Yimani Mi Hetiseka Naswona Mi Va Ni Ku Khorwiseka Loku Tiyeke

Vuhundzuluxeri Bya Misava Leyintshwa Byi Tlangeriwa Hi Vanhu Va Timiliyoni eMisaveni Hinkwayo

KU HELE malembe ya 12, tin’hweti tinharhu ni masiku ya 11 ku ri karhi ku tirhiwa hi matimba. Hambiswiritano, hi March 13, 1960, xiyenge xo hetelela xa vuhundzuluxeri lebyintshwa bya Bibele xi hetiwile. Byi vitaniwe Vuhundzuluxeri Bya Misava Leyintshwa Bya Matsalwa Yo Kwetsima.

Endzhaku ka lembe, Timbhoni ta Yehovha ti kandziyise vuhundzuluxeri lebyi byi va vholumo yin’we. Ku kandziyisiwe miliyoni wa tikopi hi 1961. Namuntlha, nhlayo ya tikopi leti kandziyisiweke yi tlula gidi ra timiliyoni, leswi endleke leswaku Vuhundzuluxeri Bya Misava Leyintshwa byi va yin’wana ya Tibibele leti hangalasiweke ngopfu. Kambe, i yini lexi susumeteleke Timbhoni ku lunghiselela vuhundzuluxeri lebyi?

Ha Yini A Ku Laveka Vuhundzuluxeri Lebyintshwa Bya Bibele?

Leswaku ti twisisa ni ku tlhela ti twarisa rungula ra Matsalwa yo Kwetsima, Timbhoni ta Yehovha ti tirhise vuhundzuluxeri byo hambana-hambana bya Bibele bya Xinghezi hi malembe yo tala. Hambileswi vuhundzuluxeri lebyi byi nga ni swin’wana leswi pfunaka, hakanyingi byi soholotiwe hi mindhavuko ya vukhongeri ni tidyondzo ta Vujagana. (Matewu 15:6) Hikwalaho Timbhoni ta Yehovha ti xiye leswaku ku laveka vuhundzuluxeri bya Bibele lebyi swi hlamuselaka hi ku pakanisa leswi nga ematsalweni yo sungula lama huhuteriweke.

Goza ro sungula ro hetisisa xilaveko lexi ri tekiwe hi October 1946 loko Nathan H. Knorr, xirho xa Huvo leyi Fumaka ya Timbhoni ta Yehovha, a ringanyete leswaku ku humesiwa vuhundzuluxeri bya Bibele lebyintshwa. Hi December 2, 1947, Komiti ya Vuhundzuluxeri bya Bibele bya Misava Leyintshwa yi sungule ku lunghiselela vuhundzuluxeri lebyi nga ta namarhela matsalwa yo sungula, byi fambisana ni ndzavisiso lowa ha ku endliwaka hi swidyondzi swa matsalwa ya voko ya Bibele lama ha ku tshuburiwaka naswona byi tirhisa ririmi leri twisisiwaka hi ku olova hi vahlayi va namuntlha.

Loko ku humesiwe vholumo yo sungula ya Vuhundzuluxeri Bya Misava Leyintshwa Bya Matsalwa Ya Vukreste Ya Xigriki hi 1950, swi tikombile leswaku vahundzuluxeri va fikelele tipakani ta vona. Tindzimana ta Bibele leti a ti nga twisiseki ti sungule ku twisiseka kahle. Hi xikombiso, xiya ndzimana leyi nga twisisekiki ya Matewu 5:3: “Ku katekile swisiwana emoyeni.” (Bibele Ya Mahungu Lamanene) Vuhundzuluxeri lebyi byi swi veka hi ndlela leyi: “Va tsaka lava khathalaka hi xilaveko xa vona xa moya.” Xivutiso lexi vutisiweke hi vadyondzisiwa va Yesu lexi hundzuluxeriweke xi ku “Xana xikombiso xa ku vuya ka wena . . . xi ta va xihi ke?” (Bibele Ya Mahungu Lamanene), eka byona xi hundzuluxeriwe hi ndlela leyi: “Xi ta va xihi xikombiso xa vukona bya wena?” (Matewu 24:3) Naswona nhlamuselo ya muapostola Pawulo ya “xihundla xa vukhongeri” (Bibele Ya Mahungu Lamanene) yi hlayekisa xileswi, “xihundla xo kwetsima xa ku tinyiketela loku ku nga ni vukwembu.” (1 Timotiya 3:16) Swi le rivaleni leswaku Vuhundzuluxeri Bya Misava Leyintshwa byi endle leswaku vanhu va va ni ku twisisa lokuntshwa.

