“Nkateko Wa Yehovha—Hi Wona Lowu Fuwisaka”

HINKWERHU ha swi lava ku katekisiwa. The American Heritage College Dictionary yi vula leswaku mikateko yi kondletela “ntsako, vuhlayiseki kumbe ku humelela.” Tanihi leswi Yehovha a nga Munyiki wa “nyiko yin’wana ni yin’wana leyinene ni nyiko yin’wana ni yin’wana leyi hetisekeke” nkateko wun’wana ni wun’wana wa xiviri ni lowu nga heriki wu huma eka Muvumbi wa hina loyi a nga ni rirhandzu. (Yakobo 1:17) U nyika vanhu hinkwavo mikateko, hambi ku ri lava va nga n’wi tiviki. Yesu u vule leswi hi Tata wa yena: “[U tsuvukisa] dyambu ra yena eka vanhu vo homboloka ni lavanene naswona [u nisa] mpfula yakwe ehenhla ka vanhu lava lulameke ni lava nga lulamangiki.” (Matewu 5:45) Hambiswiritano, Yehovha u kombisa nkhathalelo wo hlawuleka eka lava va n’wi rhandzaka.—Deteronoma 28:1-14; Yobo 1:1; 42:12.

Mupisalema u tsarile: “Yehovha a nge va tsoni nchumu wihi ni wihi lowunene lava fambaka hi ndlela leyi pfumalaka xihoxo.” (Pisalema 84:11) Ina, lava tirhelaka Yehovha va hanya vutomi lebyi fuweke lebyi nga ni xikongomelo. Va khorwiseka leswaku “nkateko wa Yehovha—hi wona lowu fuwisaka, naswona a nga engeteli ku vaviseka eka wona.” Bibele yi tlhela yi ku: “Lava katekisiwaka hi [Yehovha] va ta fuwa misava.” (Swivuriso 10:22; Pisalema 37:22, 29) Mawaku nkateko wonghasi!

Xana hi nga yi kuma njhani mikateko ya Yehovha? Hi fanele hi rhanga hi hlakulela timfanelo leti n’wi tsakisaka. (Deteronoma 30:16, 19, 20; Mikiya 6:8) Leswi hi nga swi vona eka swikombiso swinharhu swa malandza ya Yehovha ya le minkarhini ya khale.

Yehovha U Katekisa Malandza Ya Yena

Nowa a a ri nandza wo hlawuleka wa Xikwembu. Eka Genesa 6:8, ha hlaya: “Nowa a kuma tintswalo ematihlweni ya Yehovha.” Hikokwalaho ka yini? Hikuva Nowa a a yingisa. Mhaka ya kona yi ri: “Nowa a a famba ni Xikwembu xa ntiyiso.” Nowa u landzele misinya ya milawu yo lulama ya Yehovha ni ku yingisa swileriso swa yena. Hi nkarhi lowu misava a yi mbombomele eka madzolonga ni vuhomboloki, Nowa, u susumeteleke ku “endla hinkwaswo hilaha Xikwembu xi n’wi leriseke hakona. U endle tano.” (Genesa 6:9, 22) Hikwalaho, Yehovha u lerise Nowa ku aka “ngalava leswaku ku ponisiwa ndyangu wakwe.” (Vaheveru 11:7) Hi ndlela leyi, Nowa ni ndyangu wa yena va pone ndzoviso wa nkarhi wolowo, kutani vanhu hinkwavo va hume eka vona. Naswona Nowa u fe a ri ni ntshembo wa ku pfuxeriwa evuton’wini lebyi nga heriki emisaveni leyi nga paradeyisi. Mawaku mikateko leyikulu swonghasi leyi a yi kumeke!

Abrahama na yena a a ri ni timfanelo leti tsakiseke Yehovha. Ya nkoka swinene eka tona a ku ri ripfumelo. (Vaheveru 11:8-10) Abrahama u sukele vutomi byo tsakisa eUra kutani endzhakunyana a ya eHarani hikuva a a ri ni ripfumelo eka xitshembiso xa Yehovha xa leswaku mbewu ya yena yi ta tala naswona yi va nkateko eka matiko hinkwawo. (Genesa 12:2, 3) Ku nga khathariseki leswi a ringiweke malembe yo tala, ripfumelo ra yena ri hakeriwile loko n’wana wa yena Isaka a velekiwa. Hikokwalaho ka yena, Abrahama u ve kokwa wa tiko ra Xikwembu leri hlawuriweke ku nga Israyele naswona u hetelele a ve kokwa wa Mesiya. (Varhoma 4:19-21) Ku tlula kwalaho, i “tata wa hinkwavo lava va nga ni ripfumelo,” naswona u sungule ku vitaniwa “nakulobye wa Yehovha.” (Varhoma  4:11; Yakobo 2:23; Vagalatiya 3:7, 29) Kunene u hanye vutomi lebyi nga ni xikongomelo naswona u katekisiwe ngopfu!

