‘Vanani Ni Mbilu Yo Leha’
‘Vanani Ni Mbilu Yo Leha’
“Tiambexeni xinakulobye lexikulu xa tintswalo . . . ni ku va ni mbilu yo leha.”—VAKOLOSA 3:12.
1. Hlamusela xikombiso lexinene xa ku lehisa mbilu.
RÉGIS, la tshamaka edzonga-vupela-dyambu bya tiko ra Furwa u ve Mbhoni ya Yehovha leyi khuvuriweke hi 1952. Swi teke malembe nsati wakwe a ri karhi a lwa hi matimba leswaku a sivela nuna loyi wa yena ku tirhela Yehovha. U ringete ku poncisa mathayere ya movha wa nuna wakwe leswaku a n’wi sivela ku ya eminhlanganweni, naswona siku rin’wana u kale a n’wi sala endzhaku loko a ri karhi a chumayela rungula ra Bibele hi yindlu ni yindlu, a n’wi endla xihlekiso loko a ri karhi a vulavula ni vini va miti hi mahungu lamanene ya Mfumo. Hambileswi a a tshamiwe ehenhla hi ndlela leyi, Régis a nga helanga mbilu. Hikwalaho Régis i xikombiso lexinene eka Vakreste hinkwavo namuntlha, tanihi leswi Yehovha a lavaka leswaku vagandzeri vakwe hinkwavo va lehisela van’wana mbilu.
2. Hi yihi nhlamuselo leyi kongomeke ya rito ra Xigriki leri vulaka “ku lehisa mbilu,” naswona sweswo swi vula yini?
2 Rito ra Xigriki ra “ku lehisa mbilu” hi ku kongoma ri vula “ku va ni moya wo leha.” Vuhundzuluxeri Bya Misava Leyintshwa byi hundzuluxela rito ra kona hi marito lama nge “ku lehisa mbilu.” Marito ya Xiheveru ni ya Xigriki lama hundzuluxeriweke ma va “ku lehisa mbilu” ma katsa ku va ni mbilu, ku tiyisela ni ku hlwela ku hlundzuka.
3. Ndlela leyi Vakreste a va languta ku lehisa mbilu ha yona a yi hambana njhani ni leyi Vagriki va lembe-xidzana ro sungula a va ku teka ha yona?
3 Vagriki va lembe-xidzana ro sungula a va nga teki ku lehisa mbilu ku ri mfanelo leyinene. Vativi va filosofi lava dyondzeke exikolweni xa Stoyika a va nga ri tirhisi rito rero. Hi ku ya hi William Barclay, loyi a nga xidyondzi xa Bibele, ku lehisa mbilu “i rito-fularha ra rito ra Xigriki leri vulaka vunene,” hikuva yin’wana ya tinhlamuselo ta yona i “ku nga pfumeli ku tseketseriwa kumbe ku endliwa swo biha.” U ri: “Eka Mugriki nhenha a ku ri munhu loyi a a nga etleli loko a nga si tirihisela. Eka Mukreste nhenha i munhu loyi a nga tirihiseriki hambiloko xiyimo xi n’wi pfumelela.” Swi nga ha endleka Vagriki a va teka ku lehisa mbilu ku ri xikombiso xa ku tsana, kambe laha ku fana ni le tindhawini tin’wana, “xilo xa vuphukuphuku lexi nga xa Xikwembu xi tlharihe ku tlula vanhu, naswona xilo lexi tsaneke lexi nga xa Xikwembu xi ni matimba ku tlula vanhu.”—1 Vakorinto 1:25.
Xikombiso Xa Kreste Xa Ku Lehisa Mbilu
4, 5. Hi xihi xikombiso lexinene xa ku lehisa mbilu lexi Yesu a xi vekeke?
