Vakulu—Letelani Van’wana Ku Byarha Vutihlamuleri

KU NI xilaveko xa xihatla xa vavanuna lava nga vaka valanguteri emavandlheni ya Timbhoni ta Yehovha emisaveni hinkwayo. Ku ni swivangelo-nkulu swinharhu swa xilaveko lexi.

Xo sungula, Yehovha u hetisisa xitshembiso xa yena xo endla ‘lontsongo ngopfu a va tiko ra matimba.’ (Esaya 60:22) Hi tintswalo ta yena letikulu ngopfu, ku khuvuriwe kwalomu ka miliyoni ya vadyondzisiwa lavantshwa va va Timbhoni ta Yehovha eka malembe manharhu lama hundzeke. Ku laveka vavanuna lava nga ni vutihlamuleri leswaku va pfuna vanhu lava va ha ku khuvuriwaka leswaku va endla nhluvuko va va Vakreste lava wupfeke.—Vaheveru 6:1.

Xa vumbirhi, van’wana lava veke vakulu hi makume ya malembe va boheke ku hunguta vutihlamuleri bya vona evandlheni hikwalaho ka ku dyuhala kumbe hikwalaho ka swiphiqo swa rihanyo.

Xa vunharhu, sweswi vakulu vo hlayanyana lava nga Vakreste lava hisekaka i swirho swa Tikomiti to Vulavurisana ni Swibedlhele, Tikomiti to Aka ta Xifundzha, kumbe va le ka Tikomiti ta Tiholo ta Tinhlengeletano. Minkarhi yin’wana va boheke ku tshika byin’wana bya vutihlamuleri bya vona emavandlheni ya ka vona leswaku va ta kota ku tirha kahle.

Xana xilaveko lexikulu xa vavanuna lava engetelekeke lava fanelekaka ku nga hlangavetaniwa njhani na xona? Ndzetelo hi wona xilotlelo xa kona. Bibele yi khutaza valanguteri lava nga Vakreste leswaku va letela “vanhu vo tshembeka, lava, na vona, va nga ta faneleka kahle ku swi dyondzisa van’wana.” (2 Timotiya 2:2) Ku letela swi vula ku dyondzisa munhu leswaku a fanelekela nchumu wo karhi. A hi kambisiseni ndlela leyi vakulu va nga va letelaka ha yona vavanuna van’wana lava fanelekaka.

Landzelani Xikombiso Xa Yehovha

Kunene, Yesu Kreste a a wu ‘fanelekela’ ntirho wa yena! U leteriwe hi Yehovha Xikwembu hi byakwe. I yini leswi endleke leswaku ndzetelo lowu wu famba kahle? Yesu u boxe swilo swinharhu, hi ku ya hi Yohane 5:20: “Tatana [1] u ni xinakulobye eka N’wana naswona [2] u n’wi komba swilo hinkwaswo leswi a swi endlaka, naswona u ta n’wi komba [3] mintirho leyikulu ku tlula leyi.” Ku kambisisa tinhla leti ha yin’we-yin’we swi ta endla leswaku hi twisisa mhaka ya ku letela.

Xiya leswaku Yesu u rhange hi ku: “Tatana u ni xinakulobye eka N’wana.” Ku sukela eku sunguleni ka ntumbuluko, Yehovha ni N’wana wa yena a va ri ni vuxaka lebyikulu. Swivuriso 8:30 ya hi voningela malunghana ni vuxaka byolebyo: “Hi nkarhi wolowo [mina Yesu] a ndzi ri etlhelo ka yena [Yehovha Xikwembu] ndzi ri mutirhi la nga ni vuswikoti, a ndzi ri munhu loyi a n’wi rhandzaka hilaha ku hlawulekeke siku ni siku, mina ndzi tsakile emahlweni ka yena nkarhi hinkwawo.” Yesu a a nga kanakani leswaku Yehovha a a ‘n’wi rhandza hilaha ku hlawulekeke.’ Naswona Yesu a nga wu tumbetanga ntsako lowu a veke na wona loko a ri karhi a tirha etlhelo ka Tata wa yena. Swa tsakisa hakunene loko vakulu lava nga Vakreste va va ni vuxaka lebyikulu ni lava va va letelaka!

Yinhla ya vumbirhi leyi Yesu a yi boxeke hi leswaku Tatana “u n’wi komba swilo hinkwaswo leswi a swi endlaka.” Marito lawa ma seketela leswi vuriwaka eka Swivuriso 8:30, leswaku Yesu a a “ri etlhelo” ka Yehovha loko ku ri karhi ku tumbuluxiwa vuako. (Genesa 1:26) Vakulu va nga landzela xikombiso xolexo lexinene hi ku tirha swin’we ni malandza ya vutirheli, va va dyondzisa ku endla swiavelo swa vona hi ndlela leyinene. Hambiswiritano, a hi malandza ya vutirheli lama ha ku hlawuriwaka ntsena lama lavaka ndzetelo  lowu hambetaka. Ku vuriwa yini hi vamakwerhu lava tshembekaka lava heteke malembe yo tala va tikarhatela ku fanelekela ntirho wa ku va valanguteri, lava ni sweswi va nga si hlawuriwaka? (1 Timotiya 3:1) Vakulu va fanele va nyika vavanuna vo tano ndzayo leyi kongomeke leswaku va ta tiva laha va faneleke va antswisa kona.