Nakambe xiya wanuna wo tshembeka Muxe. Mfanelo ya yena leyi a yi hlamarisa a ku ri ku tlangela ka yena swilo swa moya. Muxe u ale rifuwo hinkwaro ra le Egipta kutani a “hambeta a tserhama onge hiloko a vona Loyi a nga vonakiki.” (Vaheveru 11:27) Endzhaku ko heta malembe ya 40 eMidiyani, u tlhelele aEgipta a ri mukhalabye naswona a ya jamelana ni mufumi lonkulu wa nkarhi wolowo, ku nga Faro, a ya koxa ntshunxeko wa vamakwavo. (Eksoda 7:1-7) U vone makhombo ya khume, ku pandziwa ka Lwandle ro Tshwuka hi le xikarhi, ni ku lovisiwa ka mavuthu ya Faro. Yehovha u tirhise yena ku nyika Vaisrayele Nawu ni ku va muvulavuleri wa ntwanano Wakwe ni tiko lerintshwa. Muxe u rhangele tiko ra Israyele emananga ku ringana malembe ya 40. Vutomi bya yena a byi ri ni xikongomelo xa ntiyiso, naswona u tiphine hi mikateko yo tala swinene ya ntirho wa yena.

Mikateko Ya Le Masikwini Ya Hina

Timhaka leti ti kombisa leswaku vutomi bya lava tirhelaka Xikwembu byi ni xikongomelo xa ntiyiso. Loko vanhu va Yehovha va va ni timfanelo to tanihi ku titsongahata, ripfumelo ni ku tlangela swilo swa moya, va katekisiwa hilaha ku fuweke.

Hi katekisiwa njhani? Loko timiliyoni exikarhi ka Vujagana ti ri ni ndlala ya moya, hi nga “vangama hikwalaho ka vunene bya Yehovha.” (Yeremiya  31:12) Hi ku tirhisa Yesu Kreste ni “hlonga ro tshembeka ni ro tlhariha,” Yehovha u hi nyike swakudya swo tala swa moya leswi hi pfunaka ku tshama ‘enyangweni leyi yisaka evuton’wini.’ (Matewu 7:13, 14; 24:45; Yohane 17:3) Ku tihlanganisa ni vamakwerhu va Vakreste i nkateko wun’wana lowu fuweke. Eka minhlangano ni swiendlakalo swin’wana, ku va ni vagandzeri-kulorhi lava kombisaka rirhandzu ni lava tikarhatelaka ku ambala “vumunhu lebyintshwa” i xivangelo xa ntsako lowukulu. (Vakolosa 3:8-10; Pisalema 133:1) Hambiswiritano, nkateko wa hina lowukulu i lunghelo ra risima ro va ni vuxaka lebyinene na Yehovha Xikwembu ni ku landzelela mikondzo ya N’wana wa yena, Kreste Yesu.—Varhoma 5:1, 8; Vafilipiya 3:8.

Loko hi anakanyisisa hi mikateko yoleyo, ha swi xiya leswaku ntirho wa hina i wa risima eka Xikwembu hakunene. Kumbexana hi ehleketa hi xifaniso xa Yesu xa muxavisi la famba-fambaka a lava tiperela letinene. Yesu u vule leswi malunghana ni wanuna loyi: “Loko a kuma perela yin’we ya risima lerikulu, a famba a hatlisa a ya xavisa swilo hinkwaswo leswi a a ri na swona kutani a yi xava.” (Matewu 13:46) Hakunene yoleyo i ndlela leyi hi titwaka ha yona malunghana ni vuxaka bya hina ni Xikwembu, lunghelo ra hina ro xi tirhela, vuxaka bya hina ni Vakreste-kulorhi, ntshembo wa hina wa Vukreste ni mikateko yin’wana hinkwayo leyi fambisanaka ni ripfumelo ra hina. A ku na nchumu wun’wana wa risima evuton’wini bya hina.

Tlherisela Eka Yehovha

Leswi hi xiyaka Yehovha tanihi Munyiki wa nyiko yin’wana ni yin’wana leyinene, timbilu ta hina ti hi susumetela ku tlangela mikateko leyi hi yi kumaka. Xana hi nga swi endla njhani sweswo? Ndlela yin’wana i ku pfuna van’wana leswaku  va tiphina hi mikateko leyi fanaka. (Matewu 28:19) Timbhoni ta Yehovha ti endzela vaakelani va tona ematikweni lama tlulaka 230, ku ya endla leswi fanaka. Loko ti ri karhi ti endla sweswo, ti tirhisa rifuwo ra tona leritsongo—nkarhi, matimba ni swilo swa tona leswi vonakaka—ku pfuna van’wana ku “fikelela vutivi lebyi kongomeke bya ntiyiso.”—1 Timotiya 2:4.

