Moya Wa Ku Tirhandzela Wu Susumetela Vanhu Ku Ya eGilead

EXIKOLWENI xa Bibele xa Gilead xa Watchtower ku leteriwa vavanuna ni vavasati lava tinyiketeleke leswaku va ya endla ntirho wa vurhumiwa ematikweni mambe. I vamani lava fanelekaka ku ya eGilead? Hi lava va nga ni moya wa ku tirha hi ku tinyiketela. (Pisalema 110:3) Sweswo swi voniwe kahle hi September 8, 2001, loko ku thwasa ntlawa wa vu-111.

Swichudeni swin’wana swa ntlawa wolowo hi ku tirhandzela ana se a swi siye mindyangu ya swona, vanghana ni matiko ya swona leswaku swi ya tirha laha ku nga ni xilaveko lexikulu. Hi ku endla tano, swi ringete ku vona loko swi ta swi kota ku endla mindzulamiso yo karhi loko swi ya tshama endhawini yin’wana. Hi xikombiso, Richer na Nathalie va lulamise swiyimo swa vona kutani va rhurhela eBolivia, Todd na Michelle va rhurhele eRiphabliki ra Dominika kasi David na Monique va rhurhele etikweni rin’wana ra le Asiya leswaku va ya twarisa mahungu lamanene ya Mfumo wa Xikwembu. Swichudeni swin’wana a swi tshame swi tirhela eNicaragua, Ecuador na Albania.

Christy u khutaziwe ku dyondza Xipaniya loko a ri exikolweni xa le henhla, leswi n’wi pfuneke leswaku a heta malembe mambirhi le Ecuador loko a nga si tekiwa. Van’wana va hlanganyele ni mavandlha lama vulavulaka tindzimi timbe ematikweni ya ka vona. Loko Saul na Priscilla va langutane ni ntlhontlho lowu hambaneke, va kombise moya wa ku tirhandzela hi ku kulula va n’watseka leswaku va antswisa Xinghezi xa vona loko va nga si ya exikolweni lexi.

Mavhiki ya 20 ya ku leteriwa ku va murhumiwa ma hele hi ku hatlisa. Siku ra ku thwasa ri fikile, kutani swichudeni swi yingisela ndzayo ya vutlhari ni marito yo lelana lama khutazaka, swi ri ni vanghana ni mindyangu ya swona.

Mutshama-xitulu wa nongonoko a ku ri Theodore Jaracz, la thwaseke eka ntlawa wa vunkombo wa le Xikolweni xa Gilead, loyi sweswi a nga xirho xa Huvo leyi Fumaka ya Timbhoni ta Yehovha. Marito ya yena yo pfula ma kandziyise mhaka ya leswaku tanihi nhlengeletano, a hi xi rivali xikongomelo xa ku leteriwa ka swichudeni swa le Gilead, ku nga ku chumayela mahungu lamanene ya Mfumo emisaveni hinkwayo leyi akiweke. (Marka 13:10) Le Gilead ku leteriwa swichudeni leswi fanelekaka leswi nga ta endla ntirho wo chumayela hi mpimo lowukulu swinene etindhawini leti nga ni xilaveko lexikulu xa varhumiwa lava leteriweke. Makwerhu Jaracz u tsundzuxe swichudeni leswaku swi wu tirhisa swinene ndzetelo wa swona wa le Gilead tanihi leswi sweswi swi nga ta tirha swin’we ni varhumiwa lava nga ematikweni ya 19 lawa mathwasana lawa ma rhumeriweke eka wona.

Xitsundzuxo Lexi Faneleke Xa Lava Thwasaka

Ku landzele nxaxamelo wa tinkulumo. William Van De Wall, la nga xirho xa Komiti ya Rhavi ra le United States, u vulavule hi nhloko-mhaka leyi nge “Ku Hiseka Ka Varhumiwa—Mfungho Wa Vakreste Va Ntiyiso.” U kokele nyingiso eka ntirho wa ku ‘endla vadyondzisiwa,’ lowu tsariweke eka Matewu 28:19, 20, kutani a khutaza swichudeni a ku: “Tekelelani Yesu, loyi a endleke xiavelo xa yena xa vurhumiwa hi ku hiseka.” Leswaku a pfuna vanhu lava a va ta va varhumiwa leswaku va tshama va hiseka entirhweni wa vurhumiwa, u va khutazile a ku:  “Namarhelani xiyimiso lexinene; vanani ni mikhuva leyinene ya dyondzo ya munhu hi xiyexe, mi tshama mi tiva timhaka ta swa le tilweni; naswona minkarhi hinkwayo tshamani mi ri karhi mi anakanya hi xikongomelo xa swiavelo swa n’wina.”

