Swivutiso Swa Vahlayi

Xana xileriso xa Xikwembu lexi kumekaka eka Yeremiya 7:16 xi vula leswaku a swi fanelanga leswaku Vakreste va khongelela munhu loyi a susiweke evandlheni ra Vukreste hileswi a nga mudyohi la nga hundzukiki?

Endzhaku ko tivisa vuavanyisi byakwe ehenhla ka Vayuda lava nga tshembekangiki, Yehovha u byele Yeremiya a ku: “Loko ku ri wena, u nga va khongeleli vanhu lava, u nga tshuki u va vulela rito ra xirilo kumbe xikhongelo kumbe u kombela eka mina, hikuva a ndzi nge ku yingisi.”—Yeremiya 7:16.

Ha yini Yehovha a lerise Yeremiya leswaku a nga tshuki a khongelela Vaisrayele? Xivangelo hileswi a va tshamela ku tlula Nawu wa yena. Ni ku va nyumisa a swi nga va nyumisi ‘ku yiva, ku dlaya hi vomu, ku endla vuoswi, ku hlambanya hi vunwa, ku mbulukisa xitlhavelo eka Bali ni ku landzelela swikwembu swimbe.’ Hikwalaho, Yehovha u byele Vayuda lava vo pfumala ripfumelo a ku: “Ndzi ta mi cukumeta mi suka emahlweni ka xikandza xa mina, hilaha ndzi va cukumeteke hakona vamakwenu hinkwavo, vana hinkwavo va Efrayimi.” Kunene, a swi ta va swi nga fanelanga leswaku Yeremiya kumbe un’wana a khongela Yehovha leswaku a sula vuavanyisi bya Yena.—Yeremiya 7:9, 15.

Ku pfumelelana ni leswi, muapostola Yohane u tsale hi xikhongelo lexi faneleke eka Xikwembu. Xo sungula u tiyisekise Vakreste a ku: “Ku nga khathariseki leswaku i yini lexi hi xi kombelaka hi ku ya hi ku rhandza ka xona, xa hi twa.” (1 Yohane 5:14) Kutani malunghana ni ku khongelela van’wana, Yohane u ye emahlweni a ku: “Loko mani na mani a vona makwavo a endla xidyoho lexi nga vangiki rifu, u ta n’wi kombelela, naswona xi ta n’wi nyika vutomi, ina, xi ta nyika lava nga dyohiki hi ku dyoha loku vangaka rifu. Xi kona xidyoho lexi vangaka rifu. A ndzi n’wi byeli swona leswaku a endla xikombelo malunghana ni xidyoho xexo.” (1 Yohane 5:16) Nakambe Yesu u vulavule hi xidyoho lexi munhu ‘a nga ta ka a nga rivaleriwi  xona,’ ku nga ku dyohela moya lowo kwetsima.—Matewu 12:31, 32.

Xana sweswo swi vula leswaku hinkwavo lava susiweke evandlheni ra Vukreste hileswi va nga hundzukangiki eswidyohweni swa vona va endle swidyoho leswi “vangaka rifu,” xisweswo a va fanelanga va khongeleriwa? A swi tano, hikuva minkarhi yin’wana swidyoho swo tano a hi leswi vangaka rifu. Kahle-kahle swa tika ku tiva leswaku hi swihi leswi vangaka rifu. Xiya xikombiso xa Hosi Manase loyi a a fuma eYuda. U akele swikwembu swa mavunwa tialitari, a nyikela vana vakwe va xinuna va va magandzelo, a tirhisa vungoma a tlhela a veka xifaniso lexi vatliweke etempeleni ya Yehovha. Kahle-kahle Bibele yi vula leswaku Manase ni vanhu a va “endla swo biha ku tlula matiko lawa Yehovha a ma loviseke emahlweni ka vana va Israyele.” Hikwalaho ka sweswo, Yehovha u xupule Manase hi ku n’wi tshika a yisiwa evuhlongeni eBabilona a bohiwe hi tinketana.—2 Tihosi 21:1-9; 2 Tikronika 33:1-11.

Xana swidyoho swa Manase a swi bihe ngopfu lerova a swi wela eka leswi swi vangaka rifu? A swi tano, hikuva xiviko xi ya emahlweni xi ku: “Hi ku hatlisa loko swi n’wi vangela ku karhateka, a tsakisa Yehovha Xikwembu xakwe, a hambeta a titsongahata ngopfu eka Xikwembu xa vatata wakwe. A hambeta a N’wi khongela, lerova Yena a pfumela leswaku a n’wi kombela, kutani Yena a twa xikombelo xakwe xa tintswalo, a n’wi vuyisela eYerusalema evuhosini byakwe; Manase a tiva leswaku Yehovha i Xikwembu xa ntiyiso.”—2 Tikronika 33:12, 13.

Kutani a hi fanelanga hi tibyela leswaku munhu wo karhi u endle xidyoho lexi vangaka rifu hileswi a susiweke evandlheni. Xiyimo xa ntiyiso xa mbilu ya munhu xi nga ha tikomba endzhaku ka nkarhi. Entiyisweni, mhaka leyi vuriwaka hi ku phindha-phindha hileswaku xin’wana xa swikongomelo swa ku susa mudyohi evandlheni i ku n’wi pfuna ku tianakanya, hi ntshembo wa leswaku u ta hundzuka a tshika ndlela yakwe.

Leswi munhu wa kona a nga ha riki xirho xa vandlha, ku cinca ka mbilu ni langutelo rakwe swi nga ha xiyiwa ku sungula hi lava va nga kusuhi na yena, tanihi munghana wa vukati kumbe swirho swa ndyangu. Lava va xiyaka ku hundzuka ko tano va nga ha tibyela leswaku mudyohi a nga endlanga xidyoho lexi vangaka rifu. Sweswo swi nga va susumetela ku khongelela mudyohi leswaku a tiyisiwa hi Rito ra Xikwembu leri huhuteriweke ni leswaku Yehovha a endla ku rhandza ka Yena hi mudyohi wa kona.—Pisalema 44:21; Eklesiasta 12:14.

Hambileswi van’wana va nga hatlaka va vona vumbhoni lebyi eneleke bya ku pfumela leswaku mudyohi wa kona u hundzukile, swi nga endleka vandlha rona ri nga voni nchumu. Vandlha ri nga pfilunganyeka, ri karhateka hambi ku ri ku khunguvanyeka loko ri twa un’wana a khongelela mudyohi wo tano erivaleni. Hikwalaho, lava va nga ni xivangelo xa ku khongelela mudyohi va fanele va n’wi khongelela va ri voxe, leswin’wana hinkwaswo va swi tshikela vakulu lava nga ni vutihlamuleri evandlheni.

[Xifaniso eka tluka 31]

Manase u rivaleriwe swidyoho swakwe leswikulu loko a titsongahate eka Yehovha

[Mfungho wa Vini va Xifaniso eka tluka 30]

Reproduced from Illustrierte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s