Wa Tsundzuka Xana?

Xana u swi tsakerile ku hlaya minkandziyiso ya sweswinyana ya Xihondzo xo Rindza? Kutani a hi vone loko u ta swi kota ku hlamula swivutiso leswi landzelaka:

• Huvo ya Milawu ya Muganga ya le Jarimani yi pfunete njhani leswaku vukhongeri byi hlula hi tlhelo ra nawu?

Huvo yoleyo yi tlhenguse xiboho lexi nga riki xinene xa huvo yin’wana malunghana na Timbhoni ta Yehovha ni ku langutiwa ka tona tanihi vandla leri amukelekaka etikweni. Xiboho xolexo xa ku hlula a xi vula leswaku loko munhu a ri ni ntshunxeko wa vukhongeri a nga ‘yingisa tidyondzo ta vukhongeri’ ku tlula leswi laviwaka hi Mfumo.—8/15, tluka 8.

• Xana Yobo u xaniseke nkarhi wo tanihi kwihi?

Buku ya Yobo a yi kombisi a xaniseke malembe yo tala. Ku xaniseka ka Yobo swin’we ni ntlhantlho wa kona swi nga ha va swi teke tin’hweti ti nga ri tingani, kumbexana leti nga hlanganisiki ni lembe.—8/15, tluka 31.

• Ha yini hi tiyiseka leswaku Diyavulosi a hi munhu wa vukholwa-hava?

Yesu Kreste a a swi tiva leswaku Diyavulosi i wa xiviri. Yesu u ringiwe hi munhu wa xiviri, ku nga ri vubihi byo karhi lebyi a byi ri endzeni ka yena. (Matewu 4:1-11; Yohane 8:44; 14:30)—9/1, matluka 5-6.

• Swivuriso 10:15 yi ri: “Swilo swa nkoka swa munhu la fuweke i muti wakwe lowu tiyeke. Ku lova ka swisiwana i vusiwana bya swona.” Xana leswi i ntiyiso hi ndlela yihi?

Rifuwo ri nga va nsirhelelo eka swiyimo leswi cinca-cincaka evuton’wini, tanihi leswi muti lowu tiyeke wu sirhelelaka lava tshamaka eka wona. Hi hala tlhelo, vusiwana byi nga onha loko ku humelela swilo leswi nga languteriwangiki.—9/15, tluka 24.

• “Ku sungule ku vitaniwa ka vito ra Yehovha” hi ndlela yihi enkarhini wa Enosi? (Genesa 4:26)

Vito ra Xikwembu ri tirhisiwe ku sukela eku sunguleni ka matimu ya vanhu; hikwalaho, loko vito ra Yehovha ri sungula ku vitaniwa enkarhini wa Enosi a swi vuli ku ri vitana hi ripfumelo. Kumbexana vanhu a va tirhisa vito ra Xikwembu hi ndlela yo biha eka vona vini kumbe eka van’wana lava a va vula leswaku va gandzela Xikwembu hi ku tirhisa vona.—9/15, tluka 29.

• Rito leri nge “ndzayo” ri vula yini hi ku ya hi Bibele?

Rito leri a ri vuli muxaka wo karhi wa ku khoma munhu hi ndlela yo biha kumbe hi tihanyi. (Swivuriso 4:13; 22:15) Rito ra Xigriki leri hundzuluxeriweke ri va “ndzayo,” ngopfu-ngopfu ri fambisana ni ndzetelo, dyondzo, ku ololoxa naswona minkarhi yin’wana ri vula nxupulo lowu endliwaka hi ndlela leyi kombisaka rirhandzu. Ndlela leyinene leyi vatswari va nga tekelelaka Yehovha ha yona i ku lwela ku endla leswaku ku tshama ku ri ni mbulavurisano lowunene exikarhi ka vona ni vana. (Vaheveru 12:7-10)—10/1, matluka 8, 10.

• Vakreste va ntiyiso namuntlha va swi kombisa njhani leswaku va le hansi ka vulawuri bya Xikwembu?

Loko Timbhoni ta Yehovha ti ri karhi ti twarisa Mfumo wa Xikwembu, a ti ngheni etimhakeni ta tipolitiki kumbe ku kucetela vanhu leswaku va xandzukela vafumi va misava leyi, hambi ku ri ematikweni lawa Timbhoni ti yirisiweke eka wona. (Tito 3:1) Ti pfuna vanhu hi ndlela leyi Yesu ni vadyondzisiwa va yena vo sungula va va pfuneke ha yona ti tlhela ti lwela ku va pfuna leswaku va landzela mimpimanyeto ya Bibele, yo tanihi vutshembeki, mahanyelo lamanene ni ku tshembeka entirhweni.—10/15, tluka 6.

• Mati lama nyikaka vutomi ma khuluka hi ndlela yihi le Andes?

Timbhoni ta Yehovha ta kwalaho ti endla matshalatshala yo byela vanhu ntiyiso wa Bibele hi tindzimi timbirhi ta kwalaho ku nga Xiquechua ni Xiaymara. Timbhoni ti endzela vanhu lava tshamaka eswihlaleni leswi nga eTiveni ra Titicaca, ku katsa ni swihlala leswi “papamaka” leswi endliweke hi tinhlanga leti milaka etiveni rolero.—10/15, matluka 8-10.

• I yini lexi Xikwembu xi hi nyikeke xona leswaku xi hi kongomisa, lexi nga ha fanisiwaka ni fambiselo ra khompyuta ro kongomisa swihaha-mpfhuka swa manguva lawa?

Xikwembu xi nyike vanhu nchumu lowu va kongomisaka emahanyelweni. Nchumu wa kona i ripfalo leri hi tswariweke na rona. (Varhoma 2:14, 15)—11/1, matluka 3-4.

• Ha yini rifu ra Yesu ri ri ni ntikelo lowukulu?

Loko Adamu wanuna la hetisekeke a dyoha, u lahlekeriwe hi vutomi bya yena a tlhela a endla leswaku byi lahlekela ni vana va yena. (Varhoma 5:12) Tanihi munhu la hetisekeke, Yesu u endle gandzelo hi vutomi bya yena a ri munhu wa nyama, xisweswo a nyikela nkutsulo lowu endleke leswaku vanhu lava tshembekaka va va ni ntshembo wo kuma vutomi lebyi nga heriki.—11/15, matluka 5-6.

• A ku ri vamani Vaskita lava ku vulavuriwaka ha vona eka Vakolosa 3:11?

Vaskita a ku ri vanhu lava tsendzelekaka lava fikeke va fuma timbala ta Eurasia ku sukela kwalomu ka 700 ku ya eka 300 B.C.E. A va ri vagadi va tihanci lava hlamarisaka va tlhela va va tinhenha. Swi nga ha endleka Vakolosa 3:11 a yi nga vuli vanhu va rixaka ro karhi, kambe a yi vula vanhu va timbilu ta ntima.—11/15, matluka 24-5.

• Ha yini hi nga vulaka leswaku Nawu wa Nsuku i dyondzo leyi hi faneleke hi tshama hi ri karhi hi anakanya ha yona minkarhi hinkwayo?

Nawu lowu wa mahanyelo wa dyondzisiwa eka Vayuda, Mabudha, eka filosofi ya Magriki ni le ka Vuconfucius. Hambiswiritano, leswi Yesu a vulavuleke ha swona eDyondzweni ya le Ntshaveni swi lava ku tekeriwa magoza lamanene, naswona swi khumba vutomi bya vanhu hinkwavo. (Matewu 7:12)—12/1, tluka 3.