Ku landzele Guy Pierce, la nga xirho xa Huvo leyi Fumaka. U vulavule hi nhloko-mhaka leyi nge “Hambetani Mi Hlakulela ‘Matimba Ya N’wina Ya Ku Anakanya.’” (Varhoma 12:1) U nyike ntlawa lowu thwasaka xitsundzuxo lexi tirhaka, a wu khutaza ku tirhisa vuswikoti bya ku anakanya lebyi humaka eka Xikwembu. U te: “Hambetani mi anakanyisisa hi leswi Yehovha a mi byelaka swona hi ku tirhisa Rito ra yena. Sweswo swi ta mi sirhelela.” (Swivuriso 2:11) Makwerhu Pierce u tlhele a tsundzuxa ntlawa lowu leswaku wu nga sihalali ni mavonelo ya wona leswaku wu nga siveli ‘matimba ya wona ya ku anakanya.’ Switsundzuxo leswi swi faneleke swi ta ma pfuna swinene mathwasana loko se ma ri varhumiwa.

Endzhaku mutshama-xitulu u vitane un’wana wa valeteri va le Gilead, ku nga Lawrence Bowen, loyi nhloko-mhaka ya yena a yi ku, “Ti Endleni Lava Nga Tiviki Nchumu.” U vule leswaku malunghana ni ntirho wa yena wa vurhumiwa le Korinto, muapostola Pawulo u “tiendle loyi a nga tiviki nchumu loko a nga ri Yesu Kreste ni ku beleriwa ka yena.” (1 Vakorinto 2:2) Pawulo a a swi tiva leswaku matimba lamakulu evuakweni, ku nga  moya lowo kwetsima, hi wona ma seketelaka rungula leri nga eBibeleni hinkwayo: ku lweriwa ka vuhosi bya Yehovha hi Mbewu leyi tshembisiweke. (Genesa 3:15) Swichudeni swa 48 leswi a swi thwasa swi khutaziwe leswaku swi fana na Pawulo na Timotiya, swi va varhumiwa lava humelelaka, swi namarhela “ntila wa marito lama nga ni rihanyo.”—2 Timotiya 1:13.

Nhloko-mhaka yo hetelela eka tinkulumo to pfula a yi ku, “Tlangela Lunghelo Ra Wena, Nyiko Leyi Humaka Eka Xikwembu.” Wallace Liverance, mutsarisi wa le Xikolweni xa le Gilead, u pfune mathwasana ku twisisa leswaku malunghelo ya ntirho i xikombiso xa musa lowukulu ngopfu wa Xikwembu, a hi nchumu lowu a wu va fanela kumbe lowu va tikumeleke wona. Loko Makwerhu Liverance a vulavula hi xikombiso xa muapostola Pawulo u te: “Lexi endleke leswaku Yehovha a hlawula Pawulo leswaku a va muapostola wa yena eka vamatiko a ku nga ri hikwalaho ka mintirho yakwe, hikuva sweswo a swi ta vula leswaku Pawulo u ni mfanelo ya ku kuma lunghelo rero. A ri nga kumiwi hikwalaho ko va u tirhe malembe yo tala kumbe u ri ni ntokoto lowukulu. Hi ku ya hi langutelo ra munhu, swi nga ha tikomba onge a ri ta fanela Barnaba. Kambe a ri nga kumiwi hi ku ya hi vuswikoti bya munhu; handle ko kanakana Apolosi a a ri ni vuswikoti lebyikulu bya ku vulavula ku tlula Pawulo. A ku ri xikombiso xa musa lowu nga faneriwiki wa Xikwembu.” (Vaefesa 3:7, 8) Makwerhu Liverance u khutaze mathwasana leswaku ma tirhisa nyiko ya wona, kumbe lunghelo ra wona, leswaku ma pfuna van’wana va va vanghana va Xikwembu naswona va kuma “nyiko leyi nyikiwaka hi Xikwembu [ya] vutomi lebyi nga heriki ha Kreste Yesu Hosi ya hina.”—Varhoma 6:23.

Ku landzele Mark Noumair, muleteri un’wana wa le Gilead loyi a veke ni bulo leri tsakisaka ni swichudeni swo hlayanyana hi nhloko-mhaka leyi nge, “Ku Lunghiselela Ku Tisa Vuyelo Lebyinene.” (Swivuriso 21:5) Mintokoto leyi yi kombise leswaku loko mutirheli a byi lunghiselela kahle vutirheli byakwe, ngopfu-ngopfu a lunghiselela mbilu ya yena, u ta va tsakela swinene vanhu. A nge kayiveli marito yo ma vula. Ku ri na sweswo, u ta vula swilo a tlhela a swi endla hi ndlela leyi nga ta va pfuna hi tlhelo ra moya. Makwerhu Noumair u vulavule hi ntokoto wa yena loko a ha ri murhumiwa eAfrika a vula leswaku “lexi i xilotlelo xa ku va murhumiwa la humelelaka.”

