Vatswari—Enerisani Swilaveko Swa Vana Va N’wina!

VANA va lava nkongomiso ni ndzayo ya rirhandzu, ngopfu-ngofu leyi humaka eka vatswari va vona. Tania Zagury, loyi a nga mudyondzisi wa le Brazil u vule leswi landzelaka malunghana ni mhaka leyi: “Vana hinkwavo va rhandza ku titsakisa. Va fanele va vekeriwa swipimelo. I vatswari lava faneleke va va vekela swona. Loko va nga swi veki, vana a va ha lawuleki.”

Hambiswiritano, ematikweni yo tala laha ku nga ni moya wa ku tilawula swi nga tika ku landzelela ndzayo leyi nga laha henhla. Kutani, vatswari va nga wu kuma kwihi mpfuno? Vatswari lava chavaka Xikwembu va swi tiva leswaku vana va vona i “ndzhaka leyi humaka eka Yehovha.” (Pisalema 127:3) Hikwalaho, nkongomiso wa ku kurisa vana va vona va wu kuma eBibeleni, ku nga Rito ra Xikwembu. Hi xikombiso, Swivuriso 13:24 yi ri: “Loyi a nga tirhisiki nkhavi u venga n’wana wakwe, kambe loyi a n’wi rhandzaka wa n’wi lava leswaku a n’wi laya.”

Leswi Bibele yi tirhiseke rito “nkhavi” a yi vuli ku xupula hi xiviri ntsena; yi vula ku ololoxa hi ndlela yin’wana ni yin’wana. Ina, hakanyingi n’wana a nga vuyisiwa endleleni hi ku tshinyiwa hi nomu ntsena. Swivuriso 29:17 yi ri: “Bana n’wana wa wena, kutani u ta ku wisisa, naswona u ta wu tsakisa swinene moya-xiviri wa wena.”

Vana va fanele va tshinyiwa hi ndlela ya rirhandzu leswaku va ta tshika mikhuva leyi nga tsakisiki. Ndzayo yo tano leyi tiyeke ni ya tintswalo yi ta kombisa leswaku mutswari wa khathala hi n’wana wa yena. (Swivuriso 22:6) Hikwalaho vatswari mi nga heli mbilu! Loko mi landzela ndzayo ya Bibele leyi nga yinene ni leyi tirhaka, mi ta tsakisa Yehovha Xikwembu mi tlhela mi xiximiwa hi vana va n’wina.