4 Kreste Yesu u veka xikombiso lexinene ngopfu xa ku lehisa mbilu, lexi tluriwaka hi xa Yehovha ntsena. Loko a ri ehansi ka ntshikilelo lowukulu, Yesu u tiyisele hi ndlela leyi hlamarisaka. Malunghana na yena ku profetiwe leswi: “A a tikeriwa, naswona a a titshika a xaniseka; kambe a nga wu pfulanga nomu. A a tisiwa laha ku dlayeriwaka kona ku fana ni nyimpfu; ku fana ni nyimpfu leyi pfaleke nomu emahlweni ka vatsemeti va yona, na yena a nga wu pfulanga nomu.”—Esaya 53:7.
5 Yesu u lehise mbilu hi ndlela leyi hlamarisaka evutirhelini bya yena loko a ri laha emisaveni! U tiyiselele swivutiso swa valala vakwe leswi a swi ri swa vukanganyisi swin’we ni ku sandziwa hi vakaneti vakwe. (Matewu 22:15-46; 1 Petro 2:23) U lehisele vadyondzisiwa va yena mbilu hambiloko va tshamela ku phikizana hileswaku i mani lonkulu eka vona. (Marka 9:33-37; 10:35-45; Luka 22:24-27) Nakambe Yesu u lehise mbilu swinene hi vusiku lebyi a nga xengiwa hi byona loko Petro na Yohane va khudzeherile endzhaku ka loko a va byele leswaku ‘va tshama va rindzile’!—Matewu 26:36-41.
6. Pawulo u vuyeriwe njhani hi ku lehisa mbilu ka Yesu, naswona hi dyondza yini eka leswi?
6 Endzhaku ka ku fa ni ku pfuxiwa ka yena, Yesu u hambete a lehisa mbilu. Muapostola Pawulo u swi xiye kahle leswi, tanihi leswi a tshameke a xanisa Vakreste. Pawulo u tsarile: “Rito ra leswaku Kreste Yesu u tile emisaveni leswaku a ta ponisa vadyohi ri tshembekile naswona ri fanele ku amukeriwa hi ku helela. Eka vona ndzi le mahlweni. Nilokoswiritano, xivangelo xa ku kombisiwa ka mina tintswalo, hileswaku ha mina loyi ndzi nga exiyin’weni xo rhanga, Kreste Yesu a ta komba ku va ni mbilu yo leha kakwe hinkwako, sweswo swi va xikombiso eka lava va nga ta veka ripfumelo ra vona eka yena leswaku va kuma vutomi lebyi nga heriki.” (1 Timotiya 1:15, 16) Ku nga khathariseki leswaku khale a hi hanyisa ku yini, loko hi pfumela eka Yesu u ta hi lehisela mbilu—kambe yena u ta va a langutele leswaku hi endla “mintirho leyi fambelanaka ni ku hundzuka.” (Mintirho 26:20; Varhoma 2:4) Marungula lawa Kreste a ma rhumeleke emavandlheni ya nkombo ya le Asia Minor ma kombisa leswaku hambiloko a lehisa mbilu, u langutele leswaku hi endla nhluvuko.—Nhlavutelo, ndzima 2 na 3.
Mbhandzu Wa Moya
7. Hi kwihi ku hlangana exikarhi ka ku lehisa mbilu ni moya lowo kwetsima?
7 Eka ndzima ya vuntlhanu ya papila ra yena leri yaka eka Vagalatiya, Pawulo u kombisa ku hambana exikarhi ka mintirho ya nyama ni mihandzu ya moya. (Vagalatiya 5:19-23) Tanihi leswi ku lehisa mbilu ku nga yin’wana ya timfanelo ta Yehovha, mfanelo leyi yi huma eka yena naswona i mbhandzu wa moya wa yena. (Eksoda 34:6, 7) Hakunene, ku lehisa mbilu i mbhandzu wa moya wa vumune eka leyi xaxametiweke hi Pawulo, laha leyin’wana ku nga “rirhandzu, ntsako, ku rhula, . . . musa, vunene, ripfumelo, ku olova, ku tikhoma.” (Vagalatiya 5:22, 23) Hikwalaho, loko malandza ya Xikwembu ma lehisa mbilu hi ndlela leyi xona xi yi lehisaka ha yona, ma va ma susumetiwa hi moya lowo kwetsima.