Anakanya hi maphayona lama tshamaka eGlendale, California, le U.S.A. Mugqivela wun’wana ni wun’wana ni mpundzu, wu famba kwalomu ka 100 wa tikhilomitara ku ya ni ku vuya wu endzela endhawini leyi ku tshamaka vabohiwa va tipolitiki. Hambileswi wu hetaka tiawara ti nga ri tingani eka riendzo rin’we ni vakhotsiwa, a wu heli matimba. Un’wana wa wona u ri: “Swa vuyerisa swinene ku tirha nsimu leyi yo ka yi nga tolovelekangi. Hi yi tirha hi tsakile swinene. Ku ni vanhu vo tala swinene lerova a hi swi koti kahle ku va fikelela. Sweswi, hi dyondza ni ntlhanu wa vanhu kasi van’wana va mune va kombele ku dyondza Bibele.”

Vatirheli lava hisekaka va Vakreste va endla mintirho ya vona mahala hi ntsako leswaku va hetisisa ntirho lowu wu ponisaka vutomi. Va kombisa langutelo ra Yesu, loyi a nga te: “Mi amukele mahala, nyikani mahala.” (Matewu 10:8) Vanhu va timiliyoni emisaveni hinkwayo va hlanganyela entirhweni lowu fanaka handle ka vutianakanyi, naswona hikokwalaho ka sweswo, mintshungu ya vanhu va timbilu to tshembeka ya ri amukela rungula leri naswona yi va vadyondzisiwa. Emalembeni ya ntlhanu lama hundzeke, vanhu va kwalomu ka 1,7 wa timiliyoni va nyiketele vutomi bya vona eka Yehovha. Leswaku ku khathaleriwa swilaveko leswi yaka emahlweni ku laveka leswaku ku endliwa Tibibele ni tibuku leti sekeriweke eBibeleni xikan’we ni ku aka Tiholo ta Mfumo letintshwa ni tindhawu tin’wana ta minhlangano. Xana mali yo pfuneta swilaveko leswi yi huma kwihi? I minyikelo ya ku tirhandzela ntsena.

Leswi xiyimo xa ikhonomi xi hohlokeke eka swiphemu swin’wana swa misava, vo tala swa va tikela ku lavela mindyangu ya vona swilo swa nkoka evuton’wini. Hi ku ya hi magazini lowu nge New Scientist, gidi rin’we ra timiliyoni ra vanhu va tirhise 70 wa tiphesente ta miholo eka swakudya swa mindyangu ya vona. Vamakwerhu vo tala va xinuna ni va xisati va Vakreste na vona va le ka xiyimo xo fana na xexo. Handle ka mpfuno lowu humaka eka vapfumeri-kulobye, a va nga ta swi kota ku kuma swilo swo fana ni minkandziyiso ya Vukreste kumbe Tiholo ta Mfumo leti faneleke.

I ntiyiso, leswi a swi vuli swona leswaku vanhu vo tano va enerisiwa hi ku rhwaleriwa mimpingu ya vona. Kambe va lava mpfuno. Muxe loko a khutaza Vaisrayele ku endla minyikelo leswaku va nkhensa Yehovha hi leswi a va katekiseke, u te: “Nyiko ya voko ra un’wana ni un’wana yi fanele yi ringana ni nkateko lowu Yehovha Xikwembu xa wena a ku nyikeke wona.” (Deteronoma 16:17) Hikwalaho, loko Yesu a vone noni yi nyikela “swimalana swimbirhi swa nsimbi swa ntikelo wa le hansi swinene” etempeleni, u n’wi ndhundhuzerile eka vadyondzisiwa va yena. U endle leswi a swi koteke. (Luka 21:2, 3) Hilaha ku fanaka, Vakreste lava pfumalaka swinene va endla leswi va swi kotaka. Naswona loko ku ri ni leswi kayivelaka, swi nga kumiwa hi ku tirhisa minyikelo ya Vakreste-kulobye lava nga pfumaliki.—2 Vakorinto 8:13-15.

Loko hi tlherisela eka Xikwembu hi tindlela to tano, i swa nkoka leswaku hi va ni nsusumeto lowunene. (2 Vakorinto 8:12) Pawulo u te: “Un’wana ni un’wana a a endle hilaha a boheke hakona embilwini yakwe, ku nga ri hi ku vilela kumbe hi ku sindzisiwa, hikuva Xikwembu xi rhandza munyiki la tsakeke.” (2 Vakorinto 9:7) Hi ku nyikela swi huma embilwini, hinkwerhu hi seketela ku andza loku nga kona sweswi ka swilo swa le tilweni ni ku engetela ntsako wa hina.—Mintirho 20:35.

