Swivutiso Swa Vahlayi

Xana tinsika leti rhwalaka areka ya ntwanano a ti vekiwa ti languta kwihi, tanihi leswi 1 Tihosi 8:8 yi kombisaka leswaku a ti vonaka loko u ri eNdhawini yo Kwetsima?

Loko Yehovha a nyika Muxe mpfampfarhuto wa tabernakele emananga, nchumu wa nkoka eka yona a ku ri areka ya ntwanano. Bokisi leri, leri a ri namekiwe nsuku a ri ri ni swiphepherhele swa Nawu ni swilo swin’wana. A ri vekiwe ekamareni ra le ndzeni-ndzeni, eNdhawini yo Kwetsima Ngopfu. Eka xifunengeto xa Areka a ku ri ni swifaniso swa makerubu mambirhi lama phurumuleke timpapa. Ematlhelo ka Areka, a ku ri ni ndhawu leyi a ku hoxiwa tinsika timbirhi to yi rhwala ha yona, leti a ti endliwe hi nsinya wa munga kutani ti namekiwa hi nsuku. Hikwalaho, tinsika a ti hoxiwa endhawini yoleyo leyi nga le tlhelo ka Areka. Xisweswo, leswi Areka a yi langute evuxeni loko yi vekiwe eNdhawini yo Kwetsima Ngopfu ya tabernakela, tinsika tona a ti langute en’walungu-dzonga. A swi ri tano niloko Areka yi ri etempeleni leyi akiweke hi Solomoni.—Eksoda 25:10-22; 37:4-9; 40:17-21. *

A ku ri ni nguvu leyi hambanisaka Ndhawu yo Kwetsima Ngopfu ni Ndhawu yo Kwetsima (ku nga kamara ra le handle). Vaprista lava tshamaka eNdhawini yo Kwetsima a va nga fanelanga va languta Areka leyi nga eNdhawini yo Kwetsima Ngopfu, laha Xikwembu xi tikombisaka kona. (Vaheveru 9:1-7) Xisweswo, 1 Tihosi 8:8 yi nga ha vonaka yi nga twisiseki loko yi ku: “Tinsika a ti lehile lerova makumu ya tinsika a ma vonaka loko u ri eNdhawini yo Kwetsima, emahlweni ka kamara ra le ndzeni-ndzeni, kambe a ma nga vonaki loko u ri ehandle.” Yinhla leyi fanaka yi kumeka eka 2 Tikronika 5:9. A swi tisa ku yini leswaku vanhu hinkwavo lava nga eNdhawini yo Kwetsima ya tempele va vona tinsika leti?

Van’wana va anakanya leswaku tinsika a ti khumba nguvu, kutani ti humela hala tlhelo lerin’wana. Kambe a swi nga ta va tano loko tinsika a ti langute en’walungu-dzonga, kasi nguvu ya kona a yi lavane ni tinsika. (Tinhlayo 3:38) Ku ni nhlamuselo ya kahle. Tinsika leti a ti ta vonaka loko ko tshuka ku va ni vangwa exikarhi ka nguvu ni khumbi ra tempele kumbe loko muprista lonkulu a nghena eNdhawini yo Kwetsima Ngopfu. Nguvu leyi a yi endla leswaku Areka yi nga vonaki, kambe tinsika leti leheke ematlhelo hinkwawo a ti ta vonaka eka vangwa rero. Hambiloko nhlamuselo leyi yi twisiseka, a hi nge yi namarheli ku tlula mpimo.

Swi le rivaleni leswaku ka ha ri ni vuxokoxoko byo tala lebyi hi nga byi kumaka. Muapostola Pawulo u boxe timhaka to hlayanyana epapileni rakwe leri yaka eka Vaheveru. Kutani u te: “Sweswi a hi nkarhi wo vulavula hi vuenti malunghana ni swilo leswi.” (Vaheveru 9:5) Ku pfuxiwa ka vanhu lavo tshembeka loku taka ku ta hi nyika lunghelo ro vutisa vavanuna vo fana na Muxe, Aroni, Bezalele ni van’wana lava a va tolovelane ni ku endliwa ka tabernakele.—Eksoda 36:1.

[Nhlamuselo ya le hansi]