Henry Wa Vunhungu Ni Bibele

EBUKWINI ya yena leyi nge History of the English-Speaking Peoples (Vholumo 2), Winston Churchill u tsarile a ku: “Ndzhundzunuko wu byi cince swinene vukhongeri. Bibele yi sungule ku tirha swinene. Vanhu va khale a va teka Matsalwa yo Kwetsima ma ri ni khombo eka lava nga dyondzangiki, naswona a va anakanya leswaku ma fanele ma hlayiwa hi vafundhisi ntsena.”

Mhaka leyi yi ya emahlweni: “Tibibele leti heleleke leti kandziyisiweke, leti hundzuluxeriweke ti ya eka Xinghezi hi Tyndal na Coverdale, ti sungule ku humesiwa eku heleni ka xixikana xa 1535, naswona ku sungule tsima ro humesa minkandziyiso yin’wana yo hlayanyana. Hulumendhe yi lerise vafundhisi leswaku va khutaza vanhu ku hlaya Bibele.” Loko ku hundze madzana ya malembe tiko ra Nghilandhi ri nga tivi nchumu hi Bibele, ri sungule ku yi tiva hi mpfuno wa hulumendhe ya Henry wa Vunhungu, hayi wa kereke. *

“Nchumu wun’wana lowu heteke vanhu va khale matimba hileswi Hulumendhe yi leriseke leswaku ku kandziyisiwa Tibibele to tala swinene ta Xinghezi le Paris, naswona hi September 1538 yi lerise leswaku kereke yin’wana ni yin’wana etikweni yi xava Bibele leyikulu ya Xinghezi, leswaku vanhu va yi tirhisa hi ku olova. Ku vekiwe tikopi ta tsevu eSt Paul’s Cathedral eDorobeni ra London, naswona ku vuriwa leswaku vanhu a va khitikanela kona siku hinkwaro, ngopfu-ngopfu loko ku ri ni munhu la kotaka ku hlayela ehenhla hi rito ro twala.”

Lexi vavisaka, ematikweni yo tala, vanhu vo tala a va tikarhateli ku hlaya Bibele nkarhi na nkarhi. Leswi swa vavisa hikuva Bibele hi yona ntsena leyi “[huhuteriweke] hi Xikwembu naswona [yi] pfuna ku dyondzisa, ku tshinya, ku lulamisa swilo, ku laya eku lulameni.”—2 Timotiya 3:16.

[Nhlamuselo ya le hansi]

[Laha Xifaniso Xi Humaka Kona eka tluka 32]

Henry VIII: Painting in the Royal Gallery at Kensington, from the book The History of Protestantism (Vol. I)