Swidyondzi swo hambana-hambana swi tsakisiwe hi sweswo. Hi xikombiso, Alexander Thomson,  xidyondzi xa Bibele xa le Britain, u vule leswaku Vuhundzuluxeri Bya Misava Leyintshwa bya pakanisa swinene loko byi hlamusela nkarhi wa sweswi wa Xigriki. Hi xikombiso: Vaefesa 5:25 yi hlayeka hi ndlela leyi, “Vavanuna, hambetani mi rhandza vasati va n’wina” ematshan’weni yo vula ntsena leswaku, “Vavanuna, rhandzani vasati va n’wina.” (Bibele Ya Mahungu Lamanene) Thomson u vule leswi landzelaka malunghana ni Vuhundzuluxeri Bya Misava Leyintshwa: “A ku na vuhundzuluxeri byin’wana lebyi wu vekaka kahle nkarhi lowu naswona hi ku phindha-phindha.”

Nchumu wun’wana lowu Vuhundzuluxeri Bya Misava Leyintshwa byi hlawulekeke ha wona i ku tirhisa ka byona vito ra Xikwembu, ku nga Yehovha, eMatsalweni ya Xiheveru ni ya Xigriki. Tanihi leswi vito ra Xiheveru ra Xikwembu ri humelelaka kwalomu ka minkarhi ya 7 000 exiphen’wini lexi vuriwaka Testamente ya Khale ntsena, swi le rivaleni leswaku Muvumbi wa hina u lava leswaku vagandzeri va yena va tirhisa vito ra yena naswona va n’wi tiva tanihi munhu. (Eksoda 34:6, 7) Vuhundzuluxeri Bya Misava Leyintshwa byi pfune vanhu va timiliyoni leswaku va ri tiva.

Vuhundzuluxeri Bya Misava Leyintshwa Byi Humesiwa Hi Tindzimi To Tala

Ku sukela loko byi ve kona hi Xinghezi, Timbhoni ta Yehovha emisaveni hinkwayo a ti navela ku va ni Vuhundzuluxeri Bya Misava Leyintshwa hi tindzimi ta tona—naswona a swi fanerile. Ematikweni man’wana, a swi tika ku kuma vuhundzuluxeri bya ndhawu ya kona hikuva vayimeri va Mavandla ya Bibele a va nga swi tsakeli ku vona Tibibele leti va ti kandziyiseke ti tleketleriwa hi Timbhoni ta Yehovha. Ku tlula kwalaho, Tibibele toleto hakanyingi ti tumbeta tidyondzo ta nkoka. Xikombiso xa sweswo i vuhundzuluxeri bya ririmi ra le dzongeni wa Yuropa lebyi soholotaka nhlamuselo ya nkoka ya vito ra Xikwembu, byi siva marito ya Yesu lama nge “Vito ra wena a ri kwetsimisiwe,” hi marito lama nge “Onge vanhu va nga ku dzunisa.”—Matewu 6:9.

