U Nga Va Na Rona Ripfumelo Ra Ntiyiso

Loko Sarah Jayne a ri ni malembe ya 19 hi vukhale, u kume leswaku a a ri ni vuvabyi bya khensa eka xiamukela mbewu xakwe. Endzhaku ka loko a endliwe vuhandzuri, u titwe a antswa naswona a a ri ni ntshembo wa leswaku u ta hlakarhela kutani a hanya. Ntshembo wa yena a wu ri wukulu lerova loko a ri ni malembe ya 20, u vutiwile kutani a sungula ku kunguhata ta mucato wa yena. Hi lembe rero, vuvabyi bya khensa byi tlhele byi vuya, naswona u byeriwe leswaku u ta hanya mavhiki ma nga ri mangani ntsena. Sarah Jayne u fe hi June 2000, a nga si hlanganisa malembe ya 21.

LEXI tsakiseke vanhu lava endzeleke Sarah Jayne loko a ri exibedlhele a ku ri ndlela leyi a a ri ni ntshembo ha yona hi vumundzuku swin’we ni ripfumelo ra yena ro enta eka Xikwembu ni le ka Rito ra xona, ku nga Bibele. Hambileswi a a langutane ni khombo lerikulu, a a ri ni ntshembo lowu tiyeke malunghana ni ku pfuxiwa ka vafi—leswaku u ta tlhela a vona vanghana va yena hinkwavo. (Yohane 5:28, 29) U te: “Ndzi ta mi vona hinkwenu ka n’wina emisaveni leyintshwa ya Xikwembu.”

Van’wana va teka ripfumelo rero ri ri norho ntsena. Ludovic Kennedy wa vutisa: “Xana vanhu lava va kholwaka leswaku ku ni vutomi endzhaku ka rifu a hi vona lava nga riki na ntshembo wa leswaku endzhaku ka mpfumawulo wa nanga yo hetelela, ku ta va ni makhekhe ni vhinyo, hambi ku ri nhlampfi ni mpfumawulo wa nanga ni le ka vona, kambe aEdeni leyi nga ni mirhi va ta avelana minkarhi ya ntsako ni lava va feke eku sunguleni ka vona ni lava van’wana va nga ta fa endzhaku ka vona?” Hikwalaho, hi fanele hi tlakusa xivutiso lexi kanetaka mhaka yoleyo. I yini lexi vonakaka xi antswa, xana i ku kholwa leswaku “vutomi bya hina byi helela kwala, xisweswo hi fanele hi byi tirhisa hi ku helela,” hilaha Kennedy a ringanyeteke hakona,  kumbe, xana hi fanele hi kholwa Xikwembu ni xitshembiso xa xona xa ku pfuxiwa ka vafi? Sarah Jayne u hlawule ku tshemba Xikwembu ni xitshembiso xa xona xa ku pfuxiwa ka vafi. Xana u ri hlakulele njhani ripfumelo ro tano?

“Va Lava Xikwembu . . . Kutani Va Xi Kuma Hakunene”

Leswaku u va ni ripfumelo ni ntshembo eka munhu un’wana, swi lava u n’wi tiva, u tlhela u tiva ni ndlela leyi a ehleketaka ni ku endla swilo ha yona. Endlelo leri ri katsa mbilu ni mianakanyo. Swa fana niloko swi ta emhakeni ya ku hlakulela ripfumelo ra ntiyiso eka Xikwembu. U fanele u xi tiva, u tiva timfanelo ta xona ni vumunhu bya xona, u tiva ndlela leyi xi tshembekaka ha yona eka hinkwaswo leswi xi swi vuleke ni leswi xi swi endleke.—Pisalema 9:10; 145:1-21.