8. I yini lexi nga ta hi pfuna ku hlakulela mihandzu ya moya, ku katsa ni wa ku lehisa mbilu?
8 Hambiswiritano, sweswo a swi vuli leswaku Yehovha u tikirheta moya wa yena hi nkani ehenhla ka munhu. Hi fanele hi pfumela swi huma embilwini leswaku wu hi lawula. (2 Vakorinto 3:17; Vaefesa 4:30) Hi pfumelela moya leswaku wu lawula vutomi bya hina hi ku hlakulela mihandzu ya wona eka hinkwaswo leswi hi swi endlaka. Endzhaku ko xaxameta mintirho ya nyama ni mihandzu ya moya, Pawulo u ye emahlweni a ku: “Loko hi hanya hi moya, nakambe a hi hambeteni hi famba hilaha ku hlelekeke hi moya. Mi nga tshuki mi hambukisiwa: Xikwembu a hi xa ku vungunyiwa. Hikuva xin’wana ni xin’wana lexi munhu a xi byalaka, u ta tlhela a tshovela xona; hikuva loyi a byalelaka nyama ya yena u ta tshovela ku onhaka enyameni yakwe, kambe loyi a byalelaka moya u ta tshovela vutomi lebyi nga heriki emoyeni.” (Vagalatiya 5:25; 6:7, 8) Loko hi ta kota ku hlakulela moya wa ku lehisa mbilu, hi fanele hi hlakulela ni mihandzu leyin’wana hinkwayo leyi Vakreste va yi kombisaka hi ku pfuniwa hi moya lowo kwetsima.
“Rirhandzu Ri Ni Mbilu Yo Leha”
9. Xi nga va xi ri xihi xivangelo xa ku va Pawulo a byele Vakorinto leswaku “rirhandzu ri ni mbilu yo leha”?
9 Pawulo u kombise leswaku ku ni ku yelana lokukulu exikarhi ka rirhandzu na ku lehisa mbilu, loko a ku: “Rirhandzu ri ni mbilu yo leha.” (1 Vakorinto 13:4) Albert Barnes, loyi a nga xidyondzi xa Bibele, u ringanyeta leswaku Pawulo u kandziyise mhaka leyi hileswi a ku ri ni timholovo evandlheni ra Vakreste le Korinto. (1 Vakorinto 1:11, 12) Barnes u ri: “Rito leri tirhisiweke laha [leri vulaka ku lehisa mbilu] i rito-fularha ra matlotlo: marito ya vukari ni ku siringeka. Ri vula KU TIYISELA loko u tshimbiteriwa kumbe u pfukiwa.” Rirhandzu ni ku lehisa mbilu ni sweswi swi pfuna swinene leswaku ku va ni ku rhula evandlheni ra Vukreste.
10. (a) Rirhandzu ri hi pfuna njhani leswaku hi lehisa mbilu, naswona i xitsundzuxo xihi lexi muapostola Pawulo a hi nyikaka xona emhakeni leyi? (b) I nhlamuselo yihi leyi vuriweke hi xidyondzi xin’wana xa Bibele malunghana ni timfanelo ta Xikwembu ta ku lehisa mbilu ni musa? (Vona nhlamuselo ya le hansi.)