Ana se hi 1961 vahundzuluxeri a va sungurile ku hundzuluxela matsalwa ya Xinghezi ya Vuhundzuluxeri Bya Misava Leyintshwa ma ya eka tindzimi tin’wana. Endzhaku ka malembe mambirhi, Vuhundzuluxeri Bya Misava Leyintshwa Bya Matsalwa Ya Vukreste Ya Xigriki a byi hetiwile hi tindzimi tin’wana ta tsevu. Hi nkarhi wolowo, Timbhoni tinharhu eka ta mune emisaveni hinkwayo a ti hlaya Bibele leyi hi ririmi ra tona. Kambe, a ka ha fanele ku endliwa ntirho wo tala leswaku Timbhoni ta Yehovha ti endla leswaku vanhu va timiliyoni to tala va kuma Bibele leyi.

Hi 1989 pakani yoleyo a yi ri kusuhi ni ku fikeleriwa loko ku simekiwa Ndzawulo ya Mintirho ya Vuhundzuluxeri eyindlu-nkulu ya misava hinkwayo ya Timbhoni ta Yehovha. Ndzawulo yoleyo yi simeke endlelo ra vuhundzuluxeri leri endleke leswaku swi koteka ku kambisisa marito ya Bibele eka khompyuta. Ku tirhisa endlelo rero swi endle leswaku swi koteka ku hundzuluxela Matsalwa ya Vukreste ya Xigriki hi tindzimi tin’wana hi nkarhi lowu endlaka lembe, kutani Matsalwa ya Xiheveru ma hundzuluxeriwa hi malembe mambirhi—ku nga nkarhi wutsongo loko wu ringanisiwa ni lowu hakanyingi ku lavekaka wona entirhweni wo hundzuluxela Bibele. Ku sukela loko ku simekiwe endlelo leri, minkandziyiso ya 29 ya Vuhundzuluxeri Bya Misava Leyintshwa yi hundzuluxeriwe yi suka eka Xinghezi kutani yi humesiwa hi tindzimi leti vulavuriwaka hi vanhu lava tlulaka magidi mambirhi ya timiliyoni. Sweswi yi hundzuluxeriwa hi tindzimi tin’wana ta 12. Namuntlha Vuhundzuluxeri Bya Misava Leyintshwa bya Xinghezi byi hundzuluxeriwe hi tindzimi tin’wana ta 41, byi ri nkandziyiso lowu heleleke kumbe xiphemu xa wona.

Se ku hundze malembe yo tlula 50 hi mpfhuka ku humesiwe xiyenge xo sungula xa Vuhundzuluxeri Bya Misava Leyintshwa hi August 3, 1950, eNhlengeletanweni ya Timbhoni ta Yehovha ya Ku Andza Ka Timhaka Ta Mfumo, leyi khomeriweke eDorobeni ra New York. Eka nhlengeletano yoleyo, Nathan H. Knorr u khutaze vayingiseri a ku: “Tekani vuhundzuluxeri lebyi. Byi hlayeni hi ntsako. Byi kambisiseni, hikuva byi ta antswisa  matwisiselo ya n’wina ya Rito ra Xikwembu. Byi fambiseleni vanhu van’wana.” Hi mi khutaza leswaku mi hlaya Bibele siku na siku, hikuva rungula ra yona ri nga mi pfuna leswaku “mi yima mi hetiseka naswona mi va ni ku khorwiseka loku tiyeke hi ku rhandza ka Xikwembu hinkwako.”—Vakolosa 4:12.

[Girafu/Swifaniso eka tluka 8, 9]

(Leswaku u swi vona kahle, pfula nkandziyiso hi woxe)

“Ku Humesiwa Ka Vuhundzuluxeri Bya Misava Leyintshwa”

Vuhundzuluxeri Bya Misava Leyintshwa, lebyi humesiweke ku sungula hi Xinghezi, sweswi byi kumeka hi tindzimi tin’wana ta 41 byi ri nkandziyiso lowu heleleke kumbe xiphemu xa wona

Matsalwa ya Vukreste ya Xigriki Bibele leyi

heleleke

1950 1

1960-69 6 5

1970-79 4 2

1980-89 2 2

1990-Ku fikela sweswi 29 19