzeleke byetlelo. Va hete nkarhi wo leha va ha khomeke swinene hi ntirho lowu. Xikan’we-kan’we hinkwavo a va nga ha tikoti hi ntsako. Xana a ku humelele yini?

Lembe a ku ri 1919 naswona Swichudeni swa Bibele (leswi namuntlha swi tiviwaka tanihi Timbhoni ta Yehovha) a swi ri karhi swi hlakarhela endzhaku ko xanisiwa hi tihanyi. Leswaku va kota ku pfuxelela vumakwavo bya vona, va khome ntsombano le Cedar Point, Ohio, U.S.A., ku sukela hi September 1 ku ya eka 8, 1919. Hi siku ro hetelela ra ntsombano vunyingi lebyi tsakeke, bya 7 000, a byi yingisele hi vukheta loko Makwerhu Rutherford a khutaza ha un’we wa lava a va ri kona entsombanweni hi marito lama nge: “Mi vayimeri va Hosi ya tihosi, lava tivisaka evanh’wini . . . mfumo lowu kwetsimaka wa Hosi ya hina.”

Mintsombano ya vanhu va Yehovha yi sukela le Israyele wa khale. (Eksoda 23:14-17; Luka 2:41-43) Tinhlengeletano to tano a ku ri minkarhi yo tsakisa swinene, a yi pfuna hinkwavo lava nga kona leswaku va nyikela nyingiso eRitweni ra Xikwembu. Hi laha ku fanaka, mintsombano ya Timbhoni ta Yehovha namuntlha yi tamele timhaka ta moya. Eka vahlaleri lava nga ni timbilu letinene, minhlangano yoleyo yo tsakisa yi nyikela vumbhoni lebyi nga kanakanisiki bya leswaku Timbhoni ti hlanganisiwe hi xiboho xa matimba xa vumakwerhu bya Vukreste.

Ku Endla Matshalatshala Yo Va Kona

Vakreste va namuntlha va swi tiva leswaku mintsombano ya vona i minkarhi yo phyuphyisiwa hi tlhelo ra moya ni ku dyondzisiwa Rito ra Xikwembu. Va teka minhlangano leyi leyikulu tanihi tindlela ta nkoka ta ku va pfuna ku “yima va hetiseka naswona va va ni ku khorwiseka loku tiyeke hi ku rhandza ka Xikwembu hinkwako.” (Vakolosa 4:12) Xisweswo, Timbhoni ti seketela minhlangano leyi hi mbilu hinkwayo, ti endla matshalatshala leswaku ti va kona.

Eka van’wana, leswaku va va kona emintsombanweni yo tano swi lava leswaku va kombisa ripfumelo naswona swi lava leswaku va hlula swihinga leswikulu. Hi xikombiso, wa nga twa ta Mbhoni leyi kuleke le Austria. Hambileswi yi nga ni vuvabyi bya chukele naswona yi faneleke yi titlhava tinayiti ta insulin siku ni siku, yi ve kona masiku hinkwawo ya ntsombano wa muganga etikweni ra ka vona. Le Indiya, ndyangu lowukulu wa Timbhoni lowu nga le vusiwaneni lebyikulu, a swi ri erivaleni leswaku a wu nge swi koti ku ya entsombanweni. Hiloko xirho xin’we xa ndyangu xi va pfuna. Xi te: “Leswi a ndzi nga lavi ku lahlekeriwa hi ntsombano lowu, ndzi xavise swingwavila swa mina swa nsuku, swa le tindleveni, leswaku ndzi ta hakelela riendzo leri. Leswi swi pfunile swinene hikuva xinakulobye ni mintokoto leyi hi yi kumeke entsombanweni, swi tiyise ripfumelo ra hina.”

