Swivutiso Swa Vahlayi

Xana wansati la nga Mukreste a nga swi kotisa ku yini ku tshama a tshembekile eka Xikwembu hi hala tlhelo a titsongahata eka nuna wa yena la nga riki mupfumeri, loko wanuna wa kona a hlanganyela eka tiholideyi ta vukhongeri?

Sweswo swi ta lava vutlhari ni vuxiyaxiya. Kambe u ta va a endla kahle loko a ringeta ku hetisisa vutihlamuleri bya yena ha byimbirhi hi ndlela leyi faneleke. Yesu u tshame a nyikela xitsundzuxo malunghana ni xiyimo lexi lavaka ku fana ni xexo: “Hikokwalaho, tlheriselani swilo swa Khezari eka Khezari, kambe swilo swa Xikwembu eka Xikwembu.” (Matewu 22:21) Hambiswiritano, a a vulavula hi vutihlamuleri lebyi Vakreste a va ri na byona eka tihulumendhe leti endzhaku va byeriweke leswaku va tiveka ehansi ka tona. (Varhoma 13:1) Kambe ndzayo ya yena ya tirha ni le ka wansati la ringetaka ku hetisisa vutihlamuleri bya yena eka Xikwembu hala tlhelo a yingisa ndzayo ya Matsalwa ya ku titsongahata eka nuna wakwe, hambiloko a nga ri mupfumeri.

Un’wana ni un’wana loyi a dyondzaka Bibele wa swi tiva leswaku yi kandziyisa mhaka ya leswaku Mukreste u ni vutihlamuleri lebyikulu eka Xikwembu xa Matimba Hinkwawo bya ku tshembeka eka xona minkarhi hinkwayo. (Mintirho 5:29) Kambe minkarhi yo tala mugandzeri wa ntiyiso a nga pfumelelana ni swikombelo kumbe swikoxo swa munhu la nga riki mupfumeri loyi mugandzeri yoloye a nga ehansi ka yena, hi nkarhi lowu fanaka a tivonela leswaku a nga tluli milawu leyi tlakukeke ya Xikwembu.

Eka Daniyele ndzima 3 hi kuma xikombiso lexinene xa Vaheveru vanharhu. Hosi ya vona Nebukadnetsara u lerise leswaku vona ni van’wana va ya erivaleni ra Dura. Hi ku xiya leswaku a ku ya endliwa timhaka ta vugandzeri bya mavunwa, Vaheveru lavanharhu kumbexana a va ta va va rhandze ku tshama va nga yi. Kumbexana Daniyele u swi kotile ku tshama a nga yi, kambe lavanharhu a va swi kotanga. * Ku ya va yile, kambe ku  nga ri hi xikongomelo xa ku ya hlanganyela eku endleni ka leswo biha.—Daniyele 3:1-18.

Hilaha ku fanaka, hi minkarhi ya tiholideyi wanuna la nga riki mupfumeri a nga kombela kumbe ku sindzisa nsati wa yena la nga Mukreste leswaku a endla swilo leswi a nga swi rhandziki. Xiya swikombiso swi nga ri swingani: Wanuna loyi a nga byela nsati wakwe leswaku a sweka swakudya swo karhi hi siku leri yena ni van’wana va nga ta tlangela holideyi yo karhi. Kumbe wanuna loyi a nga sindzisa leswaku ndyangu wa yena (ku katsa ni nsati wakwe) va endzela maxaka ya yena lama n’wi rhambeke leswaku va ta dya swakudya kumbe va ma endzela ntsena. Kumbe emahlweni ka holideyi, a nga ha byela nsati wakwe leswaku loko a ya eku xaveni, a n’wi xavela swo karhi—swakudya leswi dyiwaka hi holideyi, tinyiko kumbe maphepha yo phutsela tinyiko ni makhadi ya kona.