Van’wana va vona onge leswi a swi koteki. Va vula leswaku loko Xikwembu xi ri kona hakunene xi le kule naswona a xi hlamuseleki. Vakaneti va vutisa va ku: “Loko Xikwembu xi ri xa xiviri hilaha swi vonakaka swi ri hakona eka Vakreste vo fana na Sarah Jayne, ha yini xi nga titivisanga eka hina hinkwerhu?” Kambe, xana hakunene Xikwembu xi le kule swinene naswona a xi kumeki? Loko muapostola Pawulo a bula ni vativi va filosofi swin’we ni tintlhari le Atena, u vule leswaku “Xikwembu lexi endleke misava ni swilo hinkwaswo leswi nga eka yona” xi tlhele xi nyikela xin’wana ni xin’wana lexi vanhu va xi lavaka leswaku va ‘xi lava ni ku xi kuma hakunene.’ Entiyisweni, Pawulo u te: “A xi le kule ngopfu ni un’wana ni un’wana wa hina.”—Mintirho 17:24-27.

Kutani, u nga xi ‘lava njhani Xikwembu kutani u xi kuma hakunene’? Van’wana va xi lave hi ku languta vuako hinkwabyo lebyi va rhendzeleke. Eka vo tala, vuako byi nyikela vumbhoni lebyi ringaneke ku va khorwisa leswaku ku fanele ku ri ni Muvumbi. * (Pisalema 19:1; Esaya 40:26; Mintirho 14:16, 17) Va titwa hilaha muapostola Pawulo a ti tweke hakona, leswaku “timfanelo ta [Xikwembu] leti nga vonakiki ta voniwa ku sukela loko misava yi tumbuluxiwile ku ya emahlweni, hikuva ti xiyeka hi swilo leswi endliweke, ni hi matimba ya xona lama nga riki na makumu ni Vukwembu bya xona.”—Varhoma 1:20; Pisalema 104:24.

I Swa Nkoka Leswaku U Va Ni Bibele

Hambiswiritano, u fanele u kuma nchumu wun’wana lowu humaka eka Muvumbi, leswaku u ta aka ripfumelo ra ntiyiso eka yena. I yini nchumu wa kona? I Bibele—Rito ra Xikwembu leri huhuteriweke, laha xi hlavutelaka ku rhandza ka xona ni xikongomelo xa xona. (2 Timotiya 3:16, 17) Van’wana va ta ku: “Kambe yimanyana, xana u nga swi tshemba njhani hinkwaswo leswi Bibele yi swi vulaka kasi hi hala tlhelo u vona swilo swo biha leswi endliwaka hi vanhu lava vulaka leswaku va landzela Bibele?” Phela, rhekhodo ya Vujagana yi tele hi swiendlakalo swa tihanyi letikulu ni mahanyelo yo biha. Kambe, munhu loyi a ehleketaka kahle wa swi vona leswaku Vujagana byi endla onge byi landzela nkongomiso wa Bibele.—Matewu 15:8.

Bibele yi lemukisile leswaku vanhu vo tala va ta endla onge va gandzela Xikwembu, kambe entiyisweni, “va ta ala ni n’wini loyi a va xaveke.” Muapostola Petro u te: “Hikwalaho ka vona, ndlela ya ntiyiso yi ta vulavuriwa ku biha.” (2 Petro 2:1, 2) Yesu Kreste u vule leswaku lava a va ri “vaendli va leswo kala nawu” lava va nga ta voniwa kahle hi swiendlo swa vona swa vubihi. (Matewu 7:15-23) Ku bakanya Rito ra Xikwembu hikwalaho ka rhekhodo ya Vujagana swi fana ni ku cukumeta papila leri humaka eka munghana loyi u n’wi tshembaka ntsena hileswi munhu loyi a ri tiseke eka wena a nga ni ndhuma yo biha.