Ku avelana entirhweni wo chumayela ni ku endla minyikelo ya ku tirhandzela i tindlela timbirhi leti hi nga nyikaka Yehovha ha tona hikwalaho ka mikateko leyi a hi nyikeke yona. A hi ku khutaza ka swona ku tiva leswaku Yehovha wa ha navela ku va chululela nkateko vanhu vo tala va timbilu letinene, lava va nga si n’wi tivaka! (2 Petro 3:9) Hikokwalaho, a hi hambeteni hi tirhisa rifuwo ra hina entirhweni wa Xikwembu leswaku hi ta kuma vanhu va timbilu to tshembeka ni ku va pfuna ku kurisa timfanelo to fana ni ku yingisa, ripfumelo ni ku nkhensa. Hi ndlela yoleyo, hi ta tsaka hi ku va pfuna ku ‘nantswa va vona leswaku Yehovha hi lonene.’—Pisalema 34:8.

[Bokisi eka tluka 28, 29]

Tindlela Leti Van’wana Va Hlawulaka Ku Nyikela Ha Tona

MINYIKELO YA NTIRHO WA MISAVA HINKWAYO

Vo tala va tivekela mali yo karhi leyi va nga ta hamba va yi nghenisa emabokisini ya minyikelo lama funghiweke leswaku “Minyikelo Ya Ntirho Wa Misava Hinkwayo—Matewu 24:14.”

N’hweti na n’hweti mavandlha ma rhumela minyikelo leyi hi ku kongoma eyindlu-nkulu ya misava hinkwayo ya Timbhoni ta Yehovha eBrooklyn, New York, kumbe ehofisini ya rhavi ya le kusuhi. Minyikelo ya ku tirhandzela na yona yi nga ha rhumeriwa hi ku kongoma eka Accounting Office, Watch Tower Bible and Tract Society of Pennsylvania, Private Bag X2067, Krugersdorp, 1740, South Africa, kumbe ehofisini ya rhavi leyi langutelaka tiko ra ka n’wina. Swin’wetsin’wetsi kumbe swilo swin’wana swa nkoka na swona swi nga ha nyikeriwa. Minyikelo yo tano yi fanele ku fambisana ni papila ro koma leri hlamuselaka leswaku leyi i nyiko.

LUNGHISELELO RA MINYIKELO YA KU YA HI SWIYIMO

Mali yi nga nyikeriwa ehansi ka lunghiselelo ro hlawuleka, loko munhu wa kona a yi lava, yi ta tlheriseriwa eka yena. Leswaku u kuma rungula leri engetelekeke, hi kombela u tihlanganisa ni Accounting Office ya hofisi ya rhavi ra le kusuhi eka adirese leyi nga laha henhla.

NYIKO LEYI KUNGUHATIWEKE

Ku engetela eka minyikelo leyi kongomeke ni minyikelo ya mali ya ku ya hi swiyimo, ku na tindlela tin’wana ta ku nyikela leti vuyerisaka ntirho wa Mfumo wa misava hinkwayo. Leti ti katsa:

Ndzindza-khombo: Sosayiti ya Watch Tower yi nga ha tsarisiwa tanihi leyi nga ta vuyeriwa eka fambiselo ra ndzindza-khombo wa vutomi, eka mali ya ku tshika ntirho kumbe mudende.

Mali Leyi Lombisiweke Hi Ntswalo: Mali leyi lombisiweke hi ntswalo yi nga nyikeriwa eka Sosayiti ya Watch Tower.

Purasi: Purasi leri xavisiwaka ri nga ha nyikeriwa eka Sosayiti ya Watch Tower tanihi nyiko leyi heleleke kumbe hi ntwanano wa leswaku a ri nge tekiwi loko loyi a ri nyikeleke a ha tshama ka rona kumbe a ha hanya. Tivisa hofisi ya rhavi ya le tikweni ra ka n’wina u nga si nyikela hi purasi.

Swiboho: Nhundzu kumbe mali swi nga ha nyikiwa Sosayiti ya Watch Tower hi ku tirhisa xileriso xa mufi lexi nga enawini.

Loko u lava ku tiva hi man’wana ya malunghiselelo ya tinyiko leti kunguhatiweke, u fanele u vulavurisana ni Accounting Office hi ku tsala papila kumbe hi ku ba riqingho, eka adirese leyi nga laha hansi kumbe eka hofisi ya Sosayiti leyi langutelaka tiko ra ka n’wina.

ACCOUNTING OFFICE

Watch Tower Bible and Tract Society of Pennsylvania

Private Bag X2067,

Krugersdorp, 1740, South Africa

Riqingho: (011) 761 1000