Swivutiso Swa Vahlayi

Hi kwihi ku ‘wisa’ loku ku vulavuriwaka hakona eka Vaheveru 4:9-11, naswona munhu u ‘nghenisa ku yini eku wiseni koloko’?

Muapostola Pawulo u tsalele Vakreste va lembe-xidzana ro sungula lava nga Vaheveru, a ku: “Ku sale ku wisa hi savata ka vanhu va Xikwembu. Hikuva munhu la ngheneke eku wiseni ka Xikwembu na yena u wisile emintirhweni yakwe, hilaha Xikwembu na xona xi wiseke emintirhweni ya xona. Hikwalaho a hi endleni hinkwaswo leswi hi nga swi kotaka leswaku hi nghena eku wiseni koloko.”—Vaheveru 4:9-11.

Loko Pawulo a vulavula hi ku wisa ka Xikwembu entirhweni wa xona, kahle-kahle a a kombetela eka leswi vuriweke eka Genesa 2:2, laha hi hlayaka: “Hi siku ra vunkombo, Xikwembu xi heta ntirho wa xona lowu xi wu endleke kutani hi siku ra vunkombo xi wisa entirhweni wa xona hinkwawo lowu xi wu endleke.” Hikwalaho ka yini Yehovha a ‘wisile hi siku ra vunkombo’? A swi vuli leswaku a a karhele ‘entirhweni wa yena hinkwawo lowu a wu endleke.’ Ndzimana leyi landzelaka yi hi pfula mahlo, yi ri: “Xikwembu xi katekisa siku ra vunkombo ni ku ri hlawulekisa, hikuva xi wise ha rona entirhweni hinkwawo wa xona lowu Xikwembu xi wu tumbuluxeke hi xikongomelo xa leswaku wu endliwa.”—Genesa 2:3; Esaya 40:26, 28.

“Siku ra vunkombo” a ri hambanile ni masiku laman’wana ya tsevu lama hundzeke, hikuva a ku ri siku leri Xikwembu xi ri katekiseke ni ku ri hlawulekisa, hi leswaku i siku leri vekeriweke etlhelo kumbe leri nyiketeriweke xikongomelo xo hlawuleka. A xi ri xihi xikongomelo xa kona? Eku sunguleni, Xikwembu xi hlavutele xikongomelo xa xona malunghana ni vanhu ni misava. Xikwembu xi byele wanuna ni wansati wo sungula xi ku: “Tswalanani mi andza, mi tata misava, mi yi fuma, mi fuma tinhlampfi ta lwandle ni swivumbiwa leswi hahaka swa matilo ni swivumbiwa hinkwaswo leswi famba-fambaka ehenhla ka misava.” (Genesa 1:28) Hambileswi Xikwembu xi vumbeke vanhu vo sungula va hetisekile, a swi ta teka nkarhi wo leha leswaku misava yi tatiwa yi tlhela yi hundzuka paradeyisi leyi taleke hi vanhu lava hetisekeke, hilaha Xikwembu a xi swi lave hakona. Xisweswo, hi “siku ra vunkombo” Xikwembu xi wisile kumbe xi tshike ntirho wa xona wo tumbuluxa swilo emisaveni leswaku leswi xi swi tumbuluxeke swi mila ni ku kula hilaha a xi lava ha kona. Loko “siku” rero ri hela, hinkwaswo leswi Xikwembu xi swi vumbeke a swi ta sungula ku vonaka. Xana ku wisa koloko a ku ta teka nkarhi wo tanihi kwihi?

Loko hi tlhelela eka mhaka ya Pawulo leyi nga eka Vaheveru, hi vona leswaku u ri “ku sale ku wisa hi savata ka vanhu va Xikwembu,” naswona u khutaze Vakreste-kulobye leswaku va endla hinkwaswo leswi va nga swi kotaka leswaku va ta “nghena eku wiseni koloko.” Leswi swi kombisa leswaku loko Pawulo a tsala marito lawa, “siku ra vunkombo” ra ku wisa ka Xikwembu, leri sunguleke kwalomu ka 4 000 wa malembe lama hundzeke a ra ha ya emahlweni. A ri nge heli ku fikela loko xikongomelo xa Xikwembu malunghana ni vanhu ni misava xi hetiseka hi ku helela emakumu ka ku fuma ka Yesu Kreste ka Gidi ra Malembe, la nga “Hosi ya savata.”—Matewu 12:8; Nhlavutelo 20:1-6; 21:1-4.