10 “Rirhandzu ri ni mbilu yo leha ni musa. Rirhandzu . . . a ri lavi leswi vuyerisaka rona ntsena, a ri hlundzuki.” Hikwalaho, rirhandzu ri hi pfuna hi tindlela to tala leswaku hi lehisa mbilu. * (1 Vakorinto 13:4, 5) Rirhandzu ri hi pfuna leswaku hi kota ku tiyiselelana ni van’wana ni ku tsundzuka leswaku hinkwerhu a hi hetisekanga naswona hi ni swihoxo. Ri hi pfuna leswaku hi anakanyela van’wana ni ku rivalelana. Muapostola Pawulo u hi khutaza leswaku hi famba “hi mianakanyo yo titsongahata hi ku helela ni hi ku rhula, hi ku va ni mbilu yo leha, [hi] lehiselana mbilu hi rirhandzu, [hi] tiyimisela hi mbilu hinkwayo ku hlayisa vun’we bya moya exibohweni lexi hlanganisaka xa ku rhula.”—Vaefesa 4:1-3.
11. Ha yini swi ri swa nkoka ngopfu leswaku Vakreste va lehiselana mbilu?
11 Vakreste hinkwavo emavandlheni, emakaya ya Bethele, emakaya ya varhumiwa, emintlaweni yo aka, kumbe eswikolweni swa timhaka ta moya, va kuma ku rhula ni ntsako loko va lehiselana mbilu. Leswi va nga ni vumunhu lebyi nga faniki, va nga rhandziki swilo leswi fanaka, va nga kurisiwangiki hi ndlela leyi fanaka, va nga ni mahanyelo lama hambaneke, naswona va nga tirhisiki tindlela to fana to sivela mavabyi, swi nga endleka va pfa va tlulana milenge. Ni le mindyangwini swi nga va tano. Ku hlwela ku hlundzuka i swa nkoka. (Swivuriso 14:29; 15:18; 19:11) Hinkwerhu hi fanele hi lehisa mbilu, hi ri ni ntshembo wa leswaku xiyimo xi ta antswa.—Varhoma 15:1-6.
Ku Lehisa Mbilu Swi Hi Pfuna Ku Tiyisela
12. Ha yini ku tiyisela ku ri ka nkoka loko munhu a langutane ni miringo?
12 Ku lehisa mbilu swi hi pfuna ku tiyisela swiyimo swo nonon’hwa leswi vonakaka swi nga heli kumbe leswi ntlhantlho wa swona wu vonakaka wu nga ta hatla wu kumeka. Sweswo swi ve tano hi Régis, loyi ku vulavuriweke ha yena eku sunguleni. Swi teke malembe nsati wa yena a ri karhi a lwisana ni matshalatshala yakwe ya ku tirhela Yehovha. Kambe siku rin’wana u te eka nuna wakwe a ri karhi a khavaxela mihloti, a ku: “Ndza swi tiva leswaku lowu i ntiyiso. Ndzi pfune. Na mina ndzi lava ku dyondza Bibele.” Eku heteleleni u ve Mbhoni leyi khuvuriweke. Régis u ri: “Lexi i xikombiso xa leswaku Yehovha u katekise matshalatshala, ku lehisa mbilu ni ku tiyisela loku ndzi veke na kona malembe yo tala.” Ku lehisa mbilu kakwe ku tswale mihandzu.
13. I yini lexi pfuneke Pawulo leswaku a tiyisela, naswona xikombiso xexo xi nga hi pfuna njhani leswaku na hina hi tiyisela?