Ina, wansati wa Mukreste u fanele a swi yimela hi milenge leswaku a nga hlanganyeli eswiendlweni swa vukhongeri, kambe ku vuriwa yini hi swikombelo swo tano? Wanuna hi yena nhloko ya ndyangu, naswona Rito ra Xikwembu ri ri: “N’wina vavasati lava tekiweke, tivekeni ehansi ka vanuna va n’wina, tanihi leswi swi fanelaka eHosini.” (Vakolosa 3:18) Etimhakeni leti, xana a nga titsongahata eka nuna wakwe kambe a tama a ha tshembekile eka Xikwembu? Hi yena a faneleke a vona leswaku u ta swi endlisa ku yini leswaku a yingisa nuna wakwe a tlhela a endla leswi rhandziwaka hi Yehovha.

Minkarhi yin’wana nuna wakwe a nga n’wi kombela leswaku a n’wi swekela swakudya swin’wana, kumbexana hileswi a swi rhandzaka kumbe hileswi a talaka ku dya swona hi masiku yo karhi. Wansati u ta lava ku n’wi kombisa leswaku wa n’wi rhandza naswona u xixima vunhloko byakwe. Xana wansati loyi u ta n’wi swekela swona hambiloko ku ri hi nkarhi wa holideyi yo karhi? Vavasati van’wana va Vakreste va nga swi endla hi mbilu yo basa, va swi teka ku fana ni ntirho wa siku na siku wa ku sweka swakudya. Kunene, Mukreste la tshembekaka a nge swi endli hi xikongomelo xa ku tlangela holideyi, hambiloko nuna wakwe a swi teka swi ri swa ku tlangela holideyi. Hilaha ku fanaka, wanuna a nga kombela nsati wakwe leswaku va endzela maxaka yakwe swin’we hi minkarhi yo hambana-hambana en’hwetini kumbe elembeni. Xana a nga endla tano ni hi siku ra holideyi? Kumbe, xana wansati a a ta pfumela ku xavela nuna wakwe swilo leswi a n’wi kombeleke ku vuya na swona loko a ya xava swilo swa le kaya, handle ko lava ku tiva leswi nuna wakwe a lavaka ku endla swona hi swilo swo tano?

Ina, wansati la nga Mukreste u fanele a anakanya ni hi vanhu van’wana—ndlela leyi sweswo swi nga va khumbaka ha yona. (Vafilipiya 2:4) U fanele a tikombisa leswaku a nga hlangani helo ni holideyi yo karhi, tanihi leswi kumbexana Vaheveru vanharhu va rhandzeke leswaku va nga voniwi hi van’wana loko va ya erivaleni ra Dura. Kutani a nga ringeta ku vulavurisana ni nuna wakwe hi vuxiyaxiya leswaku wanuna wa kona a tiendlela swilo leswi fambisanaka na tiholideyi hi yexe, hi ku anakanyela ripfalo ra nsati wakwe loyi a n’wi rhandzaka ni ku n’wi xixima. Wanuna a nga swi vona swi antswa leswaku a nga nghenisi nsati wakwe exiyin’weni lexi nga n’wi siyaka a khomiwe hi tingana hileswi nsati wakwe a nga ta ala ku hlanganyela eka swilo swa vukhongeri bya mavunwa. Ina, ku vulavurisana hi moya lowunene ka ha ri emahlweni swi nga endla leswaku ku fikeleriwa xiboho lexinene.—Swivuriso 22:3.

Kambe Mukreste la tshembekaka hi yena a faneleke a kambisisa mhaka hi vuenti kutani a tiendlela xiboho. Minkarhi hinkwayo u fanele a tshembeka eka Xikwembu, hilaha Vaheveru vanharhu va endleke hakona. (1 Vakorinto 10:31) Kambe Mukreste un’wana ni un’wana u fanele a tiendlela xiboho leswaku hi swihi swilo leswi nga onhiki nchumu leswi nga endliwaka loko a komberiwa hi munhu loyi a nga ehansi ka yena endyangwini kumbe etikweni.

[Nhlamuselo ya le hansi]