“Se Ndza Swi Tiva Leswaku Ndzi Khomiwe Hi Yini!”

HI YONA ndlela leyi wanuna wa le Tokyo a titweke ha yona loko a heta ku hlaya mhaka ya vutomi eka Xihondzo xo Rindza xa December 1, 2000. Xihloko xa kona a xi ku “A Mi Swi Tivi Leswaku Vutomi Bya N’wina Byi Ta Va Yini Mundzuku,” naswona xi hlamusele ntokoto wa khale ka murhumiwa loyi a khomiwe hi vuvabyi bya ntshikilelo wa mianakanyo lebyi tiviwaka tanihi manic-depressive psychosis.

Wanuna wa le Tokyo u vule leswi epapileni leri a ri tsaleleke vakandziyisi va magazini lowu: “Swi vonaka na mina ndzi khomiwe hi byona vuvabyi lebyi hlamuseriweke laha. Kutani ndzi ye exibedlhele xa miehleketo naswona ndzi byeriwe leswaku ndzi khomiwe hi vuvabyi bya ntshikilelo wa mianakanyo. Dokodela loyi a ndzi kambeleke u hlamarile. U te, ‘Vanhu lava nga ni vuvabyi lebyi a va tali ku ehleketa leswaku va vabya.’ Ndzi pfuniwe ku tiva vuvabyi lebyi ndzi khomeke byi nga si nyanya.”

Vanhu va timiliyoni emisaveni hinkwayo va vuyeriwa hi tindlela to hambana-hambana loko va hlaya nkandziyiso ha wun’we wa Xihondzo xo Rindza ni magazini lowu fambisanaka na xona wa Xalamuka! Va kuma leswaku swihloko swa kona swa dyondzisa naswona swa tsakisa. Sweswi magazini wa Xihondzo xo Rindza wu kandziyisiwa hi tindzimi ta 141 kasi Xalamuka! yi kandziyisiwa tindzimi ta 86. Na wena u ta swi tsakela ku hlaya Xihondzo xo Rindza ni Xalamuka! minkarhi hinkwayo.