13 Eka lembe-xidzana ro sungula C.E., muapostola Pawulo u veke xikombiso lexinene xa ku tiyisela. (2 Vakorinto 6:3-10; 1 Timotiya 1:16) Loko a ri kusuhi ni ku fa, Pawulo u nyike jaha Timotiya loyi a ri mutirhi-kulobye xitsundzuxo, a n’wi lemukisa leswaku Vakreste hinkwavo a va ta langutana ni miringo. Pawulo u vulavule hi xikombiso xakwe ni timfanelo letikulu leti Vakreste va faneleke va va na tona leswaku va tiyisela. U tsarile a ku: “Wena u landzelerisise dyondzo ya mina, ndlela ya mina ya vutomi, xikongomelo xa mina, ripfumelo ra mina, ku va ni mbilu yo leha ka mina, rirhandzu ra mina, ku tiyisela ka mina, ku xanisiwa ka mina, maxangu ya mina, muxaka wa swilo leswi swi ndzi endlekeleke eAntiyoka, eIkoniya, eListra, muxaka wa minxaniso leyi ndzi yi tiyiseleke; kambe Hosi yi ndzi kutsurile eka hinkwaswo. Entiyisweni, hinkwavo lava navelaka ku hanya hi ku tinyiketela loku nga ni vukwembu hi ku fambisana na Kreste Yesu na vona va ta xanisiwa.” (2 Timotiya 3:10-12; Mintirho 13:49-51; 14:19-22) Hinkwerhu hi fanele hi va ni ripfumelo, rirhandzu ni ku lehisa mbilu, leswaku hi kota ku tiyisela.
Ku Va Ni Mbilu Yo Leha
14. Pawulo u ti fanise na yini timfanelo ta vukwembu to tanihi ku lehisa mbilu, naswona u nyike Vakreste va le Kolosa ndzayo yihi?
14 Muapostola Pawulo u teke ku lehisa mbilu ni timfanelo tin’wana ta vukwembu a swi fanisa ni swiambalo leswi Mukreste a faneleke a swi ambala endzhaku ko hluvula mikhuva ya “vumunhu bya khale.” (Vakolosa 3:5-10) U tsarile a ku: “Leswi mi nga vahlawuriwa va Xikwembu, vo kwetsima ni lava rhandziwaka, tiambexeni xinakulobye lexikulu xa tintswalo, musa, mianakanyo yo titsongahata, ku rhula, ni ku va ni mbilu yo leha. Hambetani mi lehiselana mbilu ni ku rivalelana hi ku ntshunxeka loko un’wana a ri ni xivangelo xa ku vilerisiwa hi un’wanyana. Tanihi leswi Yehovha a mi rivaleleke hi ku ntshunxeka, na n’wina endlani sweswo. Kambe, handle ka swilo leswi hinkwaswo, ambalani rirhandzu, hikuva i xiboho lexi hetisekeke xa vun’we.”—Vakolosa 3:12-14.
15. Ku va ni vuyelo byihi loko Vakreste va ‘tiambexa’ mfanelo ya ku lehiselana mbilu ni ku kombisa timfanelo tin’wana ta Xikwembu?
15 Loko swirho swa vandlha swi ‘tiambexa’ ntwela-vusiwana, musa, mianakanyo yo titsongahata, ku rhula, ku va ni mbilu yo leha ni rirhandzu, swa swi kota ku tlhantlha swiphiqo ni ku ya emahlweni swi tirhela Yehovha hi vun’we. Valanguteri lava nga Vakreste hi vona ngopfu-ngopfu va faneleke va lehisa mbilu. Minkarhi yin’wana va nga boheka ku tshinya Mukreste un’wana, kambe ku ni tindlela to hambana-hambana to tshinya. Pawulo u hlamusele ndlela leyinene loko a tsalela Timotiya a ku: “U tshinya, u holovela, u khongotela, hi mbilu yo leha leyi heleleke ni vutshila byo dyondzisa.” (2 Timotiya 4:2) Ina, tinyimpfu ta Yehovha ti fanele ti lehiseriwa mbilu, ti xiximiwa ni ku kombiwa rirhandzu minkarhi hinkwayo.—Matewu 7:12; 11:28; Mintirho 20:28, 29; Varhoma 12:10.