Leswi munhu a nga langutelaka ku hetiseka ka ntshembo wolowo, Pawulo u hlamusele ndlela leyi a nga nghenaka ha yona eku wiseni ka Xikwembu. U tsarile: “Munhu la ngheneke eku wiseni ka Xikwembu na yena u wisile emintirhweni yakwe.” Leswi swi hi byela leswaku hambileswi vanhu vo sungula va vumbiweke va hetisekile, sweswo a swi nghenisanga vanhu hinkwavo eku wiseni ka Xikwembu. Leswi swi vangiwe hi leswi Adamu na Evha va nga ku tekelangiki enhlokweni ku wisa ka Xikwembu ka “siku ra vukombo” hi ku amukela lunghiselelo ra xona eka vona. Ematshan’weni ya sweswo, va xandzukile ni ku lava ku tifuma, va nga fumiwi hi Xikwembu. Entiyisweni, va xisiwe hi marhengu ya Sathana va tshika ku amukela minkongomiso ya rirhandzu ya Xikwembu. (Genesa 2:15-17) Hikwalaho ka sweswo, va lahle lunghelo ra ku hanya hilaha ku nga heriki emisaveni leyi nga paradeyisi. Ku sukela hi nkarhi wolowo, vanhu hinkwavo va hundzuke mahlonga ya xidyoho ni rifu.—Varhoma 5:12, 14.

Ku xandzuka ka vanhu a ku xi hundzulanga xikongomelo xa Xikwembu. Siku ra xona ra ku wisa ra ha ya emahlweni. Hambiswiritano, Yehovha u endle lunghiselelo ra rirhandzu—ku nga nkutsulo—hi N’wana wa yena, Yesu Kreste leswaku vanhu hinkwavo lava ri amukelaka hi ku kombisa ripfumelo va ta langutela ku ntshunxiwa evuhlongeni bya xidyoho ni rifu. (Varhoma 6:23) Hi yona mhaka leyi Pawulo a khutazeke Vakreste-kulobye leswaku va ‘wisa emintirhweni ya vona.’ A va fanele va amukela lunghiselelo ra Xikwembu ra ku ponisiwa,va nga tilaveli tindlela ta vona ta ku tirhela vumundzuku, hilaha Adamu na Evha va endleke hakona. Nakambe a va fanele va tshika ku ya emahlweni va endla mintirho ya vona ya vutianakanyi.

 Hakunene swa phyuphyisa ku tshika ku rhangisa swilo swa munhu hi xiyexe leswaku munhu a ta kota ku endla ku rhandza ka Xikwembu. Yesu u te: “Tanani eka mina, n’wina hinkwenu lava tirhaka hi matimba ni lava tikeriwaka, ndzi ta mi phyuphyisa. Tlhandlekani joko ra mina ehenhla ka n’wina mi tlhela mi dyondza eka mina, hikuva ndzi ni moya wo rhula ni mbilu yo titsongahata, kutani mi ta kumela mimoya-xiviri ya n’wina ku phyuphya. Hikuva joko ra mina ra olova ni ndzhwalo wa mina wa vevuka.”—Matewu 11:28-30.

Kunene leswi Pawulo a swi hlamuseleke malunghana ni ku wisa ka Xikwembu ni leswi munhu a nga nghenisaka xiswona eku wiseni koloko, swi ve xikhutazo eka Vakreste lava nga Vaheveru eYerusalema, lava tiyiseleke minxaniso yo tala ni ku hlekuriwa hikwalaho ka ripfumelo ra vona. (Mintirho 8:1; 12:1-5) Hilaha ku fanaka, marito ya Pawulo ma nga va xikhutazo eka Vakreste namuntlha. Leswi hi swi xiyaka leswaku ku hetiseka ka xikongomelo xa Xikwembu malunghana ni ku tisa misava leyi nga paradeyisi, ehansi ka Mfumo wa xona wo lulama, ku kwala nyongeni, na hina hi fanele ku wisa emintirhweni ya hina ivi hi endla hinkwaswo leswi hi nga swi kotaka leswaku hi nghena eku wiseni koloko.—Matewu 6:10, 33; 2 Petro 3:13.

[Swifaniso eka tluka 31]

Xitshembiso xa Xikwembu xa misava leyi nga paradeyisi xi ta hetiseka loko siku ra xona ra ku wisa ri hela