Le Papua New Guinea, ntlawa lowu nga khuvuriwangiki, wa vanhu lava tsakelaka a wu tiyimiserile ku va kona entsombanweni wa muganga le ntsindza wa tiko. Va ye eka wanuna un’wana endhawini ya ka vona, la nga ni movha lowu tleketlaka vanhu, kutani va n’wi vutisa leswaku a nga va hakerisa mali muni ku ya entsombanweni. Tanihi leswi mali leyi a a yi laviwa a yi tele ku tlula leyi va nga na yona, va endle malunghiselelo ya ku ya tirha emutini wa wanuna loyi, va lulamisa kamara ro swekela eka rona. Xisweswo va  swi kotile ku fika entsombanweni wa muganga kutani va vuyeriwa hi ku yingisela xiyimiso hinkwaxo.

Mpfhuka a hi xiphiqo lexi nga hluriwiki eka Timbhoni ta Yehovha leti tiyimiseleke ku va kona emintsombanweni. Hi 1978, mupfhumba lontsongo wa le Poland, u fambe tikhilomitara ta 1 200 hi xikanyakanya leswaku a ta va kona entsombanweni wa le Lille, eFurwa. Hi ximumu xa 1997 Timbhoni timbirhi leti humaka le Mongolia ti fambe tikhilomitara ta 1 200 ku ya enhlengeletanweni ya Vukreste le Irkutsk, eRhaxiya.

Ku Vona Vumakwerhu Bya Xiviri

Vun’we ni vumakwerhu lebyi kombisiwaka hi Timbhoni emintsombanweni ya tona, byi lo dlaa, ni le ka vahlaleri lava nga le kule. Vo tala va tsakisiwe hi leswi ku nga riki na xihlawuhlawu exikarhi ka vatsombani ni leswaku ku ni xinghana xa xiviri hambi ku ri eka lava kumbexana va vonanaka ro sungula.

Hi nkarhi wa ntsombano wa matiko wa sweswinyana le Australia, muvalangisi loyi a a famba ni vapfhumba nkarhi wo ringana vhiki, u lave ku tshama na vona nkarhi lowu engetelekeke leswaku a tsakela xinghana na vona. A tsakisiwe hi rirhandzu ni vun’we lebyi va nga na byona lerova a nga swi tshembanga loko a vona ndlela leyi va hanyisanaka ha yona, kasi vo tala va vona a vo sungula ku vonana. Loko ku fika nkarhi wa leswaku a famba u kombele leswaku va n’wi lomba ndleve. U va vitana “vamakwerhu,” a sungula ku va nkhensa kambe u tsandzeke ku hetisa marito yakwe hiloko a xiririka mihloti.

Hi 1997, tiko ra Sri Lanka ri khome ntsombano wa rona wa muganga wo sungula wa tindzimi tinharhu exitediyamu lexikulu. Xiyimiso hinkwaxo a xi khomiwe hi Xinghezi, Sinhalese ni Xitamil hi nkarhi wun’we. Leswi nkwetlembetano exikarhi ka tinxaka wu tinyikeke matimba etikweni leri, ku hlangana ka mintlawa leyi ya tindzimi tinharhu swi ve xihlamariso. Phorisa rin’wana ri vutise makwerhu ri ku: “I va mani lava rhangeleke ntsombano lowu—i Masinhalese, i Vatamil kumbe i Manghezi?” Makwerhu u te: “Ntsombano lowu a wu rhangeriwanga hi ntlawa wun’we. Hi lo khomisana hinkwerhu.” Phorisa ri yime tindleve hi ku hlamala. Loko mintlawa leyi ha yinharhu yi hlanganyela exikhongelweni xo gimeta ni ku vula ku “Amen” xikan’we-kan’we, ku phokoteriwa ka mavoko ku hlanganise xitediyamu hinkwaxo. A nga kona loyi a a nga khumbekanga. Ina, mintsombano hakunene yi endla leswaku vumakwerhu bya hina byi vonaka kahle.—Pisalema 133:1. *

[Nhlamuselo ya le hansi]