“Vanani Ni Mbilu Yo Leha Eka Hinkwavo”
16. Ku nga va ni vuyelo byihi loko hi “[va] ni mbilu yo leha eka hinkwavo”?
16 Leswi Yehovha a lehiselaka vanhu mbilu, na hina hi boheka ku “[va] ni mbilu yo leha eka hinkwavo.” (1 Vatesalonika 5:14) Leswi swi vula ku va ni mbilu yo leha eka swirho swa ndyangu leswi nga riki Timbhoni, eka vaakelani, vatirhi-kulorhi ni lava hi nghenaka na vona xikolo. Timbhoni ti kote ku timela vuntswaka bya vanhu lava ti hlanganaka na vona emintirhweni ya ku tihanyisa kumbe eswikolweni, hi ku tiyisela loko va endla xihlekiso ha tona kumbe loko va lwisana na tona, naswona minkarhi yin’wana sweswo swi teka malembe. (Vakolosa 4:5, 6) Muapostola Petro u tsale a ku: “Hlayisani ku tikhoma ka n’wina ku ri kunene exikarhi ka matiko, leswaku, eka leswi va mi lumbetaka ha swona onge hi loko mi ri vaendli va leswo biha, va dzunisa Xikwembu hi siku ra ku kambela ka xona hikwalaho ka mintirho leyinene ya n’wina leyi va nga timbhoni leti yi voneke hi mahlo.”—1 Petro 2:12.
17. Hi nga ti tekelela njhani timfanelo ta Yehovha ta rirhandzu ni ku lehisa mbilu, naswona ha yini hi fanele hi endla tano?
17 Vanhu va timiliyoni va ta ponisiwa hileswi Yehovha a va lehiselaka mbilu. (2 Petro 3:9, 15) Loko hi tekelela rirhandzu ni ku lehisa mbilu ka Yehovha, hi ta phikelela hi chumayela mahungu lamanene ya Mfumo wa Xikwembu ni ku dyondzisa van’wana leswaku va tiveka ehansi ka vulawuri bya Mfumo wa Kreste. (Matewu 28:18-20; Marka 13:10) Loko hi tshika ku chumayela, hi ta va hi anakanya leswaku Yehovha se u lehise mbilu ku tlula mpimo, naswona hi ta va hi kohleka xikongomelo xa ku lehisa ka yena mbilu, ku nga ku nyika vanhu nkarhi wa ku hundzuka.—Varhoma 2:4.
18. Pawulo u va kombelele yini Vakolosa exikhongelweni xakwe?
18 Eka papila leri a ri tsaleleke Vakreste va le Kolosa, le Asia Minor, Pawulo u te: “Hi yona mhaka leyi hina, ku sukela esikwini leri hi tweke ha rona, hi nga tshikangiki ku mi khongelela ni ku kombela leswaku mi tala vutivi lebyi kongomeke bya ku rhandza ka xona hi vutlhari hinkwabyo ni ku twisisa ka moya, leswaku mi famba hi mukhuva lowu fanelaka eka Yehovha leswaku mi n’wi tsakisa hi ku helela mi ri karhi mi veka mihandzu entirhweni wun’wana ni wun’wana lowunene ni ku kula eku tiveni ka Xikwembu hi ku kongoma, mi endliwa lava nga ni matimba hi matimba hinkwawo hi ku ya hi matimba yakwe lama vangamaka leswaku mi tiyisela hi ku helela ni ku va ni mbilu yo leha hi ntsako.”—Vakolosa 1:9-11.
19, 20. (a) Hi nga swi papalata njhani ku teka ku lehisa mbilu ka Yehovha tanihi ndzingo? (b) Hi byihi vuyelo lebyi hi nga ta byi kuma loko hi hambeta hi lehisa mbilu?
19 Ku va Yehovha a hambeta a lehisa mbilu a swi nge vi ndzingo eka hina loko hi “tala vutivi lebyi kongomeke bya ku rhandza ka [yena],” ka “leswaku vanhu va mixaka hinkwayo va ponisiwa naswona va fikelela vutivi lebyi kongomeke bya ntiyiso.” (1 Timotiya 2:4) Hi ta “[hambeta hi] veka mihandzu entirhweni wun’wana ni wun’wana lowunene,” ngopfu-ngopfu entirhweni wa ku chumayela “mahungu lamanene lawa ya mfumo.” (Matewu 24:14) Loko hi hambeta hi endla sweswo hi ku tshembeka, Yehovha u ta hi endla “lava nga ni matimba hi matimba hinkwawo,” leswaku hi “tiyisela hi ku helela ni ku va ni mbilu yo leha hi ntsako.” Loko hi endla tano, hi ta “famba hi mukhuva lowu fanelaka eka Yehovha,” naswona hi ta va ni ku rhula loku tisiwaka hi ku tiva leswaku hi “n’wi tsakisa hi ku helela.”