Hi xikombiso, nandza wa vutirheli a nga ha va a tshembeka, a wu khoma nkarhi naswona a yi endla hi ku gingiriteka mintirho ya yena. Naswona a nga ha va a ri mudyondzisi lonene. A nga ha va a endla ntirho lowunene ngopfu evandlheni. Kambe, a nga ha va a nga swi xiyi leswaku a nga va khomi kahle Vakreste-kulobye. Vakulu va fanele va kombisa “ku rhula loku fambisanaka ni vutlhari.” (Yakobo 3:13) Xana a swi nga ta va swinene loko nkulu o vulavula ni nandza yoloye wa vutirheli, a n’wi hlamusela kahle xiphiqo xa kona, a n’wi nyika swikombiso swo karhi a tlhela a n’wi kombisa ndlela leyinene leyi a nga antswisaka ha yona? Loko nkulu loyi a ‘lunga ndzayo ya yena hi munyu’ hi vukheta, yi ta amukeriwa hi mandla mambirhi. (Vakolosa 4:6) Ina, nandza wa vutirheli u ta olovisela nkulu loyi swilo loko a amukela ndzayo ya kona hi mbilu hinkwayo.—Pisalema 141:5.

Emavandlheni man’wana, vakulu va letela malandza ya vutirheli nkarhi wo leha. Hi xikombiso, va famba ni malandza ya vutirheli lama fanelekaka loko va endzela lava vabyaka kumbe lava dyuhaleke. Hi ndlela leyi malandza ya vutirheli ma va ni ntokoto entirhweni wo risa. Entiyisweni, nandza wa vutirheli a nga endla swo tala leswaku a yisa nhluvuko wa yena emahlweni.—Vona bokisi leri nga laha hansi leri nge “Leswi Malandza Ya Vutirheli Ma Nga Swi Endlaka.”

Yinhla ya vunharhu leyi endleke leswaku ku leteriwa ka Yesu ku humelela swinene hi leswaku Yehovha u n’wi letele a ri karhi a ehleketa ni hi timhaka ta nkarhi lowu taka. Yesu u vule leswaku Tatana a a ta kombisa N’wana “mintirho leyikulu ku tlula leyi.” Ntokoto lowu Yesu a veke na wona loko a ri emisaveni wu n’wi endle leswaku a va ni timfanelo leti a ti ta laveka loko a endla swiavelo swa yena swa le nkarhini lowu taka. (Vaheveru 4:15; 5:8, 9) Hi xikombiso, Yesu u ta kuma xiavelo lexikulu ku nga ri khale—xa ku pfuxa ni ku avanyisa vanhu va magidi ya timiliyoni lava sweswi va feke!—Yohane 5:21, 22.

Loko vakulu namuntlha va letela malandza ya vutirheli va fanele va ehleketa hi swilaveko swa nkarhi lowu taka. Hambiloko swi tikomba onge ku ni vakulu ni malandza ya vutirheli lama eneleke lama nga ta khathalela swilaveko swa sweswi, xana swi ta va tano loko ko vumbiwa vandlha lerintshwa? Ku vuriwa yini loko ko vumbiwa mavandlha yo hlayanyana? Eka malembe manharhu lama hundzeke, ku vumbiwe mavandlha lamantshwa yo tlula 6 000 emisaveni hinkwayo. Ku laveka vakulu vo tala ni malandza ya vutirheli leswaku va ta khathalela mavandlha wolawo lamantshwa!

Vakulu, xana mi landzela xikombiso xa Yehovha hi ku hlakulela vuxaka lebyinene ni vanhu lava mi va letelaka? Xana ma va kombisa ndlela yo endla ntirho wa vona? Xana ma anakanyisisa  hi swilaveko swa le nkarhini lowu taka? Loko mi landzela xikombiso xa ndlela leyi Yehovha a leteleke Yesu ha yona swi ta tisela vo tala mikateko leyikulu.

Mi Nga Chavi Ku Avela Van’wana Vutihlamuleri

Vakulu lava nga ni vuswikoti lava toloveleke ku endla swiavelo swo tala swo tika va nga ha kanakana ku avela van’wana vutihlamuleri. Va nga ha va va ringetile ku endla tano enkarhini lowu hundzeke kambe vuyelo bya kona byi nga tsakisi. Kutani va nga ha va ni langutelo ra leswaku, ‘Loko u lava leswaku ntirho wu endliwa kahle, u fanele u tiendlela hi wexe.’ Kambe xana langutelo leri ri fambisana ni ku rhandza ka Yehovha, loku hlamuseriweke eMatsalweni, ka leswaku vanhu lava nga ni ntokoto wutsongo va fanele va leteriwa hi lava nga ni ntokoto lowukulu?—2 Timotiya 2:2.