Ntirho Wa Vurhumiwa —I Ntirho Lowu Enerisaka

Ralph Walls na Charles Woody va burisane ni varhumiwa van’wana lava nga ni ntokoto, lava na vona a va ri eNtsindza wa Dyondzo le Patterson leswaku va ta kuma vuleteri byo hlawuleka. Eka mimbulavurisano leyi ku kandziyisiwe leswaku ku rhandza vanhu hi swona swi tisaka ntsako entirhweni wa vurhumiwa. Swichudeni ni maxaka ya vona ni vanghana lava a va ri kona va khutazekile loko va twa varhumiwa lava nga ni ntokoto va hlamusela hi voxe xivangelo xa ku va ntirho wa vurhumiwa wu ri ntirho lowu enerisaka.

John E. Barr, loyi a nga xirho xa Huvo leyi Fumaka, u nyikele nkulumo-nkulu ya siku, leyi a yi ri ni nhloko-mhaka leyi nge, “Yimbelelelani Yehovha Risimu Lerintshwa.” (Esaya 42:10) Makwerhu Barr u kombise leswaku marito lama nge “risimu lerintshwa” ma humelela ka kaye eBibeleni. U vutisile a ku, “Risimu leri lerintshwa ri vulavula hi yini?” Hiloko a hlamula a ku: “Mongo wu paluxa leswaku risimu lerintshwa ri yimbeleriwa hikwalaho ka swiendlakalo leswintshwa leswi vaka kona hi nkarhi wa vuhosi bya Yehovha.” U khutaze swichudeni leswaku swi hambeta swi hlanganyela eku yimbeleleni ka tinsimu ta ku hoyozela Mfumo wa Xikwembu lowu hlulaka, lowu nga ehansi ka Kreste Yesu, Hosi ya Vumesiya. Makwerhu Barr u vule leswaku dyondzo leyi va yi kumeke eGilead yi va pfune ku ti twisisa swinene timhaka to hambana-hambana ta “risimu lerintshwa.” “Xikolo lexi xi kandziyise leswaku mi fanele mi hlanganyela ni vamakwenu mi ‘yimbelela’ tinsimu to dzunisa Yehovha kwihi ni kwihi laha mi nga ta ya kona; minkarhi hinkwayo mi lwela ku va ni vun’we ni van’wana eswiavelweni swa n’wina.”

Loko swichudeni swi nyikiwe tidiploma ta swona, muyimeri wa swona u hlaye papila ra ku nkhensa loku humaka embilwini ka dyondzo leyi swi yi kumeke eGilead.

Xana u nga antswisa ntirho lowu u wu endlelaka Xikwembu leswaku wu va lowu tswalaka mihandzu swinene? Loko swi ri tano, tikarhate ku fana ni swichudeni leswi swi thwaseke. Sweswo hi swona swi va pfuneke leswaku va fanelekela ntirho wa vurhumiwa. Munhu u kuma ntsako lowukulu loko a tinyiketela hi mbilu hinkwayo entirhweni wa Xikwembu.—Esaya 6:8.

[Bokisi eka tluka 25]

TINHLAYO TA NTLAWA

Nhlayo ya matiko lama yimeriweke: 10

Nhlayo ya matiko lawa va averiweke eka wona: 19

Nhlayo ya swichudeni: 48

Xiringaniso xa malembe: 33,2

Xiringaniso xa malembe entiyisweni: 16,8

Xiringaniso xa malembe evutirhelini bya nkarhi hinkwawo: 12,6

[Xifaniso eka tluka 26]

Ntlawa Wa Vu-111 Lowu Thwasaka Wa Xikolo Xa Bibele Xa Gilead Xa Watchtower

Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.

(1) Yeomans, C.; Toukkari, A.; Nuñez, S.; Phillips, J.; Dawkin, M.; Silvestri, P. (2) Morin, N.; Biney, J.; López, M.; Van Hout, M.; Cantú, A.; Szilvassy, F. (3) Williams, M.; Itoh, M.; Van Coillie, S.; Levering, D.; Fuzel, F.; Geissler, S. (4) Yeomans, J.; Moss, M.; Hodgins, M.; Dudding, S.; Briseño, J.; Phillips, M. (5) López, J.; Itoh, T.; Sommerud, S.; Kozza, C.; Fuzel, G.; Moss, D. (6) Williams, D.; Dudding, R.; Geissler, M.; Morin, R.; Biney, S.; Cantú, L. (7) Dawkin, M.; Hodgins, T.; Levering, M.; Silvestri, S.; Van Hout, D.; Briseño, A. (8) Van Coillie, M.; Nuñez, A.; Kozza, B.; Sommerud, J.; Toukkari, S.; Szilvassy, P.