20 Onge hi nga khorwiseka hi ku helela leswaku ku lehisa mbilu ka Yehovha swi kombisa vutlhari byakwe. Swi hi pfulela ndlela ya ku ponisiwa ni ku ponisiwa ka lava va yingisaka loko hi va chumayela ni ku va dyondzisa. (1 Timotiya 4:16) Loko hi hlakulela mihandzu ya moya, ku nga rirhandzu, musa, vunene, ku rhula ni ku tikhoma, hi ta kota ku lehisa mbilu hi tsakile. Swi ta hi olovela ku hanyisana hi ku rhula ni swirho swa ndyangu wa hina kun’we ni vamakwerhu evandlheni. Ku lehisa mbilu ku ta tlhela ku hi pfuna leswaku hi tiyiselela vatirhi-kulorhi ni lava hi nghenaka na vona xikolo. Naswona ku lehisa ka hina mbilu ku ta va ni xikongomelo, ku nga ku ponisa vadyohi ni ku dzunisa Yehovha, Xikwembu lexi lehisaka mbilu.
[Nhlamuselo ya le hansi]
^ par. 10 Loko Gordon D. Fee, loyi a nga xidyondzi xa Bibele, a vulavula hi marito ya Pawulo lama nge “rirhandzu ri ni mbilu yo leha ni musa,” u tsarile: “Hi ku ya hi nhlamuselo ya Pawulo, marito lawa [mbilu yo leha ni musa] ma kombisa tindlela timbirhi leti Xikwembu xi langutaka vanhu ha tona (ringanisa Rhom. 2:4). Ku lehisa mbilu ka Xikwembu hi ndlela ya rirhandzu ku kombisiwa hi ku tikhoma ka xona loko vanhu va xandzuka; nakambe musa wa xona wu vonaka kahle eka swikombiso swo tala swa tintswalo ta xona. Xisweswo Pawulo u hlamusela rirhandzu a sungula hi timfanelo leti timbirhi ta Xikwembu, lexi ha Kreste xi tikombiseke xi tiyisela naswona xi ri ni musa eka lava faneriwaka hi ku avanyisiwa hi xona.”
Xana U Nga Hlamusela?
• Kreste i xikombiso lexinene xa ku lehisa mbilu hi tindlela tihi?
• I yini lexi nga ta hi pfuna leswaku hi hlakulela mfanelo ya ku lehisa mbilu?
• Ku lehisa mbilu ku yi pfuna njhani mindyangu, Vakreste ni vakulu?
• Ku lehisa mbilu ku ta vuyerisa hina swin’we ni van’wana hi ndlela yihi?
[Swivutiso Swa Dyondzo]
[Xifaniso eka tluka 15]
Hambiloko a ri ehansi ka ntshikilelo lowukulu, Yesu u va lehisele mbilu vadyondzisiwa va yena
[Xifaniso eka tluka 16]
Valanguteri lava nga Vakreste va khutaziwa ku va swikombiso leswinene swa ku lehisela vamakwavo mbilu
[Xifaniso eka tluka 17]
Loko hi tekelela timfanelo ta Yehovha ta rirhandzu ni ku lehisa mbilu, hi ta hambeta hi chumayela mahungu lamanene
[Xifaniso eka tluka 18]
Pawulo u khongelele leswaku Vakreste va “va ni mbilu yo leha hi ntsako”