Xiviko Xa Vahuweleri Va Mfumo

“U Fanele U Lahlekile”

LE Johannesburg, eAfrika Dzonga, Leslie na Caroline a va ri karhi va cincisana hi ku nyikela vumbhoni hi riqingho eka vanhu lava tshamaka endhawini ya vadyuhari leyi a ku nga ngheni mani na mani. Va kume vanhu va nga ri vangani ekaya lava a va nga ri tsakeli rungula ra Vukreste, kutani Caroline u tiye nhlana loko wansati un’wana a hlamula riqingho.

Caroline u vutisile a ku: “Xana ndzi vulavula na Manana B—?”

Wansati wa kona u hlamule hi rito ra xinghana a ku: “E-e, u vulavula na Manana G—. U fanele u lahlekile.”

Hi ku twa wansati loyi a vulavula kahle, Caroline u te: “Ndza ku twa, kambe ndzi rhandza ku ku hlamusela leswi a ndzi lava ku swi byela Manana B—.” Hiloko a ya emahlweni a vulavula hi mikateko leyi nga ta tisiwa hi Mfumo wa Xikwembu lowu taka. Loko va twananile leswaku Manana G— u ta yiseriwa broxara leyi nge I Yini Leswi Xikwembu Xi Swi Languteleke Eka Hina?, yena u vutisile a ku: “Hi nga si ya ekule, xana u nghena kereke yihi?”

Caroline u hlamule a ku: “Ndzi Mbhoni ya Yehovha.”

“Wo namba u phula byi hola hi kereke yoleyo! U nga kali u tikarhata hi ku ndzi endzela.”

Hiloko Caroline a ku: “Kahleni Manana G—, anakanya leswaku ndza ha ku heta timinete ta 20 ndzi ri karhi ndzi ku byela hi vumundzuku lebyi tsakisaka, ndzi ku hlayela eBibeleni leswi Mfumo wa Xikwembu wu nga ta swi endlela vanhu ku nga ri khale. Swi ku tsakise ngopfu ku twa swilo sweswo, lerova a wu tsakela ku dyondza leswi engetelekeke. U lo twa yini hi Timbhoni ta Yehovha? Loko a wu vabya, xana a wu ta ya eka mulunghisi wa timovha? Swi nga va njhani leswaku u ndzi nyika nkarhi ndzi ta ku hlamusela leswi Timbhoni ta Yehovha ti pfumelaka swona?”

Endzhaku ko miyelanyana u te: “Kumbexana u tiyisile. Swa antswa u ta. Kambe ndzi twe kahle, u nge pfuki u ndzi hundzurile!”

Caroline u te: “Manana G— a ndzi nga ta swi kota ku ku hundzula hambiloko a ndzo swi lava. I Yehovha ntsena la nga ku hundzulaka.”

Riendzo ro yisela Manana G— (Betty) broxara ri fambe kahle naswona u pfumerile ku tlhela a endzeriwa. Loko Caroline a vuya, Betty u vule leswaku u byele vavasati van’wana eswakudyeni leswaku se a a sungule ku endzeriwa hi Timbhoni ta Yehovha. Va angule hi ku nyangatseka va ku: “U ri yini? Phela vanhu volavo ni ku pfumela a va pfumeli eka Yesu!”

Hiloko Caroline a tsundzuxa Betty yinhla-nkulu leyi va vulavuleke ha yona eka bulo ra nkarhi lowu hundzeke ra Mfumo wa Xikwembu.

Caroline u vutisile a ku: “Hosi ya kona ku ta va mani?”

Betty u te: “Ku ta va Yesu.”

Caroline u te: “U be kona.” Kutani u ye emahlweni a hlamusela leswaku Timbhoni ta Yehovha ti pfumela leswaku Yesu i N’wana wa Xikwembu, kambe a nga ringani na Xikwembu, hilaha dyondzo ya Vunharhu-un’we yi vulaka hakona.—Marka 13:32; Luka 22:42; Yohane 14:28.

Endzhaku ka maendzo ma nga ri mangani, swi sungule ku tikomba leswaku Betty a a nga tiphini kahle emirini, hambileswi a a ri ni langutelo lerinene ni ku tshama a tsakile. Entiyisweni a a ri na vuvabyi bya khensa naswona a a chava ku fa. U te: “A swi ta antswa loko a ndzi ti twe khale timhaka leti kutani ndzi va un’wana wa n’wina.” Caroline u n’wi chavelele hi ku n’wi hlayela matsalwa lama kombisaka leswaku rifu i vurhongo lebyikulu lebyi munhu a nga xalamukaka eka byona loko ku pfuxiwa lava feke. (Yohane 11:11, 25) Sweswo swi tiyise Betty swinene, loyi sweswi a fambiseriwaka dyondzo ya Bibele nkarhi na nkarhi. Ntsena vuvabyi bya yena bya n’wi sivela ku va kona eminhlanganweni ya le Holweni ya Mfumo.

Caroline u ri: “Ndzi swi vona kahle leswaku ntirho lowu wu kongomisiwa hi tintsumi. Betty u ‘kume riqingho leri lahlekeleke eka yena,’ naswona anakanya, u ni malembe ya 89 hi vukhale!”—Nhlavutelo 14:6.