Swivutiso Swa Vahlayi

Xana nyoka yi vulavurisane njhani na Evha entangeni wa Edeni leswaku a tlula nawu wa Xikwembu malunghana ni murhi wa ku tiva leswinene ni leswo biha?

Genesa 3:1 yi ri: “Nyoka a yi ri ni vuxiyaxiya ngopfu ku tlula swivandzana hinkwaswo swa nhova leswi Yehovha Xikwembu a swi endleke. Kutani yi ku eka wansati: ‘Xana hakunene i ntiyiso leswaku Xikwembu xi vule leswaku mi nga tshuki mi dya eka murhi wun’wana ni wun’wana wa ntanga?’” Ku ve ni swiringanyeto swo hambana-hambana malunghana ni ndlela leyi nyoka yi nga ha vaka yi vulavurisane na Evha ha yona. Van’wana va anakanya leswaku yi vulavule hi ku tirhisa miri. Hi xikombiso, mufundhisi wa Munghezi Joseph Benson u te: “Swi tikomba onge yi vulavule hi ku tirhisa swikombiso swo karhi. Kahle-kahle, van’wana va anakanya leswaku tinyoka a ti swi kota ku anakanya ni ku vulavula, . . . kambe sweswo a swi na vumbhoni.”

Hambiswiritano, xana nyoka a yi ta va yi swi kotise ku yini ku byela Evha hi ku tirhisa miri ntsena leswaku loko o dya mbhandzu lowu yirisiweke u ta fana na Xikwembu, a kota ku hlawula leswinene ni leswo biha? Ku tlula kwalaho, Evha na yena u vulavurisane na yona nyoka a hlamula swivutiso swa yona. (Genesa 3:2-5) Mhaka ya leswaku nyoka yi vulavule hi ku tirhisa miri ntsena yi ta endla hi gimeta hileswaku Evha u yi hlamule hi ririmi ra mavoko, kasi Bibele yi vula leswaku u vulavurile.

Loko a vulavula hi mhaka leyi, muapostola Pawulo u lemukise Vakreste-kulobye a ku: “Ndza chava leswaku hi ndlela yo karhi, hilaha nyoka yi kanganyiseke Evha hakona hi vukanganyisi bya yona, mianakanyo ya n’wina yi nga onhiwa.” Khombo leri Pawulo a a vulavula ha rona a ri vangiwa hi “vaapostola va mavunwa, vatirhi lava xisaka.” Nxungeto lowu a wu tisiwa hi ‘vaapostola volavo lava a va tiendla lavanene ngopfu’ a wu nga ri wa ririmi ra mavoko ntsena. A va vulavula ni marito yo kanganyisa van’wana.—2 Vakorinto 11:3-5, 13.

Hambileswi Evha a kanganyisiweke hi ku twa marito yo karhi le ntangeni wa Edeni, sweswo a swi vuli leswaku nyoka ya xiviri a yi ri ni tinsinga ta rito. Kahle-kahle a swi nga laveki leswaku yi va na tona. Loko ntsumi ya Xikwembu yi vulavula na Balama hi ku tirhisa mbhongolo ya ntswele, a swi nga bohi leswaku xifuwo xexo xi va ni kholokholo ro rharhangana leri fanaka ni ra munhu. (Tinhlayo 22:26-31) Swi le rivaleni leswaku loko ‘xifuwo lexi xo rhwala ndzhwalo lexi nga vulavuriki, xi vulavula hi rito ra munhu,’ sweswo a swi vangiwa hi xivumbiwa xin’wana xa moya.—2 Petro 2:16.

EBibeleni, xivumbiwa xa moya lexi a xi tirhisa nyoka leyi vulavuleke na Evha xi vuriwa “nyoka ya khale, leyi vuriwaka Diyavulosi na Sathana.” (Nhlavutelo 12:9) Marito lawa Evha a ma tweke ivi a angula a ma huma eka Sathana, loyi a “[tihundzulaka] ntsumi ya ku vonakala.”—2 Vakorinto 11:14.

[Xifaniso eka tluka 27]

“Mi ta fana ni Xikwembu, mi ta tiva leswinene ni leswo biha”