A hi nge swi koti ku aka ripfumelo ra xiviri loko hi nga ri na rona Rito ra Xikwembu. Yehovha u hlamusela mavonelo yakwe eBibeleni. U hlamula swivutiso leswi vanhu va tshamelaka ku tivutisa swona swo fana nileswaku ha yini a pfumelele ku xaniseka ni swilo leswi vavisaka nileswi a nga ta swi endla mayelana ni swiyimo sweswo. (Pisalema 119:105; Varhoma 15:4) Sarah Jayne u swi vonile leswaku Bibele i Rito ra Xikwembu leri huhuteriweke. (1 Vatesalonika 2:13; 2 Petro 1:19-21) Njhani? A nga swi kholwanga ntsena hikuva a byeriwe hi vatswari va yena, kambe hileswi a tinyikeke nkarhi wa ku kambisisa kahle vumbhoni hinkwabyo lebyi kombisaka leswaku Bibele i buku yo hlawuleka leyi humaka eka Xikwembu. (Varhoma 12:2) Hi xikombiso, u vone nkucetelo lowukulu lowu Bibele yi nga na wona evuton’wini bya vanhu lava landzelaka nkongomiso wa yona. Hi ku pfuniwa hi minkandziyiso yo fana ni lowu nge Bibele—I Rito Ra Xikwembu Kumbe I Ra Munhu?, * u tlhele a kambisisa hi vukheta vumbhoni byo tala lebyi tiyisekisaka leswaku yi huhuteriwe hi Xikwembu.

 “Ripfumelo Ri Landzela Leswi Twiweke”

Hambiswiritano, a swi ringananga ku va ni Bibele kumbe ku tshemba leswaku yi huhuteriwile. Muapostola Pawulo u ri: “Ripfumelo ri landzela leswi twiweke.” (Varhoma 10:17) Leswi akaka ripfumelo, i ku yingisa leswi Bibele yi swi vulaka, ku nga ri ku va ni Bibele ntsena. U “twa” leswi Xikwembu xi swi vulaka hi ku hlaya ni ku dyondza Rito ra xona. Hambi vana va nga swi endla sweswo. Pawulo u vula leswaku “ku sukela loko [a] ha ri ricece” Timotiya u dyondzisiwe “matsalwa yo kwetsima” hi mana wa yena ni kokwana wa yena wa xisati. Xana leswi swi vula leswaku u lo phuntisiwa? Doo! Timotiya a a nga hoxiwanga matomu kumbe ku kanganyisiwa hi ndlela yo karhi. U ‘susumeteleke ku swi pfumela’ leswi a swi tweke ni leswi a swi hlayeke.—2 Timotiya 1:5; 3:14, 15.

Sarah Jayne u susumeteleke hi ndlela leyi fanaka. Ku fana ni Vaberiya va lembe-xidzana ro sungula, u “amukele rito [eka vatswari vakwe ni le ka vadyondzisi van’wana] hi mapfundza lamakulu ya mianakanyo.” Tanihi n’wana lontsongo, handle ko kanakana u swi tshembile leswi vatswari vakwe va n’wi byeleke swona. Endzhaku, loko a ri karhi a kula, a a ngo pfumela xin’wana ni xin’wana lexi a a dyondzisiwa xona. A a “kambisisa Matsalwa hi vukheta siku ni siku ku vona loko swilo leswi swi ri tano.”—Mintirho 17:11.

U Nga Aka Ripfumelo Ra Ntiyiso

Na wena u nga swi kota ku aka ripfumelo ra ntiyiso—ripfumelo leri hlamuseriweke hi muapostola Pawulo eka papila rakwe leri yaka eka Vakreste va Vaheveru. U vule leswaku ripfumelo ro tano i “ku langutela loku tiyisekisiweke ka swilo leswi tshembiwaka, vumbhoni lebyi tiyeke bya leswi nga swa xiviri hambiloko swi nga voniwi.” (Vaheveru 11:1) Loko u ri ni ripfumelo ro tano, u ta tiyiseka hi ku helela leswaku mintshembo ya wena hinkwayo ni leswi u swi languteleke, ku katsa ni xitshembiso xa Xikwembu xa ku pfuxiwa ka vafi, xi ta hetiseka. U ta khorwiseka leswaku mintshembo yoleyo yi seketeriwe eka xitiyisekiso lexi tiyeke, ku nga ri eka ku navela loku ngo va norho ntsena. U ta swi vona leswaku Yehovha a nga si tshama a tsandzeka ku hlayisa switshembiso swa yena. (Yoxuwa 21:45; 23:14; Esaya 55:10, 11; Vaheveru 6:18) Xitshembiso xa Xikwembu xa misava leyintshwa xi ta va xa xiviri eka wena onge hiloko ana se xi hetisekile. (2 Petro 3:13) Naswona u ta swi vona kahle hi matihlo ya ripfumelo leswaku Yehovha Xikwembu, Yesu Kreste, ni Mfumo wa Xikwembu hinkwaswo i swa xiviri, a hi norho.