Muapostola Pawulo a a hele matimba loko Yohane Marka, loyi a ri un’wana wa lava a a famba-famba na vona, a tshike xiavelo xa yena ePamfiliya kutani a tlhelela ekaya. (Mintirho 15:38, 39) Kambe, Pawulo a nga tshikanga mhaka yoleyo yi n’wi sivela ku letela van’wana. U hlawule Timotiya, makwerhu loyi a ha ri lontshwa kutani a n’wi letela entirhweni wa vurhumiwa. * (Mintirho 16:1-3) Le Beriya varhumiwa va hlangavetane ni nkaneto wa tihanyi lerova a ku nga ta va vutlhari leswaku Pawulo a hambeta a tshama kwalaho. Hikwalaho u siye vandlha rolero lerintshwa ri khathaleriwa hi Silasi, ku nga makwerhu la kuleke la wupfeke, swin’we na Timotiya. (Mintirho 17:13-15) A swi kanakanisi leswaku Timotiya u dyondze swo tala eka Silasi. Endzhakunyana, loko Timotiya a lunghekele ku byarha vutihlamuleri lebyi engetelekeke, Pawulo u n’wi rhumele eTesalonika leswaku a ya khutaza vandlha ra kwalaho.—1 Vatesalonika 3:1-3.

Vuxaka lebyi Pawulo na Timotiya a va ri na byona a byi nga ri bya ku hetisisa nawu ntsena. Vuxaka bya vona a byi ri byikulu. Loko Pawulo a tsalela vandlha ra le Korinto, u vulavule hi Timotiya loyi a kunguhata ku n’wi rhumela kwalaho, a vula leswaku i ‘n’wana la rhandzekaka ni loyi a tshembekaka eHosini.’ U engeterile: “[Timotiya] u ta mi tsundzuxa maendlelo ya mina mayelana na Kreste Yesu.” (1 Vakorinto 4:17) Timotiya u wu amukerile ndzetelo lowu a wu kumeke eka Pawulo, a fanelekela ku hetisisa swiavelo swa yena. Vamakwerhu vo tala lavantshwa va ve malandza ya vutirheli, vakulu, kumbe valanguteri lava famba-fambaka hileswi va pfuniweke hi ndzetelo lowu va wu kumeke eka vakulukumba lava a va va rhandza hakunene, hilaha Pawulo a endleke hakona eka Timotiya.

Vakulu, Letelani Van’wana!

Handle ko kanakana, vuprofeta bya Esaya 60:22 bya hetiseka namuntlha. Yehovha u endla ‘lontsongo ngopfu a va tiko ra matimba.’ Leswaku tiko rolero ri tshama ri ri ra “matimba,” ri fanele ri hleleka kahle. Vakulu, ha yini mi nga anakanyi hi tindlela tin’wana leti mi nga va letelaka ha tona vavanuna lava tinyiketeleke lava fanelekaka? Endlani leswaku nandza un’wana ni un’wana wa vutirheli a swi tiva kahle leswi a faneleke a endla swona leswaku a endla nhluvuko. Na n’wina vamakwerhu lava khuvuriweke, tirhisani xitsundzuxo xin’wana ni xin’wana lexi mi xi kumaka. Tirhisani minkarhi leyi mi yi kumaka ya ku antswisa vuswikoti bya n’wina, vutivi ni ntokoto. Entiyisweni Yehovha u ta katekisa nongonoko wo tano wa mpfuno wa rirhandzu.—Esaya 61:5.

[Nhlamuselo ya le hansi]

[Bokisi leri nga eka tluka 30]

Leswi Malandza Ya Vutirheli Ma Nga Swi Endlaka

Hambileswi vakulu va faneleke va letela malandza ya vutirheli, ku ni swo tala leswi malandza ya vutirheli ma nga swi endlaka leswaku ma endla nhluvuko lowukulu emoyeni.

—Malandza ya vutirheli ma fanele ma endla swiavelo swa wona hi ku hiseka ni hi ku tshembeka. Ma fanele ma tlhela ma va ni mukhuva lowunene wa ku dyondza. Ku fikela eka mpimo wo karhi, nhluvuko wu titshege hi ku dyondza ni ku tirhisa leswi u swi dyondzaka.

—Loko nandza wa vutirheli a lunghiselela nkulumo leyi a nga ta yi nyikela enhlanganweni wa Vukreste, a nga fanelanga a kanakana ku kombela nkulu la nga ni vuswikoti leswaku a n’wi nyika swiringanyeto swa ndlela leyi a nga yi nyikelaka ha yona.

—Nandza wa vutirheli a nga tlhela a kombela nkulu leswaku a xiyisisa ndlela leyi a yi nyikelaka ha yona nkulumo ya Bibele ni ku n’wi nyika ndzayo ya laha a faneleke a antswisa kona.

Malandza ya vutirheli ma fanele ma lava ndzayo leyi humaka eka vakulu, ma yi amukela naswona ma yi tirhisa. Hi ndlela leyi, nhluvuko wa wona wu ta “vonaka eka vanhu hinkwavo.”—1 Timotiya 4:15.