Va Tirhisa Vito Ra Xikwembu eAfrika Xikarhi

VUNYINGI bya vanhu eAfrika Xikarhi va pfumela eka Xikwembu. A va kanakani leswaku hi xona Muvumbi wa swilo hinkwaswo. (Nhlavutelo 4:11) Hambiswiritano, ku fana ni vanhu vo tala etindhawini tin’wana, va honisa vito ra Xikwembu—Yehovha.

Vanhu va le Afrika Xikarhi swin’we ni va le swiphen’wini swin’wana swa misava, va va va vulavula hi vito ra Xikwembu loko va ku, “Vito ra wena a ri kwetsimisiwe,” eka Xikhongelo xa Hosi. (Matewu 6:9) Kambe ku ringana nkarhi wo leha, a va nga ri vangani vanhu lava a va ri tiva vito rero. Hambiswiritano, loko malembe ma ri karhi ma tlhavela emahlweni, ntirho wo chumayela hi ku hiseka wa Timbhoni ta Yehovha wu hundzule langutelo ra vanhu eka ku tirhisa vito ra Xikwembu. Namuntlha, vito ra Xikwembu ri tiveka swinene naswona ra amukeleka eka tindzimi to tala ta vantima to fana ni Xizulu (uJehova), Xiyoruba (Jehofah), Xixhosa (uYehova) na Xiswahili (Yehova). Kambe vuhundzuluxeri byo tala bya Bibele bya tindzimi leti, bya ha papalata ku tirhisa vito ra Xikwembu.

Vuhundzuluxeri lebyinene lebyi ri tirhisaka vito ra Xikwembu i Bibele ya Xizande, ku nga ririmi leri vulavuriwaka eswiphen’wini swa Riphabliki ra Afrika Xikarhi, Sudan ni le Democratic Republic of Congo. Eka xiphemu xexo ra misava, vanhu va tirhisa vito ra Xikwembu, va ri vitana Yekova hi ririmi ra ka vona. Ku nga khathariseki leswaku vito ra Xikwembu ri vitaniwa hi ndlela yihi hi ririmi ra ka n’wina, i swa nkoka ku ri tirhisa. Hikokwalaho ka yini? Hikuva “un’wana ni un’wana loyi a vitanaka vito ra Yehovha u ta ponisiwa.”—Varhoma 10:13.

[Mepe/Xifaniso eka tluka 32]

(Leswaku u swi vona kahle, pfula nkandziyiso hi woxe)

SUDAN

RIPHABLIKI RA AFRIKA XIKARHI

DEMOCRATIC REPUBLIC OF CONGO

[N’wini wa Xifaniso]

The Complete Encyclopedia of Illustration/J. G. Heck