A wu tshikiwanga u ri swaku leswaku u aka ripfumelo ra ntiyiso. Ku tlhandlekela eka ku va Yehovha a endle leswaku Rito ra yena ri kumeka mahala, u tlhele a nyikela vandlha ra misava hinkwayo ra Vukreste leri tinyiketeleke eku pfuneni vanhu va timbilu  letinene ku aka ripfumelo ra vona eka Xikwembu. (Yohane 17:20; Varhoma 10:14, 15) Amukela mpfuno hinkwawo lowu Yehovha a wu nyikelaka hi ku tirhisa nhlengeletano yoleyo. (Mintirho 8:30, 31) Tanihi leswi ripfumelo ri nga mbhandzu wa moya wa Xikwembu, khongela nkarhi hinkwawo leswaku moya wolowo wu ku pfuna ku kurisa ripfumelo ra ntiyiso.—Vagalatiya 5:22.

U nga chavisiwi hi vahehli va vukhongeri lava sandzaka munhu un’wana ni un’wana loyi a nga ni ripfumelo eka Xikwembu ni le ka Rito ra xona. (1 Vakorinto 1:18-21; 2 Petro 3:3, 4) Entiyisweni, ripfumelo ra ntiyiso i ra nkoka swinene eku ku tiyiseni eka ku tiyimisela ka wena ko lwa ni ku hlasela ko tano. (Vaefesa 6:16) Sarah Jayne u kume sweswo swi ri ntiyiso, naswona minkarhi hinkwayo a a khutaza lava a va n’wi endzela exibedlhele leswaku va aka ripfumelo ra vona. A a tala ku vula a ku: “Endla ntiyiso wu va wa wena. Dyondza Rito ra Xikwembu. Tshama ekusuhi ni nhlengeletano ya Xikwembu. Khongela minkarhi hinkwayo. Tshama u ri karhi u hiseka entirhweni wa Yehovha.”—Yakobo 2:17, 26.

Loko a vona ripfumelo rakwe eka Xikwembu ni le ka mhaka ya ku pfuxiwa ka vafi, un’wana wa vaongori vakwe u te: “Handle ko kanakana wa swi kholwa leswi.” Loko a vutisiwa leswaku i yini lexi n’wi endleke a va ni langutelo lerinene hambiloko a weriwe hi miringo, u hlamurile: “I ku va ni ripfumelo eka Yehovha. I munghana wa mina wa ntiyiso, naswona ndzi n’wi rhandza ngopfu.”

[Tinhlamuselo ta le hansi]

[Xifaniso eka tluka 6]

“Ku sukela loko [a] ha ri ricece” Timotiya u dyondzisiwe “matsalwa yo kwetsima” hi mana wa yena ni kokwana wa yena

[Xifaniso eka tluka 6]

Vaberiya va bumabumeriwile hi ku kambisisa Matsalwa siku ni siku

[N’wini wa Xifaniso]

Ku suka eka “Photo-Drama of Creation,” 1914

[Swifaniso eka tluka 7]

Ku yingisa ni ku landzela leswi Bibele yi swi vulaka, hi swona leswi akaka ripfumelo

[Xifaniso eka tluka 7]

“Ndzi ta mi vona hinkwenu ka n’wina emisaveni leyintshwa ya Xikwembu”