“Murhi Wo Tota Mahlo Ya Wena”

XILERISO xexo xi vuriwe hi Yesu Kreste a xi byela vandlha ra Vukreste ra Lawodikiya le Asia Minor hi lembe-xidzana ro sungula.

Yesu u te: “Xava . . . murhi wo tota mahlo ya wena leswaku u ta vona.” A ku nga ri vuvabyi bya xiviri bya mahlo kambe a ku ri vubofu bya moya lebyi a byi fanele ku tshunguriwa. Vakreste va le Lawodikiya se a va ngheniwe hi moya wa muti lowu a va tshama eka wona wa ku rhandza swilo leswi vonakaka naswona a va honisa swilaveko swa vona swa xiviri swa moya.

Loko Yesu a vulavula hi mhaka leyi tanihi leyi va vangelaka leswaku va nga voni kahle, u te: “Leswi u nge: ‘Ndzi fuwile, ndzi kume rifuwo naswona a ndza ha lavi nchumu nikatsongo,’ kasi a wu tivi leswaku u dyisa mbitsi ni ku twisa vusiwana ni leswaku u xisiwana, u fe mahlo naswona u swerile.” Hambileswi a swi nga swi xiyi, swirho swa vandlha a swi fanele swi kuma “murhi wo tota mahlo” hi ku amukela dyondzo ni ndzayo ya Yesu Kreste. Yesu u te: ‘Xava eka mina.’—Nhlavutelo 3:17, 18.

Ku fana ni vanhu va le Lawodikiya, namuntlha Vakreste va xiviri va fanele va tivonela leswaku va nga kuceteriwi va nga swi xiyi hi moya wa laha va tshamaka kona wa ku rhandza swilo leswi vonakaka ni wa ku rhandza ntsako. Xileriso xa ku tshama va hanye kahle hi tlhelo ra moya xi vonaka kahle eka ndzayo leyi nge: “Xava [eka Yesu] . . . murhi wo tota mahlo ya wena leswaku u ta vona.”

Mhaka ya nkoka hileswaku “murhi [lowu] wo tota mahlo” a wu fanele wu xaviwa. Wu xaviwa hi mali. Ku laveka nkarhi wo dyondza ni ku anakanyisisa hi Rito ra Xikwembu. Mupisalema wa hi tiyisekisa leswaku Rito leri ‘ri basile, ri hatimisa mahlo ya moya.’—Pisalema 19:8.