Xiviko Xa Vahuweleri Va Mfumo

Ku Vulavurisana Ni Lava Swi Tikaka Ku Va Fikelela

TIMBHONI TA YEHOVHA ti ringeta ku fikelela vanhu hinkwavo hi rungula ra Mfumo. Minkarhi yin’wana, swi lava leswaku munhu a tikarhata swinene leswaku a fikelela lava nga kumekiki emakaya. (Marka 13:10) Malunghana ni mhaka leyi, muchumayeri wa mahungu lamanene wa nkarhi hinkwawo wa le Amerika Dzonga u hi rungulela ntokoto lowu landzelaka.

“Siku rin’wana ndzi swi xiyile leswaku ndhuna-nkulu ya tiko yi ta endzela nsimu leyi mina ni nkatanga hi averiweke eka yona. Tanihi leswi a a ri un’wana wa vanhu lava nga kumekiki emakaya, ndzi n’wi tsalele papila ndzi ri rhumela ni tibuku to hambana-hambana ta Bibele, ku katsa ni broxara leyi nge I Yini Leswi Xikwembu Xi Swi Languteleke Eka Hina? ni buku leyi nge Ku Lavisisa Ka Vanhu Xikwembu ni leyi nge Vutivi Lebyi Yisaka eVuton’wini Lebyi Nga Heriki. Ndzi hlamusele xikongomelo xo n’wi rhumela tibuku leti epapileni leri ndzi n’wi tsaleleke rona.

“Hikwalaho ka leswi a ndzi lava ku tiva ndlela leyi a nga ta titwisa xiswona hi tibuku leti, ndzi kombele mpfumelelo wo vulavurisana na yena. Endzhakunyana ka mavhiki ma nga ri mangani, ndzi pfumeleriwe ku vulavula na yena naswona ndzi fambe ni kopi ya vhidiyo leyi nge Jehovah’s Witnesses—The Organization Behind the Name. Mbulavurisano wa hina wu hete tiawara timbirhi. Loko hi hete ku hlalela vhidiyo, ndzi vutise ndhuna-nkulu leswaku u titwa njhani hi yona. U te: ‘Ku hava nhlengeletano leyi fanaka ni ya n’wina emisaveni hinkwayo. Ndzi navela onge vanhu vo fana na n’wina va nga ndzi pfuna emintirhweni ya hulumendhe ya mina!’ Kutani yi ndzi vutisile loko ndzi tshame ndzi endzela eyindlu-nkulu ya nhlengeletano ya hina. Ndzi yi byele leswaku hambileswi a ku ri pakani ya mina ku sukela loko ndza ha ri ni malembe ya 14 hi vukhale, a ndzi si ri kuma lunghelo ro endzela yindlu-nkulu ya hina ya misava hinkwayo eBrooklyn, le New York. A ndzi si swi kota ku fikelela pakani leyi. Hiloko a ndzi languta swa xinkarhana a miyerile. Kutani a ndzi byela leswaku u lava ndzi ri kuma lunghelo rero. U ndzi lunghiselele maphepha ya mpfumelelo ni ku hi xavela mathikithi ya xihaha-mpfhuka tanihi nyiko!

“Sweswi ndhuna-nkulu u kuma timagazini ta Xihondzo xo Rindza ni Xalamuka! nkarhi ni nkarhi. Hi tshemba leswaku ku nga ri khale hi ta sungula ku dyondza na yena Bibele.”